2 Samuel 13 - Intas Etipup

Nuarin tas alupas 13.

1 Et aiyu inliinmopon va Temar a Amnon, et atahaijeg intas o Jonatab aien um ika et emehe aien, um auahas Temar. 15 Et amcel vai Temar aien, um imialau ijo yin mika yi ehcamai aien. 19 Et leh yin an nimnim o un a Absalom, ja et adenaig naktaktai o un aien. 23 Era wat ucsei siip o un ara, et atgei Amnon aien irai ilpu halav atamaig u natimarid. 30 Et wat atahaijeg intas vaig a Tevit et taigtaig aien, ja et ago eropse yin a Jonatab. 37 Et ahapan ehele Talmeai an pece Cisur a Absalom.

¹ IS wat ti pan itac nitai iji igki, is aiyu inliinmopoi Amnon inhalav atamaig u Tevit vai natahig irai Absalom, inhalav atamaig u Tevit, nidai natahig iyehki Temar; is eklim upene nesganimtan aien.

² Is ohocred alupas a Amnon, ja is par emehe aien vai Temar natahig iran; is atahig a Temar um tup amen; is aktaktai a Amnon etpu ehka vai yin par ago tah nitai vai yin.

³ Is eteuc ehele Amnon napa o un is ethi, nidan Jonatab, inhal u Simea, etwai Tevit: is esjilid a Jonatab va nanaclelen o un.

⁴ Is um ika aien ehelen, Et echamecha, nai hal u natimarid aiek, ja et erek nohum aiek irai iji adiat? namu asuptecnaig ehelek aiek. Is um ika ehelen a Amnon, Et aiyu inliinmopok ainyak vai Temar, natahig irai Absalom etwak.

⁵ Is um ika ehelen a Jonatab, Namu asjeucse an tinam aiek, um ika nai emehe aiek: etu wit apam a etmam par ateghe euc, namu ika ehelen aiek, Aiheuc vai nyak aiek, um abrai Temar natahig irak, mika yi ham aien, um alaak nitai caig, um ahen nitai caig an nuhup unyak, mika ki almoi nitai caig ainyak um leh iran, um caig.

⁶ Is asjeucse a Amnon, um ika is emehe aien: is wat ham a natimarid par ateghe yin, is ika a Amnon ehele natimarid, Namu aiheuc vai nyak aiek, um abrai Temar natahig irak, mika yi ham aien, um ago tup eseij hakli keek an nuhup unyak, mika ki leh iran ainyak, um caig.

⁷ Is abraig tah a Tevit, mika yi apan ehele Temar an neom o un, um ika, Namu apan aiek an nimnim u Amnon natamaig iram, um ago nitai caig incan.

⁸ Is um apan an nimnim u Amnon natamaig iran a Temar; is um asjeuc a Amnon. Is um leh flaur a Temar, um aplamod, um ago hakli keek an nuhup o un; is um ahen keek iji ehki aien.

⁹ Is leh pane aien um atladwi niji keek an nuhup o un; ja is esjum aien incaigvaig. Is um ika a Amnon, Eri alau ijo natimi asega, um udei nyak. Eris um alau ijo natimi asega, um udei yin.

¹⁰ Is um ika a Amnon ehele Temar, Lehpam nitai caig aiek anliin neom umjeg, mika ki leh iram ainyak, um caig. Is lucsei keek iji ig a Temar is mun ago aien, um imiapan anliin neom umjeg ehele Amnon natamaig iran.

¹¹ Is wat imiapan niji keek ehelen aien mika yi caig, is arop iran aien, um ika ehelen, Apam aiek, um amen ehelek, ak natahig irak.

¹² Ja is um ika ehelen aien, Oʼo, ak natamaig irak, jim auahas nyak aiek; et itap nedo inigki an pece Isreel: jim ago nedo ahnag inigki aiek.

¹³ Im lep ainyak marom, inki evatipagki nehcamai unyak ainyak? im lep aiek, napu idivaig tah aiek irai ilpu ihki atimi an pece Isreel. Va nitai inigki ek ugyi euc ainyak, mika an tas ehele natimarid aiek; inyi idim eti imiaaij nyak aien vai euc.

¹⁴ Ja is esjum aien par atahaijeg intas o un: is auatialidi a Temar va nemda o un, is idim imiisjis iran a Amnon, um auahas yin.

¹⁵ Ja is par acen alupas inliinmopoi Amnon vai yin; is esjilid nacen u inliinmopon vai yin irai nupyi aiyu u inliinmopon vai yin. Is um ika a Amnon ehelen, Atidai aiek, um atga unyum.

¹⁶ Is um ika a Temar ehelen, Na a uri aiek? et esjilid nedo has inigki par abraig pan nyak, iran yehki na mun upyi ago vai nyak aiek. Ja is esjum aien par atahaijeg vai yin.

¹⁷ Ja is par ahlaig vai naheca o un is aminjinaig yin aien, um ika, Imialau ijo nat naico aiek, mika yi udei nyak, um ago ipjin intapnes vai yin.

¹⁸ Is amen irai Temar napelumai agedaged: eris idim aso ira apelumai iji igki ilpu halav atahig u natimarid an natahig ura. Is imialau ijo yin a naheca o un, um ago ipjin intapnes vai yin.

¹⁹ Is um atijai nohpa an nipek o un a Temar, um ahpati napelumai agedaged iyehki, is aso yin iran aien, um atijai nikman au nipek o un, um atga taig.

²⁰ Is um ika ehelen a Absalom natamaig iran, Et mun idim amen ehelum a Amnon natamaig iram; ja namu eucsup aiek, ak natahig irak: et atamaig iram aien; jim aktaktai nitai inigki aiek. Is idim uco is tup amen a Temar an nimnim u Absalom natamaig iran.

²¹ Is wat atahaijeg nitai iji igki a Tevit natimarid, is edemda alupas aien.

²² Ja is eti asaig tah intas upene ka tah intas has ehele Amnon a Absalom: is acen inliinmopoi Absalom vai Amnon, nikavaig, is auahas Temar natahig iran aien.

²³ Is wat ti pan itac inmesese is ero, eris ucsei nalau irai siip u Absalom natimi Beal-hesor, ubutpotet pan u Ifreem: is imiacaij ilpu halav atamaig asega u natimarid a Absalom.

²⁴ Is apan a Absalom ehele natimarid, um ika, Ak natimarid, era idim ucsei nalau irai siip unyak natimi; namu apam ehele naheca unyum inigki aiek, im ilpu aheca unyum.

²⁵ Is um ika a natimarid ehele Absalom, Oʼo, ak inhal unyak, ecrumu jim apam aijama asega an nopan inig, va ecri jim ehtipidai euc. Is imiisjisitai ehelen aien: ja is eti apan aien, jam acis yi alwai yin aien.

²⁶ Is um ika a Absalom, El et eti apam aiek, namu idim abrai Amnon etwak aiek, mika yi ahced cama aien, Is um ika ehelen a natimarid, Etpu a uri aien par ahced euc?

²⁷ Ja is imiisjisitai alupas ehelen a Absalom; va nitai inigki is abrai Amnon im ilpu halav atamaig asega o un a natimarid, mika eri ahced yin.

²⁸ Is mun asaig a Absalom ehele ilpu takuras o un, um ika, Aminjinaig upene aijaua, etu wit imiacitak inliinmopoi Amnon vai waina; etu wit ika ainyak ehelemia, Auud Amnon; akumu atgei yin aijaua, um jim imtitaig: ek mun idim abrai caua ainyak; akumu emda aijaua, um idivaig ilpu eucsupo.

²⁹ Eris ago vai Amnon a ilpu takuras u Absalom, is idivaig is abrai ra a Absalom. Eris um atidai a ilpu halav atamaig asega u natimarid, um aridjai irai myul ura, athi um athi ehni, um aha.

³⁰ Eris wat atga an nefalaig ara, is yetpan ehele Tevit tah intas; eris ika, Et mun atgei ilpu halav atamaig asega u natimarid a Absalom, et eti umoh tah ra.

³¹ Is atidai a natimarid, um ahpati napelumai o un, um asjeuc an nobohtan; eris aiji ehelen a ilpu aheca o un asega, eris ahpati napelumai ura.

³² Is tas a Jonatab, inhal u Simea etwai Tevit, um ika, Ak natimi alupas unyak, namu jim aktaktai aiek, mika eris mun atgei ilpu takuras asega, ilpu hal u natimarid marom; et mun mas a Amnon ache: eris ago nitai inigki vai, intas alep u Absalom, is anaclelen iran aien an nopan iyehki, is wat auahas Temar natahig iran aien.

³³ Va nitai inigki, ak natimarid natimi alupas unyak, namu jim aktaktai alupas nitai inig aiek, um ika, era mun emesmas a ilpu hal asega u natimarid: et mun mas a Amnon ache.

³⁴ Is aha a Absalom. Is easpan a intakuras iyehki is eas vai itai aien, um almoi, um ecet atimi is ahinag eris apam ara an cehin, an nefalaig an nahaijin nedoon.

³⁵ Is um ika a Jonatab ehele natimarid, Almoi, era ham a ilpu hal u natimarid: et um uce et idivaig intas o naheca unyum inigki.

³⁶ Is wat tas ehni aien, eris idim ham a ilpu hal u natimarid, um aunyauwaig, um taig: is lep taig a natimarid im ilpu aheca o un asega.

³⁷ Ja is aha a Absalom, um apan ehele Talmeai, inhal u Amihut, natimarid u nup u Cisur. Is imitaig inhal o un a Tevit irai iji adiat.

³⁸ Is idim aha a Absalom, um apan Cisur, um amen eahki irai mesese is dri.

³⁹ Is merit alupas vai Absalom a Tevit natimarid: is eropse inliinmopon aien Vai Amnon vai inmas o un.