2 Samuel 18 - Intas Etipup

Nuarin tas alupas 18.

1 Et easpan niji pak an nedoa an natga ura a Tevit, um ated ra vai Absalom. 6 Eh auud alupas nup Isreel an nesei Ifreem. 9 Eh wat eijcei Absalom an cai alupas, et ahcai yin a Joab, era ethaigse yin an nehpanitai natimi. 18 Nuarin u Absalom. 19 Erau imiapam intas ehele Tevit a Ahimeas im Kusai. 33 Et imitaig Absalom a Tevit.

¹ IS esvi atimi iji ig a Tevit eris amen ehelen ara, um ikni vai ra ilpu atimi alupas irai iji dausant (1,000), im ilpu atimi alupas irai iji huntret (100).

² Is ahai atimi an pak an nedoa is eseij ira ra a Tevit, um ati Joab, mika yi aminjinaig inpak an nedoa is ethi aien, im Abiseai inhal u Seruaia, etwai Joab, mika yi aminjinaig inpak an nedoa is ethi aien, im Iteai nup u Cad, mika yi aminjinaig inpak an nedoa is ethi aien. Is ika a natimarid ehele atimi, Ekpu idim ahced pan caua ainyak.

³ Ja eris ika natimi, Namu jim ahced pam cama aiek: el ecra idim ahapan aijama, erupu eti aktaktai cama ara; el ecra emesmas nahaijima aijama, erupu eti aktaktai cama ara: era aktaktai ara mika an esjilid aiek ira atimi et ten dausant (10,000) irama: va nitai inigki et upene mika an atau imi cama aiek an maliyum.

⁴ Is um ika ehele ra a natimarid, Ekpu ago nedo inigki ainyak et upene iramia. Is aiji a natimarid an nahaijin neucse nathatahau; eris apan itac natimi asega irai iji huntret im lep irai iji dausant.

⁵ Is um tas a natimarid ehele Joab im Abiseai im Iteai, um ika, Aiheuc vai nyak aijautaij, um jim eriss irai intakuras iyehki, Absalom marom. Eris atahaijeg natimi asega, is wat tas a natimarid ehele ehtaij atimi alupas erahki irai ilpu eucsupo vai Absalom.

⁶ Eris apan an lelitai natimi mika eri ati nedoa vai nup Isreel: eris ago nedoa an nesei Ifreem;

⁷ eris atgei nup Isreel eahki a ilpu aheca u Tevit, is esjilid natgei atimi eahki an nadiat iyehki, eris atgei atimi is twente dausant (20,000).

⁸ Is apaahni nedoa irai iji pece asega eahki: is esjilid nesei irai ij va atimi an nadiat iyehki par auahas atimi.

⁹ Eris uhum pan Absalom a ilpu aheca u Tevit; is ateuc irai myul a Absalom; is atga ithan cai alupas is ethi aien, is ecen nidjinin an ran cai iyehki; is aijalcai aien juju an niblan nohatag im nobohtan; is atga o un myul iyehki is ateuc iran aien.

¹⁰ Is ecet yin tah natimi is ethi, um asuptecnaig ehele Joab, um ika, Ek mun idim ecet Absalom ainyak, et aijalcai aien an cai alupas.

¹¹ Is um ika a Joab ehele natimi iyehki is asuptecnaig ehelen aien, Na mun idim ecet yin aiek; na a uri aiek par eti ucjapidai yin eahki, um ethaigse yin an nobohtan? el et ago aiek, el ek alupai euc niji uari silver et ten ainyak, im lep nitai ahid et ethi.

¹² Is um ika a natimi iyehki ehele Joab, El ek lucsei niji uari silver et ten dausant (10,000) ainyak imtak, el ek eti ada nikmak ainyak vai inhal u natimarid: ecris ahgei aijama, is wat tas a natimarid ehelum im lep Abiseai im Iteai, um ika, Aminjinaig va yi jim atgei intakuras iyehki Absalom tah caua.

¹³ El ek ago ainyak nedo inigki na asaig aiek, el ek ago nedo maumau vai nyak ainyak: er eti ateri tah nitai vai natimarid; napu idim asuptecnaig nedo unyak aiek.

¹⁴ Is um ika a Joab, Et eti upene vai nyak namen vaig ehelum. Is apos mopul is eseij an nikman aien, um ahcai inriti Absalom iran, an numoh o un an niblan cai alupas.

¹⁵ Eris arehed irai Absalom a ilpu takuras is ten eris apos nij va atimi u Joab ara, um auud yin, um atgei yin.

¹⁶ Is ahlai intoho a Joab; eris adumoij pan natimi, um eti lep apitac irai up Isreel: is idim acaiji atimi a Joab.

¹⁷ Eris leh Absalom ara, um ethaigse yin an nehpanitai ubo an nesei, um ehtijiraig iran hat is ahinag acen: eris aha a nup Isreel asega, um yetpan irai imnim ura, athi um athi ehni.

¹⁸ Is wat umoh a Absalom, is actaig neom hat ijinies aien an niskanse u natimarid: is um ika aien. Et eti eteuc tah inhalav atamaig imtak, va uhpu imiehva nidak vai yiu: is anvi nidan neom ijinies iyehki aien an nilpun nidan: er anvi nidan par ika, Neom hat ijinies u Absalom, um imihum pam au nopan inig.

¹⁹ Is um ika a Ahimeas inhal u Setok, Abrai nyak aiek mika ki athut ainyak, um asuptecnaig itai ehele natimarid, nikavaig, et mun aru irai ilpu atimi tak atimi iran a Ihova.

²⁰ Is um ika ehelen a Joab, Namu jim imiapan intas aiek inpig, ja napu imiapan intas aiek an tak adiat: ja namu jim imiapan intas aiek inpig, nikavaig, et mun mas a inhal u natimarid.

²¹ Ja is par ika a Joab ehele Kusai, Apan aiek, um asuptecnaig ehele natimarid nitai iji igki na mun ecetai aiek. Is atpuse an nuhup u Joab a Kusai, um athut.

²² Is aketo a Ahimeas inhal u Setok, um ika ehele Joab, Er uauo, namu lep idim abrai nyak aiek, mika ki athut ainyak, um apitac Kusai. Is ika a Joab, Napu athut aiek vanhe, ak inhal unyak, et ti intas ehelum par asuptecnaig?

²³ Is ika aien, Er uauo, abrai nyak, mika ki tup athut ainyak. Is ika ehelen aien, Athut aiek. Is um athut a Ahimeas an nefalaig an nuarin marara, um ahtaregdei Kusai.

²⁴ Is um ateuc a Tevit an niblan tapnes is ero u neucse nathatahau: is aridjipan an lolan nathatahau a natimi eas vai itai ijinies an neucse nathatahau, um anani nesganimtan, um eas pan, um ecet natimi is ethi, is echim athut aien.

²⁵ Is tas ijinies a natimi eas vai itai, um asuptecnaig ehele natimarid. Is um ika a natimarid, El et echim apam aien, el et imiham intas aien. Is athut emda aien, um apam ubutpotet.

²⁶ Is um ecet natimi is eche a natimi eas vai itai, is athut aien: is um ahlaig ehele natimi aminjinaig intapnes a natimi eas vai itai, um ika, Et idim echim athut pam a natimi et eche. Is um ika a natimarid, Et lep imiham intas aien.

²⁷ Is um ika a natimi eas vai itai, Ek almoi nathut u natimi uhup ainyak, mika et idivaig nathut u Ahimeas inhal u Setok. Is um ika a natimarid, Et atimi upene aien, um imiham intas upene.

²⁸ Is um tas ijinies a Ahimeas, um ika, Inta esjilid akaija. Is um atpuse aien, um yetpan an nobohtan, an nuhup u natimarid, um ika, Naaurinig vai Ihova Atua unyum, et mun atapnes ira atimi iji ig aien eris mun ada nikmara ara vai natimarid natimi alupas unyak.

²⁹ Is um ika a natimarid, Et umoh a intakuras iyehki, Absalom marom, ka oʼo? Is um ika a Ahimeas, Is wat abrai naheca u natimarid is ethi a Joab, im lep nyak naheca unyum, kis ecetai nasjapicnaig alupas ainyak, jam eti ato vai nasjapicnaig ura.

³⁰ Is um ika ehelen a natimarid, Ahidaig euc aiek, um aiji igcaki. Is um ahidai yin aien, um aiji.

³¹ Is idim ham a Kusai; is um ika a Kusai, Ak natimarid, natimi alupas unyak, Ek imiham intas ainyak: et mun imiatamaig euc a Ihova an nadiat inig vai nikmai atimi asega iji ig eris aat iram ara.

³² Is um ika a natimarid ehele Kusai, Et umoh a intakuras iyehki, Absalom marom, ka oʼo? Is um ika a Kusai, Ak natimarid, natimi alupas unyak, erumu idivaig intakuras iyehki a ilpu atimi tak atimi iram, im natimi asega era ika ara eri auahas euc ara.

³³ Is um eucjeucjeucaij a natimarid, um aridjipan an nuarin neom ijinies irai neucse nathatahau um taig: is wat atga aien; is uce nasaig o un, Awe! kaiheuc vai euc, ak inhal unyak Absalom, ak inhal unyak, ak Absalom inhal unyak! et idim upene irak mika, kis mas ainyak vai euc, ak Absalom inhal unyak, inhal unyak! awe!