2 Timodeus 1 - Intas Etipup

Nuarin-tas alupas 1.

¹ AK Timodeus, inhalav cop unyak, ek aiheuc vai euc ainyak Paulo, napostolo o Iesu Kristo va nasaig u Atua, par asuptecnaig intas upyi asaig va nitai umoh iran ineig et amen ehele Iesu Kristo:

² Etmu amen ehelum naiheuc, im neti aru, im neigpa, et ahes ehele Atua Etmaija, im Iesu Kristo Natimarid uja.

³ Ek naurineig ainyak vai Atua ineig ek aheca o un ainyak anliinmopok inivaijec, et idivai ilpu retpok, um eti atumop par imyiehva euc an nalaigaheni unyak irai iji adiat im niji epeig;

⁴ ek lep merit ainyak nalum euc vaig, mika yi imyiacitak alupas inliinmopok ainyak; ek idim imyiehva intaig unyum ainyak;

⁵ ek wit imyiehva nimyiisjis ninivaijec unyum is eti efaifa, is upyi amen ehele etpom takata Lois, im risum Yunaisi; ek lep imyiisjis ninivaijec ainyak mika, et lep amen ehelum.

⁶ Va nitai ineigki ek ated euc ainyak, mika an ahugni nitai tup ahtai o Atua aiek, et amen anliinmopom, va natijaivaig nikmak ainyak iram.

⁷ Is eti alupai caija inliinmopja imtac a Atua; jai inliinmopja emda, um aiyu, um arapakau.

⁸ Va nitai ineigki namu jim imyiehcamai Natimarid uja aiek, par asuptecnai yin, im lep nyak natimi o un eris arore nyak; jam imtaam ohocred vai intas-upene, an nemda ineig et ahes ehele Atua;

⁹ aien aigki is imyiatamaig caija aien, um ahlaig vai caija an nahlaig upene o un, is eti ago aien va nedo uja, ja va nupyi aktaktai o un, im intup naiheuc o un, is alupai caija aien irai Iesu Kristo, an naopan iyehki is pain eti eteuc nobohtan;

¹⁰ ja er ato upene an naopan ineig, va nehcohos pam u Iesu Kristo, Natimi imyiatamaig caija, aien aigki is atipagki inmas aien, um asuptecnaig nitai umoh iran ineig inyi ti lep ti an tas-upene:

¹¹ eris ati nyak vaig, mika ki atimi asuptecnaig ainyak, um apostolo, um atimi esege imi nup urai iji pece.

¹² Va nitai ineig ek lep ohocred ainyak va nitai iji eigki; ja ek eti ehcamai ainyak: ek idim ato yin ainyak ek asgeig iran ainyak, ek lep ato upene ainyak mika, et emda aien par aminjinaig nitai ineig kis ati ehelen ainyak va nadiat iyehki.

¹³ Etmu itai asjaaicnaig imi euc intas inivaijec, as atahaijeg vaig ehelek aiek, an nimyiisjis ninivaijec unyum im naiyu u inliinmopom ineig et ahes ehele Iesu Kristo.

¹⁴ Namu aminjinaig nitai upene ineig aiek eris ati ehelum irai Nesgan Upene ineig et amen eheleija aien.

¹⁵ Na ato aiek, nikavaig, eris ude nyak nupu Esya iji ehki asega; erau lep atimi ira ra a Fijellus im Hermojines.

¹⁶ Etmu aiheuc vai ra an nimnim u Onesiforus a Natimarid; is idim ehcahinag aiheuc vai nyak aien, um lep eti ehcamai va natau hat irak:

¹⁷ ja is wat amen Roma aien, is ahilek emda nyak aien, um ecet nyak.

¹⁸ Etmu ika a Natimarid yi leh naiheuc aien ehele Natimarid an nadiat iyehki: na lep ato upene aiek niji itai et ahinag is aheca unyak iran aien Efesus.