2 Samuel 17 - Intas Etipup

Nuarin tas alupas 17.

1 Et auahas intas o Ahidofel a Huseai, et idivaig is anacanac a Atua. 15 Era abraig pan atimi ara par asuptecnaig ehele Tevit, jam adenaig. 23 Et eijcei yin a Ahidofel. 25 Eh ati Amasa mika yi atimi alupas. 27 Era alayi Tevit niji itai hegaig ara Mehaneem.

¹ IS um ika a Ahidofel ehele Absalom, Namu ika aiek, ki ehtai ilpu eucsupo et twelv dausant (12,000) ainyak, um atidai, um ahau Tevit an nepig inigki:

² ekpu uhum pan yin ainyak, etu wit auatialidi aien, um arici, etpu imtitaig aien vaig: erupu aha natimi asega ehelen; ekpu atgei natimarid ache ainyak:

³ ekpu imiadumoij pam atimi asega ehelum ainyak: nau wit at-gei natimi inaico aiek, et ethi ache aien, erupu adumoij pam natimi asega: eri idim amen igpa natimi asega.

⁴ Is upene intas inigki irai Absalom, im lep irai ilpu atimi alupas asega u nup Isreel.

⁵ Is um ika a Absalom, Lep ahlaig vai Huseai nup Arkai, mika ti lep atahaijeg intas o un.

⁶ Is wat apan ehele Absalom a Huseai, is um ika ehele Huseai a Absalom, Et idim uco intas o Ahidofel: intumu ago nedo inig akaija et asaig aien, ka oʼo? el et upene nedo et eche; asuptecnaig aiek.

⁷ Is um ika a Huseai ehele Absalom, Et eti upene vaig an nopan inig intas inigki et mun asaig a Ahidofel.

⁸ Is lep ika a Huseai, Nai idim ato etmam aiek, im ilpu dualep o un, nikavaig, era ilpu atimi emda ara; et acen inliinmopora ara, um idivaig beer aleg an lelitai eris atoraliak ilpu hal o un: et lep eucsupo a etmam; inyi eti amen ehele atimi aien.

⁹ Et idim atpuh aien an nopan inig an tah nehpanitai, ka an tah anuarin: el era atgei hal ira atimi unyum, an natupun u nedoa, el era asaig natimi asega eri ahgei vaig, um ika, Eh mun atgei ahaiji atimi era apitac Absalom ara.

¹⁰ Va nitai inigki etpu idim auatialidi inliinmopoi natimi inig et emda aien, um idivaig inliinmopoi laion inliinmopon: era ato a nup Isreel asega, mika et atimi emda a etmam, era lep atimi emda natimi iji ig era amen ehelen ara.

¹¹ Va nitai inigki, ek ika ainyak, eri asjapicnaig pam ehelum a nup Isreel asega, ahes Tan um yetpan Bier-siba, era ahinag ara, um idivaig nauanavig an nomunjap; namu lep apan aiek u nedoa.

¹² Intupu uhum pan yin akaija an tah anuarin inig uhpu ecet yin iran, um ataluopni yin, et idivaig et adahpoi nobohtan nopoigmul: inyi eti amen aien im lep tah ira atimi asega era amen ehelen ara.

¹³ Ka, el et amen aien an tah inmaliyum, uhpu abrai nup Isreel asega mika eri lucsei jaula, um ahiaig pan inmaliyum iyehki an nofowai, um eti udei inhat haklin yi ethi ache eahki.

¹⁴ Is um ika a Absalom, im ilpu atimi alupas asega u nup Isreel, Et esjilid intas o Huseai nup Arkai, irai tas o Ahidofel. Is um ika a Ihova eri atladwi intas arapakau u Ahidofel, va etpu auahas Absalom a Ihova.

¹⁵ Is um ika a Huseai ehele Setok im Abaiadar ohwat atimi ahlap, Et idim uco intas o Ahidofel ehele Absalom im ilpu atimi alupas u nup Isreel; ja et lep uce intas unyak.

¹⁶ Va nitai inigki arumu auroauro aijaurau, um imiabrai Tevit, um ika, Jim amen an nepig inigki an nuarin marara an namasacen, jam auroauro, um algauwaig an nofowai Jortan; va eri jim auahas natimarid im atimi asega ehelen.

¹⁷ Erus amen Enrocel a Jonadan im Ahimeas; is ehka vai rau napanvaig an maliyum, va eri jim ecet rau: ja is apan tah naheca atahig, um asuptecnaig ehele rau; erus par apan arau, um imiabrai Tevit natimarid.

¹⁸ Ja is ecet rau tah intakuras, um asuptecnaig ehele Absalom: ja erus auroauro arau um atga um yetpan an neom u natimi is ethi Bahurim, is eteuc nehpanwai an nimnim o un; erus asuol eahki arau.

¹⁹ Is um leh nap umjeg a intakata, um ahled ijinies an nehpanwai, um ahumiaig pakinne iran eris irara; eris eti ato nitai inig va nago iyehki iran.

²⁰ Eris wat yetpan an nimnim ehele intakata iyehki a ilpu aheca u Absalom, eris ika ara, Ahimeas im Jonadan yek eda? Is ika a intakata ehele ra, Erau mun algauwaig an wai arau. Eris wat ahilek rau ara, jam eti ecet rau, eris adumoij pam Jerusalem ara.

²¹ Eris atga ura ara, ja erus par ahes an nehpanwai iyehki arau, um aridjai, um han, um asuptecnaig ehele Tevit, natimarid, um ika ehele Tevit, Atidai aiek, um auroauro, um algauwaig an nofowai: et idim uco intas o Ahidofel vai euc.

²² Is um atidai a Tevit im natimi asega iji igki eris amen ehelen ara, um algauwaig an nofowai Jortan: is wat lahlah an tak apnyin, is eti eteuc tah is eti algauwaig irai Jortan aien.

²³ Is wat almoi a Ahidofel mika, eris eti atahaijeg intas o un ara, is atijai satel irai togke o un aien, um atga o un, um yetpan an nimnim o un u inmaliyum o un, um asuptecnaig irai itai o un, um eijcei yin, um mas; eris um atelmoi yin an netheso u etman.

²⁴ Is yetpan Mehaneem a Tevit. Is algauwaig an nofowai Jortan a Absalom: eris ahced yin a nup Isreel asega.

²⁵ Is ati Amasa a Absalom, mika yi isjeupigmoig Joab aien, um atimi alupas u ilpu eucsupo asega: Amasa eap igki, is hal o un tah nup Isreel aien, nidan Jider: is leh Abigal inhal u Nehas ehgan aien, is etwai Seruaia a Abigal, is risi Joab a Seruaia.

²⁶ Eris amen a nup Isreel ehele Absalom an pece Cileat.

²⁷ Is wat yetpan Mehaneem a Tevit, is ham ehelen a Soba inhal u Nehas, is ahes Raba inmaliyum u nup Amon aien, im Mekir inhal u Amiel nup u Lotebar, im Barsileai nup u Cileat u Rocelim;

²⁸ ehtijis lucsei pan ahtaij niji itai ahled, im niji besin, im niji ipjiitai, im hwiit, im barle, im flaur, im pakinne eris ahen, im nariko, im pi, im nariko eris ahen,

²⁹ im hune, im butter, im siip, im jiis u nide kurimatau, incai Tevit, im lep atimi iji ig eris amen ehelen ara: eris um ika ara, Era ehtele ra natimi, um arici, um lep ahvig nitai umnyi, an natga ura an namasacen.