2 Samuel 8 - Intas Etipup

Nuarin tas alupas 8.

1 Et esjilid an nedoa a Tevit irai up u Filistia im nup u Moab. 3 Et auud Hatatiser im nup u Siria aien. 9 Et abraig pan Joram a Toai mika yi lucsei pan niji itai tup ahtai imi yin aien um asan tas acis yi alwai yin. 11 Et ikni vai Atua a Tevit niji itai tup ahtai im niji itai atoraliak an nedoa. 14 Et ikni ilpu eucsupo o un an pece Itom. 16 Ilpu aheca u Tevit.

¹ IS wat ti pan itac nitai iji igki, is auud nup u Filistia a Tevit, is esjilid ira ra aien: is atipagki inmaliyum esjilid u nup u Filistia irai ikmara a Tevit.

² Is auud nup u Moab aien, um auhaigse ra an nobohtan; ja par asjaaicnaig ira ra an ya aien; is asjaaicnaig ira ra an ya is ero, nikavaig, an ya is ethi mika eri atgei ra, im inya opra is ethi mika eri imiatumumoh ra. Va nitai inigki eris aheca u Tevit a nup u Moab, um imiapan niji itai tup ahtai imi yin.

³ Im lep inig, is auud Hatatiser inhal u Rihob natimarid u nup u Soba a Tevit, is wat apan aien mika yi leh nilpun pece o un u nofowai Yufretes.

⁴ Is iknipagki ehelen a Tevit jariot is wun dausant (1,000), im seven dausant (7,000) ilpu atimi atga irai hors, im twente dausant (20,000) ilpu eucsupo: is ucsamud nalkan neduei hors asega u jariot a Tevit, ja is imicoho hors ache aien uri jariot is wun huntret.

⁵ Eris wat ahes Tamaskus a nup u Siria, um apan, mika eri atau Hatatiser natimarid u nup u Soba, is auud atimi is twente tu dausant (22,000) irai up u Siria a Tevit.

⁶ Ja is par ikni ilpu eucsupo o un a Tevit an pece Siria iyehki is arehed Tamaskus: eris aheca u Tevit a nup u Siria, um imiapan niji itai tup ahtai imi yin. Is imicoho Tevit a Ihova irai iji uarin asega is apan iran aien.

⁷ Is lucsei nitai ahtaipup colt iji ehki a Tevit, eris apos a ilpu aheca u Hatatiser, um imiapan Jerusalem.

⁸ Is leh bras is alupas acen a Tevit natimarid Tibha im Berode, ohwat maliyum u Hatatiser eraigki.

⁹ Is wat atahaijeg a Toai natimarid u nup u Hemad, mika is auud inpak an nedoa asega u Hatatiser a Tevit,

¹⁰ is par abrai Joram inhal o un a Toai, mika yi apan ehele Tevit, um aiheuc vai yin, um asan tas acis yi alwai yin, nikavaig, is ati nedoa vai Hatatiser aien, um auud yin: is idim ati nedoa vai Toai a Hatatiser. Is apos pan ehelen niji ipjisilver, im niji ipjicolt, im niji ipjibras a Joram:

¹¹ is imiitap nitai iji igki vai Ihova a Tevit, um ikni pan irai colt im silver iji ehki is imiitap aien, u nup urai pece asega is esjilid ira ra aien;

¹² nikavaig, u nup u Siria, im nup u Moab, im nup Amon, im nup u Filistia, im nup Amalek, im lep u niji itai eris atoraliak an nedoa u Hatatiser, inhal u Rihob, natimarid u nup u Soba.

¹³ Is wat auud nup u Siria a Tevit an niskanse u mohoanjap, eris eetiin dausant (18,000) ara, um adumoij pam, is esjilid nidan va nauritai inigki.

¹⁴ Is ikni ilpu eucsupo o un aien Itom; maiya, is ikni ilpu eucsupo o un aien irai iji uarin Itom asega, eris aheca u Tevit a nup Itom asega. Is imicoho Tevit a Ihova irai iji uarin asega is apan iran aien.

¹⁵ Is atimarid u nup Isreel asega a Tevit; is aminjinaig upene atimi o un a Tevit, um asuptecnaig neruvaig atoh ehele ra asega.

¹⁶ Is atimi alupas u ilpu eucsupo a Joab inhal u Seruaia; is aged niji itai eris ago a Jehosafat inhal u Ahailut;

¹⁷ erus atimi ahlap a Setok inhal u Ahaitub, im Ahimelek inhal u Abaiadar; is aged intas vai itai a Sereaia;

¹⁸ is atimi alupas u ilpu atimi apos efana im ilpu atimi apos namaka a Bineya inhal u Jehoiata; eris ilpu atimi alupas esjilid a ilpu hal u Tevit.