2 Samuel 14 - Intas Etipup

Nuarin tas alupas 14.

1 Et abraig pan tah Tekoa a Joab, par leh imi yin intakata et ethi et mas a natamnyu un, et esege imi yin aien par asan tas ecsipece ehele natimarid, mika yi merit an liinmopon aien par imiadumoij pam ehelen Absalom, et lep imiapam yin Jerusalem, a Joab. 25 Neklim upene u Absalom, numri nidjinin, ilpu hal o un. 28 Et wat ti pan itac inmesese et ero, et imiapam Absalom a Joab an nuhup u natimarid.

¹ IS ato a Joab inhal u Seruaia, mika is apol irai Absalom inliinmopoi natimarid.

² Is abraig tah a Joab, mika yi apan Tekoa, um leh eahki intakata arapakau is ethi; is um ika a Joab ehele intakata iyehki, Ek ugyi euc ainyak, mika an idivaig intakata taigtaig aiek, um idim aso euc ira apelumai vai intaigtaig, um jim aspi euc an narakei; jam idivaig intakata et taigtaig aien va atimi emesmas, um itu iran:

³ um apam ehele natimarid, um asan tas iji igki ehelen. Is asaig aktit intas ehelen a Joab.

⁴ Is wat tas a intakata Tekoa ehele natimarid, is atpuse aien um eropse an nobohtan an nesganimtan, um ika, Ak natimarid, atau imi nyak aiek.

⁵ Is um ika ehelen a natimarid, Na a uri aiek? Is um ika aien, Ek idim takata tup amen ainyak, et mun mas a natamnyu unyak.

⁶ Is ero inhalav atamaig u naheca atahig unyum inigki; erus ehtauo jipe arau an lelitai; is ti tah par atapnes rau: ja is auud is ethi tah rau, um atgei yin.

⁷ Va nitai inigki era mun atidai a ilpu atimi ehpan irak asega vai naheca atahig unyum inigki; era mun ika ara, Atcijai yin is atgei etwan aien, mika ecri atgei yin aijama vai inmas u etwan is atgei yin aien; ecrupu atgei natimi isjeupigmoig etman marom aijama: va nedo inigki eri ahni inmehlin cap unyak inig et eled ara, um eti udei ehele natamnyu unyak tah nidan, ka tah natimi isjeupigmoig yin an nobohtan.

⁸ Is ika a natimarid ehele intakata iyehki, Apan an nimnim unyum aiek, ekpu tas alep vai euc ainyak.

⁹ Is ika a intakata Tekoa iyehki ehele natimarid, Ak natimarid, natimi alupas unyak, Uhmu atijai nimtan nedo has irak, im lep irai ilpu eteuc irai etmak: jai uhmu jim atijai nimtan nedo has irai natimarid im ilpu hal o un.

¹⁰ Is ika a natimarid, El et asaig tah intas ehelum tah natimi, namu imiapam yin ehelek aiek; etpu eti lep ago tah nitai vai euc aien.

¹¹ Is ika aien, Ak natimarid, ek ugyi euc ainyak, mika an imiehva Ihova Atua unyum aiek, um atapnes ilpu atimi aru natgei atmas, um ika eri jim lep aru, va eri jim atgei inhal unyak. Is ika aien, Ek asig yi aktit intas unyak ainyak an nuhup u Ihova, mika eri eti auahas tah numri nidjini inhal unyum.

¹² Is ika a intakata, Ak natimarid, natimi alupas unyak, ek ugyi euc ainyak, mika ki asaig intas et ethi ache ehelum ainyak naheca atahig unyum inigki. Is ika aien, Asaig aiek.

¹³ Is ika a intakata, Na a uri aiek par auaaktaktai nitai inigki va atimi u Atua? et ated yin a natimarid wat asan tas iji igki, va nedo o un, nikavaig, et eti imiadumoij pam inhal o un eris ahlo yin a natimarid.

¹⁴ Eris idim ika intupu emesmas akaija, um idivaig inwai er atladwi an nobohtan, et ehka par lep asjapicnaig; et tup ethi ache inliinmopoi Atua va atimi asega: ja et aktaktai aien mika yi imiadumoij pam ehelen natimi o un inig eris ahlo yin.

¹⁵ Ek mun ham ainyak, mika ki asan tas inigki ehele natimarid natimi alupas unyak, nikavaig, ek imtitaig atimi ainyak: is ika a naheca atahig unyum inigki, Ekpu idim tas ehele natimarid ainyak; kit etpu ago nitai inig a natimarid, etpu ugyi yin vaig a naheca atahig o un inigki.

¹⁶ Etpu idim atahaijeg a natimarid, mika yi imiatamaig naheca atahig o un inigki, vai nikmai natimi inig et ika aien yi auahas nyak, im lep inhal unyak, va uhpu eti amen an pece u Atua.

¹⁷ Is um ika a naheca atahig unyum inigki, Etpu idim upene intas u natimarid natimi alupas unyak: et idivaig nagelo u Atua a natimarid natimi alupas unyak, par ato nedo upene im nedo has: etpu idim amen ehelum a Ihova Atua unyum.

¹⁸ Is tas a natimarid ehele intakata iyehki, um ika, Namu jim ateri aiek vai nyak nitai inig ekpu ahodaig euc vaig ainyak. Is um ika a intakata, Ak natimarid, natimi alupas unyak, namu idim tas aiek.

¹⁹ Is um ika a natimarid, Et mun atau imi euc a Joab an nitai inigki asega, ka oʼo? Is tas a intakata, um ika, Ek asig aktit intas unyak ainyak an nuhup unyum, ak natimarid, natimi alupas unyak, et ehka vaig tah par imiacal tah intas vai tah intas inig et mun asaig a natimarid natimi alupas unyak: is idim abrai nyak a Joab naheca unyum: is lep asaig aktit intas iji igki asega aien ehele naheca atahig unyum inigki:

²⁰ et mun ago nitai inigki a Joab naheca unyum, mika eri tas ecsipece et idivaig inigki: ja et arapakau a natimi alupas unyak, um idivaig nagelo o Atua, par ato niji itai asega an nobohtan.

²¹ Is um ika a natimarid ehele Joab, Ek mun atahaijeg intas inigki ainyak: namu idim apan aiek, um imiadumoij pam intakuras iyehki Absalom.

²² Is eropse an nobohtan an nesganimtan a Joab, um ago nedo ecen, um naaurinig vai natimarid: is ika a Joab, Et idim ato a naheca unyum inigki an nadiat inigki, mika an aiheuc vai nyak aiek, ak natimarid, natimi alupas unyak, nikavaig, et mun atahaijeg intas o naheca o un inigki a natimarid.

²³ Is um atidai a Joab, um yetpan Cisur, um imiadumoij pam Absalom Jerusalem.

²⁴ Is um ika a natimarid, Etmu apan an neom o un aien; inyi eti almoi nesganimtak aien. Is um apan an neom o un a Absalom, um eti almoi nesganimtai natimarid.

²⁵ Is eklim upene nesganimtai Absalom; eris eti imiahpas tah an pece Isreel, um idivaig yin: is eti eteuc tah nuarin has iran, ahes an nidjinin um yetpan an neduon.

²⁶ Is wat ucsei numri nidjinin aien, (is ucsei aien irai iji mesese: is ehtipidai yin numri nidjinin, va nitai inigki is ucsei aien:) is asjaaicnaig numri nidjinin aien, is tu huntret sikel an nitai asjaacnaig u natimarid nopoc iran.

²⁷ Eris um apos imi Absalom ehtaij halav atamaig is eseij, im inhalav atahig is ethi, nidan Temar: is takata eklim upene nesganimtan aien.

²⁸ Is um amen Jerusalem an mesese is ero a Absalom, jam eti almoi nesganimtai natimarid.

²⁹ Va nitai inigki is abraig pan tah ehele Joab aien par ugyi yin mika yi apan ehelen a Joab; is ika aien yi abrai yin par apan ehele natimarid; ja is esjum a Joab napan vaig ehelen: is aketo aien um ugyi yin, ja is lep esjum aien napan vaig ehelen.

³⁰ Va nitai inigki is ika aien ehele ilpu takuras o un, Almoi, et ubutpotet pan umak umai Joab, et lelahapol barle o un eahki; apan aijaua, um ahli. Eris um ahli lelahapol u Joab a ilpu takuras u Absalom.

³¹ Is um atidai a Joab, um apan ehele Absalom, an neom o un, um ika ehelen, Era a uri a ilpu takuras unyum par ahli lelahapol unyak?

³² Is um ika a Absalom ehele Joab, Kis idim abraig pan tah ehelum ainyak, um ika, Apam igcaki aiek, mika ki abrai euc ainyak par apan ehele natimarid, par ika, Kis udei Cisur ainyak, um apani igcaki vanhe? el ekis amen eahki ainyak um uhum pam, el et upene irak: va nitai inigki eri asaig mika ki almoi nesganimtai natimarid ainyak; el et eteuc tah nedo has irak, etmu atgei nyak aien.

³³ Is um apan a Joab ehele natimarid, um asuptecnaig ehelen: is wat imiacaij Absalom aien, is apan ehele natimarid aien, um atpuse, um eropse an nobohtan an nesganimtan an nuhup u natimarid: is aijumnyi Absalom a natimarid.