2 Timodeus 3 - Intas Etipup

Nuarin-tas alupas 3.

¹ NAMU lep ato aiek mika, etpu yetpam niji opan ohocred an naopan iyehki.

² Erupu aktaktai ra ache natimi, um has ira ra itai, um auyat, um ijinies inliinmopura, um asan tas has, um imyipalea ilpu atmil ura, um eti naaurineig vai itai, um amcel va nedo upene,

³ um esjum vai ilpu atimi ehpan ira ra, um iruhcai inliinmopura, um athai intas ahcil, um auatialidi inliinmopura, um ipjin nedo ura, um amcel vai ilpu atimi upene,

⁴ um efaifa, um auroauro inliinmopura, um ijinies inliinmopura, um aiyu alupas inliinmopura va niji itai imyiacitak, jam aiyu tintin vai Atua;

⁵ um alaigaheni an nipjineucsera, jam ateri nemda o un: ude ra sji eigki aiek.

⁶ Era idivai ra sji eigki ara era atahas pan irai iji imnim ara, um imyiahnag ilpu takata auatialidi, et ahinag nedo has ura, et lep imyiahnag ra inmerit has acheiachei jipe ura,

⁷ er esege imi ra irai iji adiat, ja et idim ehka vai ra natovaig intas inivaijec.

⁸ Erus idim imyiisjis itai irai Moses a Jannes im Jambres, et idim ucco, era lep acaijaig intas inivaijec ara: atimi iji eig et has inliinmopura ara, era lep ahnag an nimyiisjis ninivaijec ara.

⁹ Ja uhpu atapanes ra; erupu ecetai nedo ahnag ura atimi asega, et idiva nedo ahnag o ohwat raigki.

¹⁰ Ja as apol upene an nesege unyak aiek, im nedo unyak, im naktaktai u inliinmopok, im nimyiisjis ninivaijec unyak, im nedo erop unyak, im naiheuc va atimi unyak, im nedo eti auatiemda unyak,

¹¹ im niji atmas vai nyak, im niji ohocred unyak is yetpam irak Anteok, im Aikoneum, im Listra; na ato natmas iji eigki aiek kis leucse ainyak; ja is imyiatamaig nyak vaig asega a Natimarid.

¹² Maiya, erupu lep leucse atmas vai ra ara asega, era ika ara eri ago nedo eccen vai Atua ara irai Iesu Kristo.

¹³ Ja etpu esjilid acen nedo has u ilpu atimi auatatimi, im ilpu atimi imyiahnag atimi, erupu imyiahnag atimi ara, ja uhpu lep imyiahnag ra.

¹⁴ Jam apol aktit aiek an nitai iji eigki as atahaijeg aiek um imyiisjis ninivaijec vaig, na idim ato yin aiek is esege imi euc aien;

¹⁵ As upyi ato aiek, an halav unyum um imyihum pam an naopan ineig, Intas itaup ineig eris aged, et emda par alupai euc narapakau ineig uhpu imyiatamaig euc vaig, va nimyiisjis ninivaijec ineig et eteuc ehele Iesu Kristo.

¹⁶ Is ahes ehele Nesgai Atua Intas asega eris aged, et lep upene va nasuptecnaigvaig ehele atimi, um ated ra, um imyiadumoij ra, um esege imi ra nedo atoh:

¹⁷ va etpu ato niji itai asega natimi u Atua, um emda acen an nauritai upene asega.