2 Samuel 6 - Intas Etipup

Nuarin tas alupas 6.

1 Et imiapam nelcau itap ahes irai Kirjad-jiarim a Tevit irai kart mat. 6 Eh auud Ussa i Piris-ussa. 9 Et asan tas acis yi alwai Obet-itom a Atua va nelcau itap. 12 Et imiapan nelcau Saion a Tevit irai iji itai ahlap, um adekdekjai an nuhup o un, et amcel vai yin a Maikal vaig. 17 Et ati aien an neom apelumai, um imiacitak, um ago inhag alupas. 20 Et acaiji Tevit va nimiacitak upene o un a Maikal, et eti asvalav aien um yetpan an mas o un, va nedo iyehki.

¹ IS aketo a Tevit, um asjapicnaig ilpu atimi esjilid asega u nup Isreel; eris dirte dausant (30,000) ara.

² Is atidai a Tevit um apan; eris atirai yin natimi asega iji ehki ahes Beale-juta, mika eri leh eahki nelcau u Atua iyehki, er anvi nidan par ika nidai Ihova emda acen, aien aigki et amen juju an niblai ohwat jerub aien, um imiapam.

³ Eris atijai nelcau u Atua irai kart mat ara; eris imialau ijo ara an neom iyehki u Abinatab is eteuc Cibea: erus aminjinaig kart ahwat halav atamaig u Abinatab, nan, Ussa im Ahaio.

⁴ Eris idim imialau ijo nelcau ara an neom u Abinatab is eteuc Cibea: eris ehratga im nelcau ara, ja is uhup irai nelcau a Ahaio.

⁵ Eris acesaces nohranitai an nuhup u Ihova a Tevit im nup Isreel asega, um auud um ahlai niji obotpot itai ohrai itai asega er ago an nauincai neijiv, nikavaig, harp, im saltere, im timbrel, im nipat, im simbal.

⁶ Eris wat yetpan an nuarin auud korn iran u Nekon, is arah-pan va nelcau an nikman a Ussa, um asjiraig; eris epihtau kurimatau.

⁷ Ja is ere intavaitap u Ihova vai Ussa; is auud yin eahki a Atua va nedo maumau o un; is mas eahki aien u nelcau u Atua.

⁸ Is taigtaig a Tevit, nikavaig, is auud Ussa a Ihova: is anvi nidan nuarin iyehki aien, par ika Pires-Ussa (Nauud-Ussa) um yetpam an nopan inig.

⁹ Is imtitaig Ihova a Tevit an nadiat iyehki, um ika, Etpu evapam ehelek nelcau u Ihova?

¹⁰ Va nitai inigki is esjum a Tevit par imiapan nelcau u Ihova ehelen an maliyum u Tevit: ja is apan a Tevit um atise nelcau an nimnim u Obet-itom nup u Cad-rimmon.

¹¹ Is amen an nimnim u Obet-itom nelcau u Ihova irai mohoc is dri: is acis yi alwai Obet-itom, im nup an nimnim o un asega a Ihova.

¹² Eris imiabrai Tevit, um ika, Et mun acis yi alwai nup an nimnim u Obet-itom a Ihova, im niji itai asega o un, va nelcau u Atua. Va nitai inigki is apan a Tevit, um leh nelcau u Atua an nimnim u Obet-itom, um ati an maliyum u Tevit, um imiacitak.

¹³ Nedo ura nigki, eris wat atga irai atga is siks ara sji igki eris apos nelcau u Ihova, is ahlap irai itai ahlap aien, niji kurimatau alupas im niji kurimatau haklin is esjilid.

¹⁴ Is adekdekjai a Tevit an nuhup u Ihova an nemda o un asega; is aso yin a Tevit irai tup napelumai yilyil.

¹⁵ Is idim uco, eris imiapan nelcau u Ihova a Tevit im nup Isreel asega, um aunyauwaig, um ahlai toho.

¹⁶ Is wat yetpan nelcau u Ihova anliin malivum u Tevit, is easpan an mun neom a Maikal inhalav atahig u Saal, um ecet Tevit is wat aliaujai aien, um adekdekjai an nuhup u Ihova; is amcel vai yin a Maikal an liinmopon.

¹⁷ Eris imiapan nelcau u Ihova ara, um atise an nuarin o un juju an neom apelumai iyehki is ati a Tevit vaig: is ahlap irai iji itai ahlap er atnamud a Tevit, im lep niji itai ahlap va nigpa, an nuhup u Ihova.

¹⁸ Is wat ago ehni niji itai ahlap er atnamud, im niji itai ahlap va nigpa a Tevit, is acis yi alwai atimi aien an nidai Ihova emda acen.

¹⁹ Is ahaig imi atimi asega a Tevit, nup Isreel marom, eris asjapicnaig, ilpu atamaig im ilpu takata, nareto is ethi, im nuari kurimatau alupas is ethi, im nalauwo is ethi, athi um athi ehni. Ja eris par terimterim natimi um apan ara irai imnim ura asega, athi um athi ehni.

²⁰ Is adumoij a Tevit mika yi acis yi alwai nup an nimnim o un. Is apan a Maikal inhalav atahig u Saal, mika yi aubilid Tevit, um ika, Et upene eri ecen alupas vai natimarid u nup Isreel va nedo o un inpig, et mun ehvaig yin aien inpig an nuhup u ilpu atahig u ilpu aheca o un, et idivaig nedo u un tah tup intakuras, et wat ehvaig yin aien!

²¹ Is ika a Tevit ehele Maikal, Ek mun ago nedo inigki ainyak an nuhup u Ihova inig is ehtai nyak aien, jam udei etmam im ilpu eteuc iran asega, mika yi ati nyak natimarid u nup Isreel, atimi u Ihova marom: va nitai inigki ekpu cediaig ainyak an nuhup u Ihova.

²² Maiya, ekpu cediaig alupas ainyak, etpu esjilid nedo upoupo unyak iran yehki, inki eti ecen vai nyak ainyak: ja erupu ecen vai nyak a ilpu atahig iji ehki na mun aniv ra aiek.

²³ Va nedo inigki is eti asvalav a Maikal inhalav atahig u Saal, um yetpan an nadiat u inmas o un.