2 Samuel 4 - Intas Etipup

Nuarin tas alupas 4.

1 Et ehioehio inliinmopoi nup Isreel vai inmas u Abner, 2 erau atgei Isbosed a Beana im Rikab, um lehpam nipek o un Hibron. 9 Et ika a Tevit eri atgei rau, um atelmoi nipek u Isbosed.

¹ IS wat atahaijeg a Isbosed inhal u Saal, mika is mas a Abner Hibron, is auatialidi nikman, is um ehioehio inliinmopoi nup Isreel asega.

² Is eteuc inhalav atamaig is ethi u Jonadan inhal u Saal, ja is isvehteuc neduon aien. Is faiv inmesese iran ache, eris wat ahes Jesriil, um apan, um asuptecnaig inmas u Saal im Jonadan; is wat, leh yin a intakata aminjinaig yin, um ahapan: is wat auroauro aien um aha, is etjose a inhalav iyehki, ja is par isvehteuc neduon. Nidai inhalav iyehki Mefibosed.

³ Is amen ehele Isbosed inhal u Saal ahwat atimi alupas irai ilpu eucsupo o un is ero, nidan is ethi Beana, nidan is eche Rikab, ohwat hal u Rimmon, nup u Bierod an pece Benjamin: (eris ohuun Bierod a nup u Benjamin an nopan iyehki:

⁴ eris ahapan Citeem a nup u Bierod uhup, um amen um uhum pam an nopan inig.)

⁵ Erus apan ahwat hal u Rimmon nup u Bierod, nan, Rikab im Beana, um yetpan an neom u Isbosed, is wat emda nagesega, is asjeuc aien an tinan an nadiat adiat.

⁶ Erus apan eahki arau an nuarin juju an neom, um ika eru leh korn arau jam ahcil; erus ahcai yin arau ithan neduon ritin fifd: erus ahapan a Rikab im Beana etwan.

⁷ Erus wat apan anliin neom arau, is asjeuc an tinan aien an nuarin neom umjeg o un; erus ahcai yin arau, um atgei yin, um auud yi amud nidjinin, um lehpan nipek o un, um apan, um atga an nuarin marara an nepig asega.

⁸ Erus imiapan nipek u Isbosed ehele Tevit Hibron arau, um ika ehele natimarid, Almoi nipek u Isbosed inhal u Saal natimi tak atimi iram, aien aigki is ika aien yi atgei euc aien; et mun ara nedo o Saal im ilpu hal o un a Ihova an nadiat inig vai natimarid, natimi alupas unyak.

⁹ Is tas a Tevit ehele Rikab im Beana etwan, ohwat hal u Rimmon nup u Bierod, um ika ehele rau, Ek idim asig yi aktit intas ainyak an nuhup u Ihova, aien aigki, et mun imiatamaig nesgak an nohocred asega aien,

¹⁰ is wat asuptecnaig ehelek tah, um ika, Almoi, et mun mas a Saal; is aktaktai aien mika is aholai nyak an tas upene aien, jai kis arop iran ainyak um atgei yin Siklac; is aktaktai aien mika ki alupai yiu nimtan vai intas o un:

¹¹ inyi idim uco, erau wat atgei natimi upene et ethi anliin neom o un an tinan ahwat atimi auatatimi: ekpu idim aru inmas o un iramirau ainyak, um atipagki cautau an nobohtan.

¹² Is asaig ehele ilpu takuras o un a Tevit; eris atgei rau ara, um auud yi amud nikmarau im neduorau, um athai ijinies ithan netpen Hibron. Ja eris leh nipek u Isbosed ara, um atelmoi an netheso eris atelmoi Abner iran Hibron.