2 Samuel 22 - Intas Etipup

Nuarin tas alupas 22.

Nohranitai par imiahpas Atua va nimiatamaig emda o un, im niji itai upene et ahinag.

¹ IS asai tas iji ig an nohranitai inigki a Tevit ehele Ihova, an nadiat iyehki is imiatamaig yin a Ihova vai nikmai ilpu atimi tak atimi iran, im lep vai nikmai Saal.

² Is um ika aien, Ak Ihova, na hehteuc unyak aiek, im neom emda unyak, im natimi imialep nyak;

³ ak Atua unyak, na hehteuc unyak aiek; ek asgeig iram ainyak: nai itai ahtaipup unyak aiek, im nipat imiaras nyak unyak, im neom ijinies unyak, im nuarin ahapan iran unyak, im natimi imicoho nyak; na imiatamaig nyak aiek va nedo auahas nyak.

⁴ Kis ahlaig vai Ihova inig ainyak, eris idim ika eri imiahpas yin: eris idim imiatamaig nyak vai ilpu atimi tak atimi irak.

⁵ Eris wat arehed irak niji epeau u inmas, kis imtitaig alupas ainyak vai niji wailah ahnag u ilpu atimi auatatimi;

⁶ eris arehed irak niji wau u umaatmas; eris atapnes nyak niji itai apro itai u inmas;

⁷ kis arohwai Ihova an nohocred unyak ainyak, kis idim ahlaig vai Atua unyak ainyak: is ahgei nohrak aien an neom itap o un, is yetpan an tikgan naunyauwaig unyak.

⁸ Is omoi nobohtan, um amamai; eris ehioehio niji ededuon an nohatag, um omoi, nikavaig, is atavaitap aien.

⁹ Is ahes an mun gidjin nadran cap, um aridjai, im lep incap atnamud itai an nipjineucsen: eris atni iran incap alaume.

¹⁰ Is imiade pam nauanohatag aien, um asuol sepam; is apat ithan neduon.

¹¹ Is ateuc irai jerub aien, um ae: eris ecet yin an nehpan nimtinjap.

¹² Is imnim o un napat, um arehed iran, nikavaig, niji apat apig u inwai, im niji epig an nauanohatag.

¹³ Eris atni incap alaume an naijoran lah an nuhup o un.

¹⁴ Is munuka a Ihova an nauanohatag, eris ahgei nohrai Atua esjilid acen.

¹⁵ Is atcijaig efana aien, um imiterimterim ra; is adia an nauwainapit aien, um ahau ra.

¹⁶ Eris ecetai inta uhau an jap; is wat acaiji nededuei nobohtan a Ihova; is wat ehledowa a Nesgan an tavaitap o un, is tup lah pan o un.

¹⁷ Is abraig tah aien jipagko; is leh nyak aien; is ahyausei nyak aien irai wai is ahinag;

¹⁸ is imiatamaig nyak aien vai natimi emda inig is tak atimi irak aien, im lep vai ra sji igki eris amcel vai nyak ara: eris emda ara um esjilid irak.

¹⁹ Eris uhup irak ara an nadiat u nohocred vaig unyak: ja is iseuc unyak a Ihova par asgeig iran.

²⁰ Is imiapan nyak aien an nuarin lah: is imiaras nyak aien va naiyu u inliinmopon vai nyak.

²¹ Is aru irak a Ihova, is idivaig nedo atoh unyak: is ago nedo upene vai nyak, is idivaig nadicinadicin u nikmak.

²² Kis idim aminjinaig nedo o Ihova ainyak, um eti ago nedo has vai Atua unyak.

²³ Is idim amen intas alep asega o un an nuhup unyak: kis eti atladwi niji tas o un ainyak.

²⁴ Kis lep ago nedo atoh ainyak an nuhup o un, kis aminjinaig nyak ainyak va nedo has inig eris atijai irak.

²⁵ Va nitai inigki is aru irak a Ihova, is idivaig nedo atoh unyak; is idivaig nadicinadicin unyak an nuhup o un.

²⁶ Napu ago nedo aiheuc aiek vai ra sji igki era ago nedo aiheuc va atimi ara; napu ago nedo atoh aiek ehele ra sji igki era ago nedo atoh ara.

²⁷ Napu ago nedo upene aiek ehele ra sji igki era ago nedo upene ara; napu imiisjis aiek ehele ra sji igki era imiisjis ara.

²⁸ Napu imialep ilpu ihki atimi aiek: jai na alum ilpu atimi ijinies inliinmopora aiek, mika an imiasuol ra.

²⁹ Ak Ihova, nai cap alahala unyak aiek: etpu ago lah napat unyak a Ihova.

³⁰ Ek mun ahau inpak an nedoa ainyak vai euc: ek mun ahtalgaunyi nathatahau ainyak vai Atua unyak.

³¹ Na Atua inig aiek, et upene asega nedo o un; et adicinadicin intas o un: eti itai atapin aien ehele atimi asega era asgeig iran ara.

³² Et Atua adi? Ihova ache: et hehteuc a di? Atua unyima ache.

³³ Et athatahau unyak a Atua im nemda unyak: et lep ago upene asega nefalaig unyak aien.

³⁴ Et ago neduok aien mika yi idivaig neduei haint: um atijai nyak irai uarin ijinies unyak.

³⁵ Et esege imi nikmak aien par ago nedoa; va nitai inigki ek aiyihi inceen nefana bras ainyak au nikmak.

³⁶ As alupai nyak nitai ahtaipup an nimiaras nyak unyum aiek: ek esjilid ainyak va nedo aiheuc unyum.

³⁷ As ago alupas nuarin natga unyak; va nitai inigki is eti wohiyeliek neduok.

³⁸ Kis apitac ilpu atimi tak atimi irak ainyak, um atgei ra; kis eti adumoij pam ainyak, um yetpan an nopan iyehki kis auahas ra ainyak.

³⁹ Kis auahas ra ainyak, um auud ra; is ehka vai ra natidai vaig: maiya, eris eropse ithan neduok ara.

⁴⁰ As ahid imi nyak aiek nemda vai nedoa: as imiasuol ra sji igki aiek an nuhup unyak eris aat irak ara.

⁴¹ As lep alupai nyak nauiwai atimi tak atimi irak aiek, mika ki auahas ra sji igki ainyak era edemda vai nyak ara.

⁴² Eris eas ara, ja is eti eteuc tah par imicoho ra; eris ahlaig vai Ihova ara, ja is eti atahaijeg ra aien.

⁴³ Kis auud ra ainyak, eris haklin ara um idivaig inmah an nobohtan; kis auwihi ra ainyak, eris idivaig nosal an nefalaig ara; kis auhiopdicraig ra ainyak.

⁴⁴ As idim imicoho nyak aiek vai ehtauo o atimi unyak, as ati nyak aiek, mika ki esjilid irai up urai pece: erupu aheca unyak natimi iji ig kis eti ato ra ainyak.

⁴⁵ Erupu atahaijeg intas unyak natimi irai taka pece: eru wit ahgei ara, erupu imiaiji intas unyak ara.

⁴⁶ Erupu idim tup tiih natimi irai taka pece, erupu lep imtitaig ara irai iji uarin atpuh iran ura.

⁴⁷ Et umoh a Ihova, im lep naaurinig, et hehteuc unyak aien; etmu esjilid a Atua, et imiatamaig nyak aien, et idim hehteuc unyak aien.

⁴⁸ Atua inig marom, et eijeijei nyak aien, um imiasuol atimi vai nyak.

⁴⁹ Et imiaras nyak aien vai ilpu atimi tak atimi irak: as lep imiatidai nyak aiek ijinies ira atimi eris aat irak ara: as imicoho nyak aiek vai natimi atgei atmas.

⁵⁰ Va nitai inigki ekpu imiaphas euc ainyak, ak Ihova, au nuhup u nup urai pece, ekpu lep acesaces nohranitai va nidam ainyak.

⁵¹ Et eom ijinies aien par imiatamaig natimarid o un: um aiheuc vai yin is ati yin aien, Tevit marom, im lep ilpu mapon irai iji mesese.