2 Samuel 5 - Intas Etipup

Nuarin tas alupas 5.

1 Era ahtag pan Hibron a ilpu eteuc par ati Tevit natimarid an pece Isreel. 4 Niji mesese irai Tevit. 6 Et atoraliak Saion irai up u Jibus aien um amen iran. 11 Et abraig pan atimi ehele Tevit, a Hairam. 13 Eh apos ehelen ilpu halav atamaig et eleven Jerusalem. 17 Et auud nup u Filistia a Tevit Beal-perasim, et idivaig intas o Atua, 22 um lep irai cai alupas.

¹ ERIS ahtag pan Hibron ehele Tevit a ilpu eteuc asega irai up Isreel, um tas ehelen, um ika, Ecra idim neduom aijama im lep nemihtam.

² Im lep inig, an nopan iyehki is wat atimarid unyima a Saal, as imiapan nup Isreel aiek, um imiapam ra: is um ika ehelum a Ihova, Namu aminjinaig nup Isreel atimi unyak aiek, et idivaig natimi asgi siip, namu lep atimarid ura aiek.

³ Eris ahtag pan Hibron ehele natimarid a ilpu atimi alupas u nup Isreel; is tas etipup Hibron ehele ra a Tevit natimarid an nuhup u Ihova: eris aspi Tevit ara mika vi atimarid u nup Isreel aien.

⁴ Is mesese is dirte irai Tevit, ja is atupun aien um atimarid; is atimarid aien irai mesese is forte.

⁵ Is atimarid aien Hibron irai up u Juta irai mesese is seven im inmohoc is siks: is atimarid aien Jerusalem irai up Isreel asega im nup u Juta irai mesese is dirte dri.

⁶ Is apan Jerusalem a Tevit im ilpu eucsupo o un ehele nup u Jibus, nup uran pece iyehki: eris tas ehelen ara, um ika, El et eti iknipagki ilpu atimi apat nesganimtara, im ilpu atimi isvehteuc neduora aiek, an eti apam igcaki aiek: eris aktaktai ara, um ika, Inyi eti apan eahki a Tevit.

⁷ Ja is atoraliak nimnim iyehki is ehka o un u Saion a Tevit: inmaliyum u Tevit nigki.

⁸ Is ika a Tevit an nadiat iyehki, Aien et aridjai an neucsen wai aien, um auud nup u Jibus, im ilpu atimi isvehteuc neduora, im ilpu atimi apat nesganimtara, et amcel vai ra inliinmopoi Tevit, etpu atimi alupas u ilpu eucsupo aien. Va nedo ura, nikavaig, eris ika a ilpu atimi apat nesganimtara, im ilpu atimi isvehteuc neduora, Inyi eti apam an nimnim inigki aien.

⁹ Is idim uco, is amen an nimnim iyehki is ehka o un a Tevit, um anvi nidan par ika inmaliyum u Tevit. Is actaig nathatahau a Tevit, um arehed mihtag, ahes Millo um yetpan anliin maliyum.

¹⁰ Is aridjai a Tevit, is esjilid natimi alupas o un; is atau imi yin a Ihova Atua emda acen.

¹¹ Is abra atimi a Hairam natimarid u nup u Tairus, mika eri apan ehele Tevit um aiheuc vai yin, im lep ilpu atimi ared cai, im ilpu atimi ared hat; is lep alupai yin nauicai sitar aien: eris um acta neom vai Tevit ara.

¹² Is ato a Tevit mika is ati yin natimarid u nup Isreel a Ihova, im lep mika is imiaridjai nelcau o un aien, vai ilpu atimi o un nup Isreel.

¹³ Is ahes Hibron a Tevit, ja par lucsei ilpu takata, im ilpu ehnaa o un is eche Jerusalem: eris lep apos ilpu halav atamaig ara im ilpu halav atahig is eche imi Tevit.

¹⁴ Nidai ra sji igki eris apos ra ara imi yin Jerusalem; nan, Simea, im Sobab, im Nedan, im Solomon,

¹⁵ im Ibhar, im Elisua, im Nifec, im Jafaia,

¹⁶ im Elisama, im Elaiata, im Elifelet.

¹⁷ Ja eris wat ahgei a nup u Filistia, mika eris aspi Tevit mika yi atimarid u nup Isreel, eris aridjipam a nup u Filistia asega, mika eri ahilek Tevit ara; is atahaijeg vaig a Tevit, um asuol sepan an nuarin emda.

¹⁸ Eris idim apam a nup u Filistia, um esyei ra an niskanse Rifeem.

¹⁹ Is ahodai Ihova a Tevit, um ika, Ekpu aridjipan ehele nup u Filistia ainyak, ka oʼo? Napu atcijai ra pam an nikmak aiek, ka oʼo? Is ika a Ihova ehele Tevit, Namu aridjipan aiek: ekpu idim atcijai nup u Filistia pam an nikmam ainyak.

²⁰ Is yetpan Beal-perasim a Tevit; is auud ra eahki a Tevit, um ika, Is ehlaujai ehele ilpu atimi tak atimi irak a Ihova an nuhup unyak, et idivaig nehlaujai u inwai. Va nitai inigki is aniv nidan nuarin iyehki aien par ika Beal-perasim (Nuarin nehlaujai).

²¹ Eris udei atmasimai ura eahki ara, ja is atnamud ra a Tevit im ilpu eucsupo o un.

²² Eris aketo a nup u Filistia, um aridjipam, um esyei ra an niskanse Rifeem.

²³ Is wat ahodai Ihova a Tevit, is ika aien, Jim aridjipan aiek, um ehtet ira ra; namu ahparehed aiek, um uhum ra itac, ja par aat ira ra an nahaiji cai alupas.

²⁴ Inyi uce, nau wit ahgei inmotjai! natgavaig irai cai alupas aiek, namu auroauro aiek, um ehcohos pan: etpu idim apan an nuhup unyum a Ihova, mika yi auud inpak an nedoa u nup u Filistia aien.

²⁵ Is ago a Tevit, is idivaig is asaig ehelen a Ihova; um auud nup u Filistia ahes Ciba um yetpan Ceser.