2 Samuel 16 - Intas Etipup

Nuarin tas alupas 16.

1 Et leh umai natimi alupas o un a Saiba, vai niji itai tup ahtai o un im intas ahcil o un. 5 Et asan tas ahlaijaig Tevit a Simeai Bahurim. 9 Et ago nedo eti auatiemda a Tevit, um atapnes atimi va eri jim aru nedo iyehki. 15 Et tas updak a Huseai, et ahodaig yin a Absalom. 20 Intas o Ahidofel.

¹ IS ahtaregdei tintin lolan nedoon a Tevit, ja is aubilid yin a Saiba, naheca u Mefibosed; is ero togke ehelen, eris atijai satel ira rau, erus apos arau niji areto is tu huntret im nigai vaine mese is wun huntret, im nigai ateg is wun huntret, im nide vaine an hubej is ethi.

² Is um ika a natimarid ehele Saiba, Nitai uri ji igki? Is um ika a Saiba, Er ati togke eraigko vai ilpu atimi an nimnim u natimarid, mika eri ateuc ira rau; im nareto, im nigai ateg incai ilpu takuras unyum; im nide vaine luma atimi iji ig era auatialidi ara an namasacen.

³ Is um ika a natimarid, Inhal u natimi alupas unyum yek eda? Is um ika a Saiba ehele natimarid, Et idim amen Jerusalem aien: is idim ika aien. Erupu atcijaig nelcau u etpok imi nyak inpig a nup Isreel:

⁴ Is um ika a natimarid ehele Saiba, Et idim unyum nitai asega iji ig is ohuun a Mefibosed. Is um ika a Saiba, Ek idim ugyi euc ainyak mika yi upene inliinmopom aiek vai nyak, ak natimarid natimi alupas unyak.

⁵ Is wat yetpan Bahurim a Tevit natimarid, is idim ehcohos pan tah irai ilpu atimi ehpan irai Saal, nidan Simeai, inhal u Cira: is ehcohos pan aien, um asan tas has an natga o un.

⁶ Is um asji Tevit irai hat aien, im lep ilpu aheca asega u Tevit natimarid: eris amen natimi asega im ilpu eucsupo asega an matan im lep an mauun.

⁷ Is um uce intas has u Simeai, Atga unyum aiek, atga unyum aiek, ak natimi atgei atmas, um atimi auatatimi:

⁸ et aru iram a Ihova inmas u ilpu atimi ehpan irai Saal asega, na isjeupigmoig yin aiek, um atimarid; et mun atcijaig nelcau unyum a Ihova pan irai Absalom inhal unyum: eh num idim arop iram an nedo has unyum, nikavaig, na atimi atgei atmas aiek.

⁹ Is um ika a Abiseai inhal u Seruaia ehele natimarid, Et a uri a kuri mas inigki par asan tas has ehele natimarid natimi alupas unyak? el et abrai nyak aiek, el et upene irak, par apan um auud yi amud nidjinin.

¹⁰ Is um ika a natimarid, Jim imiedohalav nyak aijaurau, ak ohwat hal u Seruaia; etmu uce intas has o un, el et abrai yin a Ihova mika yi asan tas has ehele Tevit, etpu asaig a di, um ika, Na a uri aiek par ago nitai inigki?

¹¹ Is lep ika a Tevit ehele Abiseai im ilpu aheca o un asega, Almoi, el et asan mas unyak a inhal unyak, kis apos yin ainyak, jim imiali aijaua, el et asan tas has ehelek a nup u Benjamin inigki: udei yin mika yi asan tas has; et mun abrai yin a Ihova.

¹² Kit etpu aiheuc vai nyak a Ihova va nohocred unyak; kit etpu aru irak an nedo upene a Ihova vai intas has o un an nadiat inigki.

¹³ Is wat atga an nefalaig a Tevit im ilpu eucsupo o un, is atga a Simeai an nahaijin nedoon an nuhup o un, um asan tas has an natga o un, um asji yin irai hat, um ehrin ma.

¹⁴ Is yetpan Ifem a natimarid, im ilpu atimi asega eris ahced yin ara, um atumop eahki um hag.

¹⁵ IS yetpan Jerusalem a Absalom im ilpu atimi asega, nup Isreel marom; is lep ahced yin a Ahidofel.

¹⁶ Is wat yetpan ehele Absalom a Huseai nup Arkai, natimi atau imi Tevit, is ika a Huseai ehele Absalom, Etmu umoh a natimarid yi itu iran! etmu umoh a natimarid yi itu iran!

¹⁷ Is um ika a Absalom ehele Huseai, Naiheuc unyum nigki va napa unyum, ka oʼo? na a uri aiek par eti ahced napa unyum?

¹⁸ Is um ika a Huseai ehele Absalom, Oʼo; jai natimi inig et ati yin a Ihova, im ilpu atimi iji igki, im nup Isreel asega, ekpu aheca o un ainyak, ekpu lep amen ehelen ainyak.

¹⁹ Im lep inig, ekpu aheca u di ainyak? ekpu idim aheca ainyak an nuhup u inhal o un: kis aheca ainyak an nuhup u etmam, et idim uco, ekpu aheca ainyak an nuhup unyum.

²⁰ Is um ika a Absalom ehele Ahidofel, Akumu tas jipe aijaua, um asuptecnaig nedo inig intupu ago akaija.

²¹ Is um ika a Ahidofel ehele Absalom, Apan aiek um amen ehele ilpu ehnaa u etmam, et mun udei ra aien, mika eri aminjinaig nimnim o un; erupu ato a nup Isreel asega mika, et amcel vai euc a etmam: va nitai inigki etpu emda nikma atimi asega iji ig era amen ehelum ara.

²² Eris ago neom apelumai ara vai Absalom an lolan neom; is apan a Absalom, um amen ehele ilpu ehnaa u etman an nuhup u nup Isreel asega.

²³ Is esjilid intas u Ahidofel, is wat tas aien an nopan iyehki, um idivaig intas u Atua, is wat ahodaig Atua tah natimi: is um uce intas asega u Ahidofel ehele Tevit, im lep ehele Absalom.