2 Samuel 19 - Intas Etipup

Nuarin tas alupas 19.

1 Et atapnes nehtigtaig u Tevit a Joab. 9 Era merit a nup Isreel par imiadumoij pam natimarid. 11 Et abraig pan hal ehele ohwat atimi ahlap a Tevit mika eru ahugni nup u Juta. 18 Eh eti aru nedo has u Simeai. 24 Et tas upene ehele Mefibosed a Tevit. 32 Et adcijai Barsileai aien, ja va Kimham inhal o un, et lep ika a Tevit yi amen an nimnim o un aien. 41 Et acaiji nup u Juta a nup Isreel va nedo ura, par echim imiadumoij pam natimarid um eti imiacaij ra.

¹ ERIS asaig ehele Joab, um ika, Et idim taig a natimarid um aunyauwaig vai Absalom.

² Eris esjilid an nedoa ara an nadiat iyehki, ja eris ehtigtaig ache natimi asega: vaig inig nikavaig, eris ahgei natimi an nadiat iyehki mika, is ohocred a natimarid vai inhal o un.

³ Eris atarere natimi, um yetpan an maliyum an nadiat iyehki; eris idivaig natimi iji ig, era atarere ara va nehcamai ura an naha ura an nedoa.

⁴ Is um adahpoi nesganimtan a natimarid; is um taig a natimarid, um ika, Awe! kaiheuc vai euc! ak inhal unyak Absalom! ak Absalom, inhal unyak, inhal unyak! awe!

⁵ Is um apan a Joab ehele natimarid anliin neom, um ika, Na mun imiehcamai nesganimtai ilpu aheca unyum asega aiek an nadiat inigki, era mun imiatamaig euc ara an nadiat inig, um lep imiatumumoh ilpu halav atamaig unyum, im ilpu halav atahig unyum, im ilpu ehnaa esga atimi unyum, im ilpu ehnaa aheca atahig unyum;

⁶ nedo unyum nigki; et aiyu inliinmopom aiek vai ilpu atimi tak atimi iram, jam acen inliinmopom aiek vai ilpu atimi atau imi euc. Na mun ika aiek inpig, na eti aktaktai ilpu atimi alupas unyum, ka ilpu takuras unyum: ek idim ato ainyak, el et umoh a Absalom, jam emesmas aijama asega inpig, el et upene inliinmopom vaig.

⁷ Va nitai inigki atidai aiek, um alau ijo, um tas upene ehele ilpu aheca unyum: ek idim asig yi aktit intas vai Ihova ainyak, el et eti alau ijo aiek, inyi eti amen ehelum tah natimi an nepig inigki: etpu has nitai inigki um esjilid irai iji itai has asega is yetpam iram an takuras unyum, um imihum pam an nopan inig.

⁸ Is um atidai a natimarid, um ateuc an neucse nathatahau; eris asaig ehele atimi asega, um ika, Et idim ateuc a natimarid an neucse nathatahau, eris apan natimi asega an nuhup u natimarid: ja eris mun ahapan a nup Isreel asega, um amen irai imnim ura, athi um athi ehni.

⁹ Eris atuh jipe ra natimi asega irai ilpu eteuc asega irai up Isreel, um ika, Is imiatamaig caija a natimarid vai ikmai ilpu atimi tak atimi iraija, maiya, is idim imiatamaig caija aien vai ikmai nup u Filistia; ja et mun udei inpece inigki aien vai Absalom.

¹⁰ Ja et mun mas an nedoa a Absalom, aien aigki intis aspi yin akaija mika yi esjilid iraija. Va nitai inigki eka a uri aijaua par eti asaig tah intas, mika eri imiadumoij pam natimarid?

¹¹ Is abra atimi a Tevit natimarid, mika eri apan ehele Setok im Abaiadar ohwat atimi ahlap, um ika, Tas ehele ilpu atimi alupas u nup u Juta aijaurau, um ika, Eka a uri aijaua par apitac ira atimi asega, par imiadumoij pam natimarid an nimnim o un? et mun yetpam intas o nup Isreel asega ehele natimarid an nuarin amen o un.

¹² Eka ilpu atimi ehpan irak aijaua; eka iji eduok aijaua im nemihtak: eka a uri aijaua par apitac ira atimi asega par imiadumoij pam natimarid?

¹³ Arumu ika ehele Amasa aijaurau, Nai idim iji eduok aiek im nemihtak; etpu aru esjilid irak a Atua, el et eti atimi alupas u ilpu eucsupo aiek, an nuhup unyak irai iji mesese par isjeupigmoig Joab.

¹⁴ Is ahidai inliinmopoi nup u Juta asega aien, et idivaig inliinmopoi natimi is ethi ache; eris imiham intas inigki ara ehele natimarid, um ika, Namu adumoij pam aiek, im ilpu aheca unyum asega.

¹⁵ Va nitai inigki is adumoij a natimarid, um yetpan Jortan. Eris yetpan Cilcal a nup u Juta, par apan, mika eri aubilid natimarid, um imialgauwaig natimarid an nofowai Jortan.

¹⁶ Is auroauro a Simeai inhal u Cira, mapoi Benjamin, nup u Bahurim, um asuol, um ahced nup u Juta, mika yi aubilid Tevit natimarid.

¹⁷ Eris ahced yin a nup u Benjamin is wun dausant (1,000), is lep ahced yin a Saiba naheca u ilpu atimi ehpan irai Saal, im ilpu halav atamaig o un is fiftiin, im ilpu aheca o un is twente ehelen; eris uhup irai natimarid ara, um algauwaig an nofowai Jortan.

¹⁸ Eris aheled a bot is ethi par aheldaig nup an nimnim u natimarid, um ago nitai inig is upene iran. Is algauwaig an nofowai Jortan a natimarid, ja is par eropse an nuhup o un a Simeai inhal u Cira;

¹⁹ um ika ehele natimarid, Ak natimi alupas unyak, namu jim atijai nedo auatatimi unyak irak aiek, um jim imiehva nedo maumau iyehki, kis ago ainyak an nadiat iyehki, is wat ahes Jerusalem a natimarid natimi alupas unyak, par aktaktai alupas vaig aiek.

²⁰ Et idim ato a naheca unyum inigki mika, kis ago nedo has ainyak: va nitai inigki ek mun uhup ainyak irai ilpu mapoi Josef asega, um ham an nadiat inigki mika ki asuol um aubilid natimarid natimi alupas unyak.

²¹ Ja is tas a Abiseai inhal u Seruaia, um ika, Eri idim atgei Simeai an nadiat inigki va nedo o un, nikavaig, is asan tas has aien ehele natimi inig eris aspi yin vai Ihova.

²² Is um ika a Tevit, Jim imiedohalav nyak aijaurau, ohwat hal u Seruaia, um jim ago nedo o atimi tak atimi irak aijaurau an nadiat inigki: eri idim eti atgei tah natimi an nadiat inigki an pece Isreel; ek idim ato ainyak mika, ek atimarid an pece Isreel ainyak an nadiat inigki.

²³ Va nitai inigki is ika a natimarid ehele Simeai, Napu eti mas aiek. Is um asig yi aktit intas ehelen a natimarid.

²⁴ Is asuol a Mefibosed mapoi Saal, mika yi aubilid natimarid aien; is um eti yecrei neduon aien, um eti yecrei numri ingeijin, um eti yiri apelumai oun, ahes an nadiat iyehki is atga o un a natimarid, um yetpan an nadiat iyehki is adumoij pam aien an nigpa.

²⁵ Is wat yetpan Jerusalem aien, mika yi aubilid natimarid, is um ika ehelen a natimarid, Ak Mefibosed, as a uri aiek par eti ahced nyak?

²⁶ Is ika aien, Ak natimarid, natimi alupas unyak, is ago nedo efaifa vai nyak a naheca unyak: is ika a naheca unyum inigki, Eri atijai satel irai togke vai nyak, mika ki ateuc iran ainyak, um apan ehele natimarid; et idim atga has a naheca unyum inigki.

²⁷ Is asan tas ahcil aien vai naheca unyum inigki ehele natimarid natimi alupas unyak; ja et idivaig nagelo o Atua a natimarid natimi alupas unyak: va nitai inigki namu ago nitai inigki aiek et upene iram.

²⁸ Eris idivaig ilpu atimi emesmas a ilpu atimi ehpan irak asega an nuhup u natimarid natimi alupas unyak: ja as ati naheca unyum inigki aiek ehele ra eris hag ara an nitai hag unyum. Va nitai inigki ek a uri ainyak par aketo, um ugyi itai ehele natimarid?

²⁹ Is um ika ehelen a natimarid, Namu jim lep tas aiek vai niji itai unyum; ek mun idim asaig ainyak, um ika, Arumu ahai nobohtan iyehki aijaurau, aiek im Saiba.

³⁰ Is um ika a Mefibosed ehele natimarid, Inyi idim leh asega aien, va nitai inig, nikavaig, et mun adumoij pam an nigpa an nimnim o un a natimarid natimi alupas unyak.

³¹ Is ahes Rocelim a Barsileai nup u Cileat, um asuol, um algauwaig an nofowai Jortan, mika yi ahced natimarid an nalgauwaig o un an nofowai Jortan.

³² Is idim efatimi a Barsileai, is eete inmesese iran: is um alayi natimarid nitai caig aien an namen o un Mehaneem; is idim atimi ikni itai aien.

³³ Is um ika a natimarid ehele Barsileai, Namu algauwaig pam ehelek aiek, ekpu alaam nitai caig unyak ainyak Jerusalem.

³⁴ Is um ika a Barsileai ehele natimarid, Inyi ipjidipjid numoh unyak, ek a uri ainyak par ahced natimarid, um apan Jerusalem?

³⁵ Et eete inmesese irak an nadiat inig: et ehka vai nyak par ato nitai upene im nitai has; et ehka vai naheca unyum inigki par ato nitai inig ek caig ainyak, im nitai inig ek umnyi ainyak; et ehka vai nyak par ahgei nohrai ilpu atamaig acesaces nohranitai, im ilpu atahig acesaces nohranitai; va nitai inigki et a uri a naheca unyum inigki par lep ehtipidai natimarid natimi alupas unyak?

³⁶ Inyi ahced natimarid a naheca unyum inigki an nahaijin Jortan eahki, jam eti elvatga: et a uri a natimarid par aru irak an neruvaig esjilid, um idivaig inigki?

³⁷ Ek ugyi euc ainyak mika yi adumoij a naheca unyum inigki, mika ki mas ainyak an maliyum unyak, eri lep atelmoi nyak an netheso u etmak im risik. Ja Kimham ap igki, naheca unyum; etmu algauwaig aien ehele natimarid, natimi alupas unyak; namu ago vai yin aiek nitai inig et upene iram.

³⁸ Is um ika a natimarid, Etpu algauwaig ehelek a Kimham; ekpu ago vai yin ainyak nitai inig etpu upene iram: ekpu lep ago vai euc ainyak nitai iji ig asega, napu ugyi nyak vaig aiek.

³⁹ Eris algauwaig an nofowai Jortan natimi asega: is wat algauwaig a natimarid, is aijumnyi Barsileai a natimarid, um asan tas acis yi alwai yin; is adumoij pan aien an nuarin pece o un.

⁴⁰ Is par yetpan Cilcal a natimarid; is ahced yin a Kimham: eris ahced natimarid a nup u Juta asega, im lep nahaiji nup Isreel.

⁴¹ Eris idim han ehele natimarid a nup Isreel asega, um ika ehele natimarid, Era a uri a ilpu etwama nup u Juta par ahneg euc? era mun imialgauwaig natimarid ara an nofowai Jortan, im nup an nimnim o un, im ilpu dualep asega u Tevit ehelen.

⁴² Eris tas a nup u Juta asega ehele nup Isreel, um ika, Va nitai inig, nikavaig, et atimi ehpan irama esjilid a natimarid: eka a uri aijaua par edemda va nitai inig? ecris idim eti hegaig nitai hegaig u natimarid aijama; is idim eti alupai cama tah nitai tup ahtai aien.

⁴³ Eris tas a nup Isreel ehele nup u Juta, um ika, Et unyima nuarin natimarid et ten; ecra ohuun alupas irai Tevit aijama, ja eka ohuun tintin yin aijaua: akis a uri aijaua par amcel vai cama, um eti uhup um leh intas unyima, vai nimiadumoij pam natimarid uja? Ja is emda intas u nup u Juta um esjilid irai tas u nup Isreel.