2 Samuel 24 - Intas Etipup

Nuarin tas alupas 24.

1 Et oop Tevit a Satana, va nitai inigki et imiisjis aien ehele Joab mika yi esvi atimi. 5 Era apan irai mohoc et nain im nadiat et twente a ilpu atimi alupas, um esvi ilpu eucsupo et wun milyun im dri huntret dausant (1,300,000). 10 Et wat ehvaig ehele Tevit nohocred et dri a Atua, et adumoij an liinmopon aien um ehtai inmas ira adiat et dri. 15 Era emesmas natimi et sevente dausant (70,000), ja et atapnes nauahas vaig u nup u Jerusalem va nedo upoupo o un. 18 Et auanimtan nuarin auud korn iran u Arana a Tevit, et idivaig intas o Cat ehelen; et wat ahlap niji itai ahlap eahki aien, et idim tiih inmas.

¹ IS aketo a Ihova um edemda vai nup Isreel, va nitai inig, nikavaig, is oop Tevit a Satana par auahas ra, um ika, Apan aiek, um esvi nup Isreel im nup u Juta.

² Is um ika a natimarid ehele Joab, natimi alupas u ilpu eucsupo is amen ehelen aien, Atga jipe aiek, um ahced upene iji uari pece u nup Isreel, ahes Tan, um yetpan Bier-siba, um esvi atimi asega, mika ki ato ainyak era ehed ara.

³ Is um ika a Joab ehele natimarid, Era idim ahinag natimi unyum, ja etmu ika a Ihova Atua unyum eri ahinag acen natimi, im lep inig, etmu lep almoi nahinag ira ra a natimarid natimi alupas unyak: ja et a uri a natimarid, natimi alupas unyak, um merit mika eri ago nedo inigki?

⁴ Ja is imiisjis a natimarid, um esjilid irai Joab im ilpu atimi alupas u ilpu eucsupo vai intas o un. Is ahes ehele natimarid a Joab im ilpu atimi alupas u ilpu eucsupo, um apan, mika eri esvi nup Isreel.

⁵ Eris algauwaig nofowai Jortan ara, um amen an nahaijin Aroer an matan an maliyum iyehki et eteuc juju an niblan nofowai Cat um lah pan Jesar:

⁶ ja eris yetpan Cileat ara, um lep asuol an pece Tatim-hotsai; eris lep yetpan Tan-jean ara, um ahparehed, um yetpan Saiton,

⁷ ja eris par yetpan nuarin ehka Tairus ara, im lep niji maliyum asega u nup u Haivai, im lep u nup u Kenan: ja par yetpan Bier-siba, an nahaijin pece Juta inig et ahes nuritoga iran.

⁸ Eris wat ahced upene inpece asega ara um yetpan Jerusalem, um ti pan itac inmohoc is nain, im lep adiat is twente.

⁹ Is asuptecnaig ehele natimarid nisjipicnaig nesvi atimi vaig a Joab: eris eet huntret dausant (800,000) natimi emda an pece Isreel, eris apos nij va atimi ara; eris faiv huntret dausant (500,000) natimi irai up u Juta.

¹⁰ Is esvi atimi a Tevit, ja is acaiji yin inliinmopon. Is um ika a Tevit ehele Ihova, Ek mun ago nedo has esjilid ainyak an nedo inig ek mun ago ainyak: ja ek ugyi euc ainyak, ak Ihova, mika an jim aru nedo has u naheca unyum inigki; ek mun idim ago nedo maumau alupas ainyak.

¹¹ Is wat aiji an nuhialeg a Tevit, is yetpan intas o Ihova ehele Cat naprofeta, natimi asuptecnaig intas o Atua ehele Tevit, um ika,

¹² Apan aiek, um ika ehele Tevit, Et ika a Ihova, Ek ati vai euc nitai erahki et dri ainyak; namu leh inyi ethi irai ehtaij erahki aiek, mika ki ago vai euc ainyak.

¹³ Is um apan a Cat ehele Tevit, um asaig intas inigki ehelen, um ika ehelen, Etpu yetpam ehelum numlaig has irai mesese inyi seven an pece unyum? ka an aha aiek irai mohoc inyi dri an nuhup u ilpu atimi tak atimi iram, eru wit apitac euc ara? ka inyi yetpam inmas alupas an pece unyum ira adiat inyi dri? namu idim aktaktai aiek, um asaig intas inig inki imiapan ainyak ehelen is abrai nyak aien.

¹⁴ Is um ika a Tevit ehele Cat, Et ehka alupas nitai inigki vai nyak: intumu leh nohocred inig akaija et ahes ehele Ihova; et esjilid naiheuc o un: jai inyi eti auahas nyak nikma atimi.

¹⁵ Is ati inmas alupas vai nup Isreel a Ihova ahes an nuhialeg um yetpan an nopan asaig: eris emesmas natimi is sevente dausant (70,000), ahes Tan um yetpan Bier-siba.

¹⁶ Is wat ada nikman a nagelo mika yi auahas Jerusalem, is adumoij an liinmopon a Ihova va nitai has iyehki, um ika ehele nagelo iyehki is auahas atimi aien, Et mun upene: asvahteuc nikmam aiek. Is um amen a nagelo o Ihova ubutpotet u nuarin auud korn iran u Arana nup u Jibus.

¹⁷ Is wat alum nagelo iyehki a Tevit, is atgei atimi aien, is tas aien ehele Ihova, um ika, Ek mun idim ago nedo has ainyak, im nedo maumau esjilid: ja siip iji ig, era mun ago inhe ara? ek ugyi euc ainyak mika an ada nikmam aiek vai nyak, im lep vai ilpu atimi ehpan irak.

¹⁸ Is han a Cat ehele Tevit an nadiat iyehki, um ika ehelen. Aridjai aiek, um actaig nefata vai Ihova an nuarin auud korn iran u Arana nup u Jibus.

¹⁹ Is aridjai a Tevit, is idivaig intas iyehki u Cat is asaig ehelen a Ihova.

²⁰ Is easpan a Arana, um almoi natimarid im ilpu aheca o un na-pam vaig ehelen: is aubilid natimarid a Arana, um atpuse an nuhup o un, is eropse an nesganimtan aien um yetpan an nobohtan.

²¹ Is um ika a Arana, Et mun yetpam a natimarid natimi alupas unyak ehele naheca o un inigki vanhe? Is ika a Tevit, Mika ki auanimtan ehelum nuarin auud korn iran, par actaig nefata iran vai Ihova, mika yi apijadi inmas alupas inigki ira atimi.

²² Is um ika a Arana ehele Tevit, Etmu lep leh a natimarid natimi alupas unyak, um taam ahlap irai itai iji ig et upene iran: almoi niji kurimatau va nitai ahlap atnamud, im niji itai auud korn iran, im niji itai et eche u kurimatau vai cai urin cap.

²³ Is tup ahtai imi natimarid nitai iji igki asega a Arana, tup idivaig tah natimarid. Is um ika a Arana ehele natimarid, Etmu upene inliinmopoi Ihova Atua unyum vai euc.

²⁴ Is um ika a natimarid ehele Arana, Oʼo; ja ekpu idim auanimtan ehelum irai mune ainyak: inki eti ahlap irai iji itai ahlap atnamud vai Ihova Atua unyak ainyak irai itai iji ig ek eti aua-nimtan ainyak. Is um auanimtan a Tevit nuarin auud korn iran im niji kurimatau vai sikel irai silver is fifte.

²⁵ Is um actaig nefata eahki a Tevit vai Ihova, um ahlap irai iji itai ahlap atnamud, im niji itai ahlap asa nigpa. Is idim upene inliinmopoi Ihova vai inpece; um apijadi inmas alupas iyehki irai up Isreel.