2 Samuel 2 - Intas Etipup

Nuarin tas alupas 2.

1 Et ika a Atua yi aridjipan Hibron a Tevit im ilpu eucsupo o un, era ati yin natimarid u ilpu mapoi Juta ara eahki. 5 Et imiahpas nup u Jebes-cileat aien va nedo aiheuc ura vai Saal. 8 Et ati Isbosed natimarid u nup Isreel a Abner. 12 Era ati nedoa a ilpu eucsupo et twelv u Abner im ilpu eucsupo et twelv u Joab um atgei jipe ra. 18 Eh atgei Asahel. 25 Vai intas o Abner et ahlai intoho a Joab mika eri adumoij pam, ara. 32 Era atelmoi Asahel ara.

¹ IS wat ti pan itac nitai inigki, is ahodaig Ihova a Tevit, um ika, Ekpu aridjipan ainyak o un tah inmaliyum u nup u Juta, ka oʼo? Is ika a Ihova ehelen, Aridjipan aiek. Is um ika a Tevit, Ekpu aridjipan eda ainyak? Is um ika aien, Alaig Hibron.

² Is um aridjipan eahki a Tevit, im ohwat ehnaa o un, nan, Ahinoam nup u Jesriil, im Abical is uhup aien um ehgai Nebal nup u Karmel.

³ Is idim imiaridjipan ilpu eucsupo o un a Tevit eris amen ehelen, ara asega im nup an nimnim ura, athi um athi ehni: eris amen ara irai iji maliyum u nup u Hibron.

⁴ Eris asjapicnaig a ilpu atamaig u nup u Juta, um aspi Tevit eahki, mika yi atimarid u nup u Juta. Eris asuptecnaig ehele Tevit ara, um ika, Eris atelmoi Saal a nup u Jebes-cileat.

⁵ Is abra atimi a Tevit mika eri apan ehele nupu Jebes-cileat; is ika aien ehele ra, Akumu ahesmoij aijaua vai Ihova, nikavaig, akis mun ago nedo aiheuc inigki aijaua vai Saal natimarid unyimia, um atelmoi yin.

⁶ Va nitai inigki etmu lep aiheuc vai caua a Ihova, um ago nedo inveijec vai caua: inki aru nedo upene unyimia ainyak, nikavaig, akis mun ago nedo inigki aijaua.

⁷ Va nitai inigki etmu emda inliinmopomia aijaua, um lep emda nikmamia: is idim mas a Saal natimi alupas unyimia; eris mun ati nyak a nup u Juta, mika ki atimarid ura.

⁸ Ja is leh Isbosed inhal u Saal a Abner inhal u Ner, natimi alupas u ilpu eucsupo o Saal, um imiapan yin Mehaneem;

⁹ um ati yin mika yi atimarid u nup u Cileat, im nup Eser, im nup u Jesriil, im nup Ifreem, im nup u Benjamin, im nup Isreel asega.

¹⁰ Is forte inmesese irai Isbosed inhal u Saal, eris wat ati yin mika yi atimarid irai up Isreel, is atimarid aien an mesese is ero. Ja eris apitac Tevit a nup u Juta.

¹¹ Is atimarid u nup u Juta a Tevit Hibron irai mesese is seven im inmohoc is siks.

¹² Ja eris ahes Mehaneem a Abner inhal u Ner, im ilpu dualep u Isbosed inhal u Saal, um yetpan Cibeon.

¹³ Eris um apan a Joab inhal u Seruaia im ilpu dualep u Tevit, um aubilid ra an netpen Cibeon: eris ateucse ara, natimi iji igki au nahaijin netpen is ethi, im natimi iji ehki an nahaijin is eche.

¹⁴ Is ika a Abner ehele Joab, Erumu atidai a ilpu takuras, um ago nedo imiacitak an nuhup ujau. Is um ika a Joab, Erumu atidai ara.

¹⁵ Eris idim atidai natimi, um algauwaig, eris esvi ra um yetpan irai twelv irai up u Benjamin, eris atimi u Isbosed inhal u Saal ara, im lep natimi is twelv irai ilpu dualep u Tevit.

¹⁶ Eris asjiraig jipe nidjinira ara asega, athi um athi ehni, um ahcai jipe ra an nahaijira irai auitoga ura; is um uce eris eropropse ara: va nitai inigki eris anvi nidan nuarin iyehki par ika, Helkad-hasurim (Nuarin nobohtan u ilpu atimi emda), et eteuc Cibeon.

¹⁷ Is alupas nedoa an nadiat iyehki; eris auatialidi a Abner im nup Isreel au nuhup u ilpu dualep u Tevit.

¹⁸ Ehtijis amen eahki ahtaij halav atamaig u Seruaia, nan, Joab, im Abiseai, im Asahel: is athut emda a Asahel, um idivaig ro aleg.

¹⁹ Is apitac Abner a Asahel; ja is eti adumoij aien an matan, ka an mauun, an nathut o un; is apitac Abner ache aien.

²⁰ Ja is alum pan itac a Abner, um ika, Na Asahel aiek, ka oʼo? Is um ika aien, Ainyak ap aigki.

²¹ Is ika ehelen a Abner, Atga pan aiek an matam ka an mauum, um arop iran tah irai ilpu takuras, um leh nij va atimi o un imtam. Ja is esjum a Asahel par adumoij pan, is idim apitac Abner aien.

²² Is aketo a Abner, um ika ehele Asahel, Atga pan aiek, um jim apitac nyak: ekpu a uri ainyak um auud se euc an nobohtan? ekpu evalum Joab etwam ainyak!

²³ Ja is imiisjis aien um eti adumoij pan: va nitai inigki is ahcai pan itac yin a Abner an nilin mopul o un ithan neduon ritin fifd, is epit an cehin inmopul; is eropse aien eahki, um mas an nuarin iyehki; ja eris aiji eahki natimi asega iji ig eris yetpan an nuarin iyehki is eropse iran a Asahel um mas.

²⁴ Ja erus lep apitac Abner a Joab im Abiseai: erus wat yetpan nedoon Ama arau, is ete nagesega ira rau, an nahaijin Caia, um ubutpotet u namasacen u Cibeon.

²⁵ Eris asjapicnaig a nup u Benjamin um apitac Abner, is tup ethi ache inpak an nedoa ura; eris aiji an lolan nedoon ara.

²⁶ Is ahlaig vai Joab a Abner, um ika, Etpu auahas atimi nedoa irai iji opan, ka oʼo? na idim ato aiek mika, uhpu ohocred an nopan apitac; napu abra atimi aiek an nahopan, mika eri adumoij pan ara, um eti apitac ilpu etwara?

²⁷ Is ika a Joab, Ek asan tas inveijec ainyak an nuhup u Atua mika, el et eti asan tas iyehki aiek, el era adumoij natimi asega, athi um athi ehni, an nuhialig, um eti lep ahau ilpu etwara.

²⁸ Is um uce, is um ahlai intoho a Joab, eris aiji natimi asega, um eti lep ahau nup Isreel, um eti lep ati nedoa vai ra.

²⁹ Eris atga a Abner im ilpu eucsupo o un an nepig iyehki asega, um ahced nuarin marara, um algaunyi Jortan, um ahced inpece Bidron asega, um yetpan Mehaneem.

³⁰ Is adumoij pan a Joab um eti lep apitac Abner: is wat asjapicnaig atimi asega aien, eris eti ecet atimi is naintiin irai ilpu dualep u Tevit, im lep Asahel.

³¹ Ja eris auud atimi is dri huntret im sikste irai up u Benjamin, im ilpu dualep u Abner, a ilpu dualep u Tevit, eris emesmas ara.

³² Eris leh pan Asahel ara, um atelmoi yin an netheso u etman Bedlehem. Eris atga a Joab im ilpu dualep o un an nepig asega, um yetpan Hibron an nathut an nadiat.