2 Samuel 21 - Intas Etipup

Nuarin tas alupas 21.

1 Et eteuc numlaig has irai mesese et dri, ja era wat eijcei ilpu hal u Saal et seven ara et idim tiih. 10 Nedo aiheuc u Rispa vai ilpu atimi emesmas. 12 Et atelmoi niji eduei Saal im Jonadan a Tevit an netheso o Kis etmai Saal. 15 Era ecefor ati nedoa vai nup u Filistia ara, era atgei atimi actalactal et for natimi emda u Tevit et for, athi um athi ehni.

¹ IS eteuc numlaig has an nopan u Tevit, is eti omot irai mesese is dri; is ahodaig Ihova a Tevit. Is um ika a Ihova, Et uco vai Saal im ilpu atimi ehpan iran; eris ilpu atimi atgei atmas ara; is idim atgei nup u Cibeon aien.

² Is ahlaig vai nup u Cibeon a natimarid, um tas ehele ra; (eris eti ilpu mapoi Isreel a nup u Cibeon, ja eris ahaiji ilpu mapoi Emor ara; eris asig yi aktit intas a nup Isreel ehele ra par imiatamai ra: ja is imiisjis a Saal mika yi atgei ra, an nedo emda o un vai nup Isreel im nup u Juta.)

³ Is um ika a Tevit ehele nup u Cibeon, Inki ago inhe ainyak vai caua? inki ahlap an nev itai ahlap ainyak, mika aki asan tas acis yi alwai atimi u Ihova aijaua?

⁴ Eris ika ehelen a nup u Cibeon, Ecrupu eti lucsei silver ka colt aijama irai Saal, ka irai ilpu atimi ehpan iran; im lep inig, namu jim atgei tah natimi an pece Isreel aiek vai cama. Is ika aien, Ekpu ago vai caua ainyak nitai inig akupu asaig aijaua.

⁵ Eris um ika ara ehele natimarid, Natimi iyehki is atgei cama aien, um alwai cama mika eri auahas cama, va ecri jim amen aijama an tah anuarin an pece Isreel,

⁶ atcijai imi cama atimi et seven irai ilpu hal o un, ecrupu alcinwa ra aijama an nuhup u Ihova Cibea inmaliyum u Saal, aien aigki is ati yin a Ihova. Is um ika a natimarid, Ekpu atcijai ra ainyak.

⁷ Ja is itai vai Mefibosed a natimarid inhal u Jonadan, is hal u Saal aien, vai intas aktit jipe urau vai Ihova, nan, Tevit im Jonadan inhal u Saal.

⁸ Ja is leh Armonai im Mefibosed a natimarid, erus ohwat halav atamaig u Rispa inhalav atahig u Eaia arau, is apos rau aien imi Saal; im ilpu halav atamaig is faiv u Mirab etwai Maikal inhalav atahig u Saal, is apos ra aien imi Etriel inhal u Barsileai nup u Mihola:

⁹ is atcijai ra aien imi nup u Cibeon, eris alcinwa ra ara an nedoon iyehki an nuhup u Ihova: eris ehremesmas ara asega natimi is seven, eris atgei ra an natupun u inmeto irai ohwaiitai, an nopan eris wat atupun um eldei barle.

¹⁰ Is leh napelumai uucai a Rispa inhal u Eaia, um elgelgei vai yin an hehteuc, ahes an natupun u inmeto irai ohwaiitai, um yetpan an nopan u incopda alupas, is eti udei man aien par ateuc ira ra an nadiat, ka niji itai eklim irai pece aleg par hegai ra an nepig.

¹¹ Eris asuptecnaig ehele Tevit nedo iyehki, is ago a Rispa inhal u Eaia, im ehgai Saal.

¹² Is apan a Tevit, um lucsei niji eduei Saal im niji eduei Jonadan inhal o un irai up u Jebes-cileat, eris idim ahneg nohurau ara an tiptag Bedsan, eris eijcei rau eahki a nup u Filistia an nadiat iyehki eris atgei Saal an nedoon Cilboa a nup u Filistia;

¹³ is idim lucsei eahki niji eduei Saal im niji eduei Jonadan inhal o un aien, um imiapam ra; eris asjapicnaig niji eduei atimi iji ig ara eris alcinwa ra:

¹⁴ eris atelmoi niji eduei Saal im Jonadan inhal o un ara Sila, an pece Benjamin, an netheso u Kis etman: eris ago nedo asega inig ara is asaig ehele ra a natimarid. Ja is par apitac a Atua um atahaijeg intas ura vai inpece.

¹⁵ Im lep inig, eris aketo a nup u Filistia, um ati nedoa vai nup Isreel; is um asuol a Tevit im ilpu aheca o un ehelen, um ago nedoa vai nup u Filistia: ja is um auatialidi a Tevit.

¹⁶ Is amen eahki a Isbe-binob, is mapoi Refa (natimi emda acen) aien, is apapa pan irai dri huntret (300) sikel irai bras an mopul o un; is ahid nauitoga mat aien, is ika aien yi atgei Tevit.

¹⁷ Ja is atau imi Tevit a Abiseai inhal u Seruaia, um auud nup u Filistia iyehki um atgei yin. Eris um asig yi aktit intas ehele Tevit a ilpu dualep o un, um ika, Namu jim lep ahced cama aiek an nedoa, va eri jim ahni incap alahala u nup Isreel.

¹⁸ Is wat ti pan itac nitai inigki, eris aketo ara um ati nedoa vai nup u Filistia Cob: is um atgei Saf mapoi Refa a Sibbike nup u Husad.

¹⁹ Eris lep aketo ara um ati nedoa vai nup u Filistia Cob; is um atgei Lahumai etwai Colaiad nup u Cad a Elhenan inhal u Jeare-orecim, nup u Bedlehem, is idivaig nauincai ahod apelumai iran inceen mopul hat u natimi iyehki:

²⁰ Eris lep aketo ara um ati nedoa Cad; is eteuc tah natimi is ijinies acen aien, is lep siks nupsikman an nahaiji nikman im nahaiji nikman, um siks nupseduon an nahaiji neduon im nahaiji neduon, is twente for asega; is lep mapoi Refa aien.

²¹ Is wat imilaav nup Isreel aien, is atgei yin a Jonadan inhal u Simea etwai Tevit.

²² Eris ilpu mapoi Refa natimi iji ehki is for, is atgei ra a Tevit im ilpu aheca o un.