2 Samuel 15 - Intas Etipup

Nuarin tas alupas 15.

1 Et aiyu inliinmopoi nup Isreel vai Absalom vai intas updak o un im nedo aiheuc o un. 7 Et ika aien et eteuc intas upyi asaig o un, va nitai inigki et atcijaig yin a etman mika yi apan Hibron aien. 10 Et asan tas alwai alupas eahki aien. 13 Et wat atahaijeg intas vaig a Tevit et ahapan Jerusalem aien. 19 Et esjum a Iteai par udei yin. 24 Et ika a Tevit ehele Setok im Abaiadar eru imiadumoij pan nelcau itap arau. 30 Et aridjipan nedoon Olivet a Tevit im niji ira atimi o un um ehtigtaig. 31 Et asan tas ahlaijaig aien vai intas o Ahidofel. 32 Et esege imi Huseai aien um ika yi adumoij pan aien.

¹ IS wat ti pan itac nitai iji igki, is lucsei niji jariot a Absalom, im niji hors, im lep ilpu takuras is fifte mika eri athut ara, um uhup iran.

² Is aiji an nuhihialeg a Absalom au nahaijin nefalaig an neucse nathatahau: is wat imiisjisitai tah natimi iran tah, um apan ehele natimarid mika yi tas alep vaig, is um ahlaig vai yin a Absalom, um ika, Nai up eda aiek? Is ika aien, Ak natimi alupas, ek up an tah an nuarin pece u nup Isreel ainyak.

³ Is um ika ehelen a Absalom, Ahnoi aiek, mika yi idim atoh um upene nedo unyum vaig nitai inig; ja is eti ati tah natimi a natimarid, mika yi atahaijeg intas unyum.

⁴ Is lep ika a Absalom, El eh ati nyak mika ki tas alep an pece ingki ainyak, el era ham ehelek natimi asega iji ig et eteuc nimiisjisitai ura, el ek asan tas alep atoh vai ra ainyak!

⁵ Is wat yetpan ehelen tah, mika yi atpuse an nuhup o un, is ada nikman aien, um asjiraig yin, um aijumnyi yin.

⁶ Is ago nedo inigki a Absalom ehele nup Isreel asega iji ig eris ham ara ehele natimarid, mika yi tas alep aien vai ra: is um ehneg inliinmopoi nup Isreel a Absalom.

⁷ Is wat ti pan itac inmesese is for, is ika a Absalom ehele natimarid, Ek ugyi euc ainyak, mika ki apan Hibron ainyak, um ehneijid intas upyi asaig unyak ehele Ihova.

⁸ Is idim asan tas upyi asaig a naheca unyum inigki, an namen unyak Cisur, an pece Siria, um ika, El et lep imiapam nyak Jerusalem a Ihova, ekpu aheca u Ihova ainyak.

⁹ Is um ika ehelen a natimarid, Apan aiek an nigpa. Is um atidai aien, um apau Hibron.

¹⁰ Ja is abra atimi ahilek itai jam adenaig a Absalom, mika eri apan irai iji uari pece u nup Isreel asega, um ika, Aku wit ahgei nohran toho aijaua, akumu ika aijaua, Et atimarid Hibron a Absalom.

¹¹ Eris ahes Jerusalem natimi eris imiacaij ra is tu huntret, um ahced Absalom; eris apan ara, jam eti aktaktai, um eti ato tah nitai ara,

¹² Is asaig a Absalom mika yi apan ehelen a Ahidofel nup u Cailo, natimi atau imi Tevit, is wat ahlap irai iji itai ahlap aien an maliyum o un Cailo. Is emda intas alwai; eris leh imi Absalom natimi is ahinag.

¹³ Is ham ehele Tevit a natimi is ethi eris abrai yin, um ika, Et apitac Absalom inliinmopoi nup Isreel.

¹⁴ Is um ika a Tevit ehele ilpu aheca o un asega eris amen ehelen ara Jerusalem, Ti atidai akaija, um ahapan; mika ti imicoho caija akaija vai Absalom: fi auroauro, um apan, va yi jim auroauro aien, um uhum pam caija, um auahas caija, um auud nup an maliyum an nedoa.

¹⁵ Eris um ika ehele natimarid a ilpu aheca o un, Era idim amatata a ilpu aheca unyum iji igki nago vaig nitai iji igki asega, etpu asaig a natimarid natimi alupas unyima.

¹⁶ Is um apan itac a natimarid; eris apitac yin a nup an nimnim o un asega. Is udei ilpu takata is ten ache a natimarid, ilpu ehnaa o un, mika eri aminjinaig nimnim o un ara.

¹⁷ Is idim apan itac a natimarid, im natimi asega ehelen, um atumop an nimnim o un tah itac acen.

¹⁸ Eris ehratga ehelen a ilpu aheca o un asega; eris atga an nuhup u natimarid a nup u Kired, im nup u Piled, im lep nup u Cad, ilpu eucsupo is siks huntret (600) eris ahes Cad ara um ahced yin.

¹⁹ Is um ika a natimarid ehele Iteai nup u Cad, Na a uri aiek par ahced cama? namu adumoij pan aiek an nuarin amen iran unyum, um amen ehele natimarid mat: na idim atimi an taka pece aiek, um lep ohna.

²⁰ As apam ianiv ache aiek; et ehka vai nyak par abrai euc mika an ahced cama irai iji uarin an natga unyima; ek eti ato natga unyak ainyak; adumoij pan aiek, um imiadumoij ilpu etwam ehelum: etmu lep amen ehelum naiheuc im ninveijec.

²¹ Is um tas a Iteai ehele natimarid, um ika, Ek asig yi aktit intas unyak ainyak an nuhup u Ihova, im lep an nuhup u natimarid natimi alupas unyak, mika, etpu idim amen a naheca unyum inigki irai uari iji igki asega, etpu amen iran a natimarid natimi alupas unyak; el et umoh aiek, ka el et mas aiek, ekpu idim amen ehelum ainyak.

²² Is um ika a Tevit ehele Iteai, Namu uhup aiek um algauwaig. Is um algauwaig a Iteai nup u Cad, im ilpu eucsupo o un asega, im ilpu halav asega eris ahced yin ara.

²³ Eris wat algauwaig natimi asega, eris taig alupas a nup uran pece iyehki asega: is um algauwaig an wai Kitron a natimarid, eris lep algauwaig natimi asega, ubutpotet an nefalaig iyehki is yetpan an namasacen.

²⁴ Is lep ham a Setok, eris lep ahced yin a ilpu mapoi Livai asega, eris apos nelcau u intas etipup u Atua ara: eris atise nelcau u Atua ara; is aridjai a Abaiadar, um yetpan u nahes ehni u atimi asega an maliyum, im nalgauwaig ura.

²⁵ Is um ika a natimarid ehele Setok, Imiadumoij pan nelcau u Atua an maliyum aiek: el et upene nesganimtai Ihova vai nyak, etpu imiadumoij pam nyak aien, um ika, ki almoi nelcau o un im neom o un ainyak:

²⁶ ja el et ika aien, Ek eti merit vai euc ainyak; ainyak ap aigki, etmu ago vai nyak aien et idivaig nedo inig et upene iran.

²⁷ Is lep ika a natimarid ehele Setok natimi ahlap iyehki, Na idim atimi alum itai aiek: adumoij pan aiek an maliyum an nigpa, aiek im lep ohwat halav atamaig unyum, nau, Ahimeas inhal unyum, im Jonadan inhal u Abaiadar.

²⁸ Almoi aiek, ekpu amen ainyak irai uari marara an namasacen, um aitgaig intas unyum par asuptecnaig ehelek.

²⁹ Va nitai inigki erus imiadumoij pan nelcau u Atua Jerusalem a Setok im Abaiadar: erus um amen eahki arau.

³⁰ Is aridjipan a Tevit an nefalaig aridjai an nedoon Olivet; is taig aien an naridjipan o un; is adahpoi nidjinin aien, um eti atohwaig nedoon irai su: eris um adahpoi nidjinira natimi asega eris ahced yin ara; eris um aridjipan ara; eris um taig ara an naridjipan ura.

³¹ Is asaig ehele Tevit, tah, um ika, Et ethi irai ilpu atimi alwai euc a Ahidofel, et atau imi Absalom aien. Is um ika a Tevit, Ak Ihova, ek ugyi euc ainyak, mika an ika aiek yi takitai intas o Ahidofel.

³² Is wat eliaujai lolan nedoon a Tevit, is alaigaheni vai Atua eahki aien, ja is par ehtet iran a Huseai nup Arkai; eris ahpati napelumai itac o un, is amen nobohtan an nidjinin:

³³ is um ika ehelen a Tevit, El et ahced nyak aiek, an ehtipidai nyak aiek:

³⁴ ja el et adumoij pan an maliyum aiek, um ika ehele Absalom, Ekpu aheca unyum ainyak, ak natimarid; kis upyi aheca u etmam ainyak; ekpu lep aheca unyum ainyak an nopan inig: napu idim auahas intas o Ahidofel vai nyak aiek.

³⁵ Erau idim amen ehelum a Setok im Abaiadar, ohwat, atimi ahlap: inyi idim uco, intas iji igki asega napu ahgei aiek an nimnim u natimarid, namu asuptecnaig aiek ehele Setok im Abaiadar ohwat atimi ahlap.

³⁶ Erau amen ehele rau eahki ahwat halav atamaig urau, nan, Ahimeas inhal u Setok, im Jonadan inhal u Abaiadar; erumu imiabrai nyak arau niji tas asega aki ahgei aijaua.

³⁷ Is adumoij pan an maliyum a Huseai, natimi atau imi Tevit; is yetpan Jerusalem a Absalom.