2 Timodeus 2 - Intas Etipup

Nuarin-tas alupas 2.

¹ VA nitai ineigki etmu emda inliinmopom aiek, ak inhal unyak, an naiheuc ineig et amen ehele Iesu Kristo:

² nitai iji eigki as atahaijeg ehelek aiek an nuhup u atimi is ahinag, namu ikni aiek ehele ilpu atimi inivaijec iji eig, erupu emda ara par esege imi tak atimi.

³ Namu leucse nohocred aiek, et idiva neucsupo upene u Iesu Kristo:

⁴ et eti imyieccen yin an niji itai an nobohtan a natimi ineig et ago nedoa aien; mika yi imyiacitak yin is ati yin aien mika yi eucsupo.

⁵ El et ika tah natimi yi esjilid aien an nathut u atimi, jam eti imyiaiji intas alep an nathut o un, eri eti adgai korona imi yin.

⁶ Natimi ahapol ineig et auritai aien, eris idim ika etmu upyi hup aien um leh inwah iran.

⁷ Aktaktai intas unyak aiek; etmu lep alupai euc narapakau a Natimarid an niji itai asega.

⁸ Namu imyiehva Iesu Kristo mapoi Tevit aiek, eris imyinusjai yin vai inmas o un, et idivaig intas-upene unyak:

⁹ ek lep leucse nohocred vaig ainyak, et idivai natimi auatatimi, eris lep atapanes irak vaig; ja er eti atapanes an tas o Atua.

¹⁰ Va nitai ineig ek leucse niji itai has asega ainyak vai ra sji eigki eris ehtai ra, mika eri leh nitai imyiatamaig ra ineig ara et amen ehele Iesu Kristo, im nimyiacitak ineig inyi ti lep ti.

¹¹ Et inivaijec intas ineigki, nikavaig, Ele ta ehremesmas ehelen akaija, intupu lep ehrumumoh ehelen akaija:

¹² ele ta leucse niji itai has akaija, intupu lep ehratimarid ehelen akaija: ele ta ateri yin akaija, etpu lep ateri caija aien:

¹³ ele ta imyiisjis nahcil akaija, et idim inivaijec aien: et ehka vai yin nateri yin vaig.

¹⁴ Ahugni lelra aiek an nitai iji eigki, um ated ra an nuhup u Natimarid, mika eri jim imyiisjis itai vai intas ara, et eti upene nedo ineig, etpu imyiahnag ilpu atimi atahaijeg vaig.

¹⁵ Namu emda aiek, va apu upene aiek an nuhup u Atua, natimi auritai eti ehcamai, um ahaig upene intas inivaijec.

¹⁶ Jam ude intas ahnag, im intas vai intakitai: etpu esjilid nedo has ura ara;

¹⁷ etpu caig atimi intas ura et idivaig inmocop: erau lep atimi ira ra a Haimenius im Felitus;

¹⁸ erus ahnag an tas inivaijec arau, um ika, Is ti pan itac inusjai u atimi; um imyiahnag nahaiji ra u nimyiisjis ninivaijec ura.

¹⁹ Ja et eteuc aktit nededuon ineig is ati a Atua, er aged iran intas ineig, nikavaig, Et ato ra a Natimarid era ilpu atimi o un ara: im lep ineig, Erumu lep ude nedo has ura ara asega era anvi nidai Kristo ara.

²⁰ Ja et eti amen nipjicolt im nipjisilver ache an tah neom esjilid, et lep amen nipjicai im nipjihat; et upene nahaijin, jam eti upene nahaijin.

²¹ El et ago adicinadicin yin tah natimi irai itai iji eigki, inyi ipjinitai upene aien, er ago adicinadicin, um upene vai natimi alupas o un, um yecrei vai nauritai upene asega.

²² Namu aha aiek vai inmerit has u ilpu takuras; jam ahilek nedo atoh aiek, im nimyiisjis ninivaijec, im naiheuc va atimi, im neigpa, ehele ra era arohoai Natimarid ara anliinmopura adicinadicin.

²³ Jam ude intas ahnag, im intas vai intakitai, na idim ato aiek, nikavaig, et atupun nimyiisjis itai nitai iji eigki.

²⁴ Eris idim ika yi jim imyiisjis itai a naheca u Natimarid; jam ago nedo updak va atimi asega, etmu lep emda aien par esege, um ago nedo eti auatiemda,

²⁵ um esege updak imi ra sji eigki era imyiisjis itai ara; kit etpu alupai ra nadumoij u inliinmopura a Atua, va erupu ato upene intas inivaijec ara;

²⁶ um aiji lahlah, um apjo nitai apro itai u Tiapolo, eris adumoij pam ara vai yin, mika eri imyiaiji intas o Atua.