2 Samuel 3 - Intas Etipup

Nuarin tas alupas 3.

1 Era wat ago nedoa ara et auata emda a Tevit. 2 apos inhalav atamaig et siks ehelen Hibron. 6 Et wat edemda vai Isbosed a Abner, 12 ei adumoij pan aien, um leh imi Tevit. 13 Et ika a Tevit yi leh Maikal ehgan ehelen aien, ja par ecet yin. 17 Et tas ehele nup Isreel a Abner, et alaan a Tevit, um adcijai yin. 22 Et adumoij pam an nedoa a Joab, um edemda vai natimarid, um atgei Abner. 28 Et asan tas ahlaijai Joab a Tevit. 31 um imitaig Abner.

¹ ERIS ago nedoa jipe is itu a ilpu eteuc irai Saal im ilpu eteuc irai Tevit: ja is esjilid a Tevit um emda, ja eris asuol a ilpu eteuc irai Saal um auatialidi.

² Eris um apos ilpu halav atamaig imi Tevit Hibron: is apos Amnon inmeto o un a Ahinoam nup u Jesriil;

³ is apos Kileab inhal o un sekunt a Abical, is uhup aien um ehgai Nebal nup u Karmel; is apos Absalom inhal o un dirt a Meaka inhalav atahig u Talmeai, natimarid u nup u Cisur;

⁴ is apos Atonaija inhal o un ford a Hacid; is apos Sefataia inhal o un fifd a Abaital;

⁵ is apos Idream inhal o un siksd a Eda ehgai Tevit. Eris apos ra sji igki imi Tevit Hibron.

⁶ Eris wat ago nedoa jipe a ilpu eteuc irai Saal im ilpu eteuc irai Tevit, is atau emda imi ilpu eteuc irai Saal a Abner.

⁷ Is eteuc ehgai Saal is ethi, nidan Rispa, inhal u Eaia: is ika a Isbosed ehele Abner, Na a uri aiek par leh ehgai etmak ehgam?

⁸ Ja is atavaitap alupas a Abner vai intas o Isbosed, um ika, Ek idjini kuri ainyak, ka oʼo, mika na acaiji nyak aiek va nedo maumau vai intakata inigki, ek wat ati nedoa vai nup u Juta ainyak, um aiheuc vai ilpu eteuc irai etmam im ilpu etwan, im ilpu atimi ehpan iran, um eti atcijai euc pan an nikmai Tevit?

⁹ Etmu aru alupas nedo o Abner a Atua, el ek eti ago nedo inig vai Tevit ainyak, et idivaig is asig yi aktit intas a Ihova vai yin;

¹⁰ nikavaig, par atipagki nelcau ehele ilpu eteuc irai Saal, um ika yi atimarid a Tevit irai up Isreel im nup u Juta, ahes irai Tan um yetpan irai Biirsiba.

¹¹ Is ehka vai Isbosed par auud yi aijiraig intas o Abner, is idim imtitaig yin aien.

¹² Is abra atimi a Abner mika eri apan ehele Tevit vai yin, um ika, Et u di inpece? is lep ika aien, Namu asan tas etipup ehelek aiek, ekpu atau imi euc ainyak, mika eri leh imi euc a nup Isreel asega.

¹³ Is ika a Tevit, Et idim upene; ekpu asan tas etipup ehelum ainyak: ja ek ugyi euc ainyak vai nitai et ethi, nikavaig, napu eti almoi nesganimtak aiek, el et eti upyi leh pam Maikal inhalav atahig u Saal aiek, nau wit apam aiek par ateghe nyak.

¹⁴ Is abra atimi a Tevit mika eri apan ehele Isbosed inhal u Saal, um ika, Alupai nyak Maikal ehgak, kis auanimtan ainyak vai narasi uhup u nup u Filistia is wun huntret.

¹⁵ Is abra atimi a Isbosed, um atipagki yin ehele natamnyu un, Paltiel marom inhal u Lees.

¹⁶ Is ahced yin a natamnyu un, um taig; is apitac yin aien, um yetpan Bahurim. Is um ika ehelen a Abner, Adumoij aiek, um atga unyum. Is um adumoij aien.

¹⁷ Is tas a Abner ehele ilpu atimi alupas u nup Isreel, um ika, Akis ahilek vai Tevit aijaua an nopan iyehki, mika yi atimarid unyimia:

¹⁸ akumu idim ati yin aijaua an nopan inig: is mun idim tas vai Tevit a Ihova, um ika, Ekpu imiatamaig nup Isreel atimi unyak ainyak an nikmai Tevit, vai nikmai nup u Filistia, im nikmai atimi tak atimi ira ra asega.

¹⁹ Is idim uco intas o Abner ehele nup u Benjamin: is lep apan a Abner mika yi asuptecnaig aien ehele Tevit Hibron niji itai merit asega u nup Isreel, im niji itai merit u nup u Benjamin asega.

²⁰ Is um uce, is um apan a Abner ehele Tevit Hibron, eris ahced yin natimi is twente. Is auanetha alupas a Tevit incai Abner, im lep inca atimi ahced yin.

²¹ Is um ika a Abner ehele Tevit, Ekpu atidai ainyak, um apan, um asjapicnaig nup Isreel asega ehele natimarid natimi alupas unyak, mika eri asan tas etipup ehelum, im lep mika an atimarid aiek ira atimi asega, et merit vai ra inliinmopom aiek. Is adcijaig Abner a Tevit; is um apan aien an nigpa.

²² Eris idim apam a Joab im ilpu dualep u Tevit: eris mun ahau tah inpak an nedoa ara; eris imiapam niji itai is ahinag eris atoraliak an nedoa ara: ja is eti amen a Abner ehele Tevit Hibron; is idim adcijai yin aien; is um apan aien an nigpa.

²³ Eris wat apam a Joab im ilpu eucsupo o un asega, eris asuptecnaig ehele Joab hal atimi, um ika, Is apam ehele natimarid a Abner inhal u Ner; is um adcijaig yin aien; is um apau aien an nigpa.

²⁴ Is um apan a Joab ehele natimarid, um ika, Na mun ago inhe aiek? is idim ham ehelum a Abner; na a uri aiek par adcijaig yin, et mun lep atga o un aien?

²⁵ Na idim ato aiek, mika is ham a Abner inhal u Ner, mika yi ahiyek euc aien, um ato napan unyum, im napam unyum, um lep ato nedo asega inig na ago aiek.

²⁶ Is wat udei Tevit a Joab um alau ijo, is abra atimi aien, mika eri apitac Abner; eris imiadumoij yin u nehpan wai Saira ara: ja is eti ato a Tevit.

²⁷ Is wat adumoij pan Hibron a Abner, is leh yin a Joab an neucse nathatahau, mika yi echim tas ehelen, um ahcai yin ithan neduon ritin fifd, is idim mas aien, par aru inmas u Asahel etwan.

²⁸ Is wat ti pan itac nedo inig, is par atahaijeg vaig a Tevit; is ika aien, Inyi eti atijai irak, ka an nelcau unyak a Ihova irai iji mesese, inmas u Abner inhal u Ner:

²⁹ uhmu atijai irai idjini Joab, im lep irai ilpu atimi ehpan iran asega; inyi eti ti ehele ilpu eteuc irai Joab tah natimi inig et eteuc inmocop iran, ka natimi lepros, ka natimi aijisji an niseuc, ka natimi inig et eropse an nauitoga aien, ka natimi inig et ti nitai caig incan.

³⁰ Is idim uco, erus atgei Abner a Joab im Abiseai etwan, va nedo o un, nikavaig, is atgei Asahel etwarau aien an nedoa Cibea.

³¹ Is ika a Tevit ehele Joab im natimi asega eris amen ehelen, Ah-pati apelumai unyimia aijaua, um aroraijiraig caua ira apelumai uucai, um imitaig Abner. Is apitac nahat a Tevit natimarid.

³² Eris atelmoi Abner Hibron ara: is aunyauwaig a natimarid, um taig u nehpanitai u Abner; eris ehtigtaig natimi asega.

³³ Is imitaig Abner a Tevit, um ika, Is mas a Abner et idivaig nihkin natimi.

³⁴ Eris eti arore nikmam; eris eti arore neduom irai atauhat: as eropse aiek, et idivaig tah et eropse aien an nuhup u ilpu atimi auatatimi. Eris aketo natimi asega um imitaig yin.

³⁵ Eris wat apam natimi asega um imiisjis ehele Tevit, mika yi caig nitai caig aien is wat adiat, is asig yi aktit intas a Tevit, um ika, Etmu idim aru alupas nedo unyak a Ihova, el ek caig nareto ainyak, ka tah nitai, an neti fi ete nagesega.

³⁶ Eris ecetai natimi asega, is upene ira ra: is idim upene ira atimi asega nedo asega inig is ago a natimarid.

³⁷ Eris idim ato natimi asega, im lep nup Isreel asega, an nadiat iyehki, mika is eti asaig a natimarid, mika eri atgei Abner inhal u Ner.

³⁸ Is um ika a Tevit ehele ilpu aheca o un, Eka idim ato aijaua, mika et mun mas a natimi alupas et ethi im natimi esjilid an pece Isreel an nadiat inigki.

³⁹ Im lep inig, eris ati nyak mika ki atimarid ainyak, ja ek auatialidi ainyak an nadiat inigki; erau eti atahaijeg intas unyak arau ahwat hal u Seruaia: etpu aru nedo o natimi auatatimi a Ihova, et idivaig nedo has o un.