2 Samuel 12 - Intas Etipup

Nuarin tas alupas 12.

1 Intas ecsipece u Nedan vai inhakli siip atahig, et almaijidjid nedo o un vaig a Tevit. 7 Et acaiji Tevit a Nedan, et asuptecnaig nedo has o un a Tevit, ja eh ohpodohpod. 15 Et wat umoh a inhal u Tevit, et imitaig yin aien um alaigaheni vai yin. 24 Eh apos Solomon, um anvi nidan Jetitaia. 26 Et atoraliak Raba a Tevit, um auoh ohocred atimi iran.

¹ IS abrai Nedan a Ihova, mika yi apan ehele Tevit. Is apan ehelen aien, um ika ehelen, Is ero natimi an maliyum is ethi; is atimi ikni itai is ethi, um atimi ihki natimi is ethi.

² Is ahinag acen kurimatau, im siip, um nanin, u natimi ikni itai:

³ ja is ti tah nitai u natimi ihki natimi, inhakli siip atahig is ethi ache, is auanimtan aien, um alacan nitai hegaig: is ehramen ehelen siip iyehki, im lep ehele ilpu hal o un, um alupas; um caig nitai hegaig o un, um asipiaig nitai umnyi o un: um asjeuc an ritin, um tup idivaig inhalav atahig o un.

⁴ Is ham ehele natimi ikni itai iyehki a natimi atga an nefalaig is ethi, ja is imiaaij siip o un, im nanin o um, im kurimatau o un aien, par ahen va natimi atga an nefalaig iyehki is ham ehelen aien; ja is leh inhakli siip u natimi ihki natimi iyehki aien, um ahen va natimi iyehki is ham ehelen aien.

⁵ Is ere alupas intavaitap u Tevit va natimi iyehki; is um ika aien ehele Nedan, Ek asig yi aktit intas unyak ainyak an nuhup u Ihova mika, inyi mas a natimi inig et mun ago nitai inigki aien:

⁶ etmu lep ecefor aru inhakli siip aien, nikavaig, is ago nedo inigki aien; is um tup ti naiheuc o un.

⁷ Is um ika a Nedan ehele Tevit, Na atimi iyehki aiek. Et idim ika a Ihova Atua u nup Isreel, Kis mun ati euc ainyak mika an atimarid u nup Isreel, um imiatamaig euc vai nikmai Saal;

⁸ um alupai euc nimnim u natimi alupas unyum, im ilpu ehnaa u natimi alupas unyum an ritim: kis alupai euc nup Isreel im nup u Juta ainyak; ja el is eti elpat nitai iji igki, el ek lep alupai euc hal itai im hal itai ainyak.

⁹ Na mun imipalea intas alep u Ihova aiek vanhe, um ago nedo has an nuhup o un? as atgei Uraia nup u Hed aiek an nauitoga, um leh ehgan mika yi ehgam; as atgei yin aiek an nauitoga u nup Amon.

¹⁰ Va nitai inigki inyi idim eti udei ilpu hal unyum nauitoga irai iji mesese; va nedo unyum, nikavaig, as mun amcel vai nyak aiek, um leh ehgai Uraia nup u Hed mika yi ehgam.

¹¹ Et idim ika a Ihova, Ekpu ika ainyak, yi ahes an nimnim unyum niji itai has vai euc; ekpu lucsei ilpu ehnaa unyum ainyak an nuhup unyum, um alupai natimi tak atimi iram, etpu amen ehele ilpu ehnaa unyum aien an nuhup u nagesega inigki.

¹² As ago nedo inigki aiek, jam adenaig: ja ekpu ago nitai inigki ainyak an nuhup u nup Isreel asega, im lep an nuhup u nagesega.

¹³ Is ika a Tevit ehele Nedan, Ek mun ago nedo has vai Ihova ainyak. Is um ika a Nedan ehele Tevit, Et mun atipagki nedo has unyum a Ihova; an eti mas aiek.

¹⁴ Ja, nikavaig, as ika aiek va nedo unyum inigki eri asan tas ahlaijaig a ilpu atimi tak atimi irai Ihova, inyi idim mas a inhalav inigki eris apos imi euc.

¹⁵ Is um apan an nimnim o un a Nedan. Is um auud a Ihova inhalav iyehki is apos yin imi Tevit a ehgai Uraia, is alupas nemehe o un.

¹⁶ Is ugyi Atua a Tevit, vai inhalav; is atwakam a Tevit, um apan anliin neom, um asjeuc an nobohtan an nepig asega.

¹⁷ Eris atidai a ilpu atimi alupas an nimnim o un, um apan ehelen, mika eri imiatidai yin an nobohtan: ja is esjum aien, um eti caig tah nitai caig ehele ra.

¹⁸ Ja is wat adiat sevend, is mas a inhalav; ja eris imtitaig a ilpu aheca u Tevit par asuptecnaig ehelen mika is mas a inhalav: eris um ika ara, Is wat umoh a inhalav, intis idim tas ehelen akaija, ja is esjum aien par atahaijeg intas uja: etpu ohocred alupas aien, el eta asuptecnaig ehelen akaija mika et mun mas a inhalav.

¹⁹ Ja is wat almoi a Tevit mika eris tas upoupo a ilpu aheca o un, is aktaktai a Tevit mika is mas a inhalav: va nitai inigki is ika a Tevit ehele ilpu aheca o un, Et mun mas a inhalav, ka oʼo? Eris ika ara, Et idim mas aien.

²⁰ Is um atidai a Tevit, um eti lep asjeuc an nobohtan; is um ereuc aien, um aspi yin, um aso yin ira apelumai is eche, um apan an neom u Ihova, um alaigaheni: ja is par apan an neom o un aien; is wat ugyi ra aien, eris ati nitai caig an nuhup o un ara, is um hag aien.

²¹ Eris ika ehelen a ilpu aheca o un, Et echamecha nedo unyum aiek? is wat umoh a inhalav, as atwakam aiek, um taig vai yin; ja et wat mas a inhalav, na mun atidai aiek, um hag nitai caig.

²² Is ika aien, Is wat umoh a inhalav, kis mun atwakam ainyak, um taig: kis mun ika ainyak, Et ato a di, kit etpu aiheuc vai nyak a Ihova, um ika, Etmu umoh a inhalav?

²³ Ja et mun mas aien, ek a uri ainyak par atwakam? et ehka vai nyak par imiadumoij pam yin ehelek; ekpu apan ehelen ainyak, ja inyi idim eti apam ehelek aien.

²⁴ Is ago eropse inliinmopoi Bad-siba ehgan a Tevit; is amen ehelen aien, um asjeuc ehelen: is um apos inhalav atamaig aien, is anvi nidan a Tevit par ika Solomon (Igpa): is aiyu inliinmopoi Ihova vai yin.

²⁵ Is asaig aien irai Nedan naprofeta; is um anvi nidan aien vai Ihova par ika Jetitaia (Et aiyu inliinmopoi Ihova vai yin).

²⁶ Is ago nedoa a Joab vai Raba u nup Amon, um atoraliak inmaliyum u natimarid ura.

²⁷ Is abra atimi a Joab, mika eri apan ehele Tevit, is um ika aien, Ek mun ago nedoa vai Raba ainyak, um atoraliak inmaliyum inig et amen niji wai iran.

²⁸ Va nitai inigki namu asjapicnaig ilpu eucsupo iji ig aiek era eled ara, um arehed an maliyum, um atoraliak: vai ki jim atoraliak ainyak, ja eri asaig nidak pan iran ara.

²⁹ Is um asjapicnaig ilpu eucsupo asega a Tevit, um apan Raba, um ati nedoa vaig, um atoraliak.

³⁰ Is atipagki korona u natimarid ura an nidjinin aien, is talent is ethi irai colt nopoc iran, is eteuc iran niji hat esjilid: eris atijai an nidjini Tevit. Is imiapan itac niji itai eris atoraliak an nedoa an maliyum aien, is alupas acen.

³¹ Is lep imiapan itac atimi iji ig aien eris amen iran ara; is ikni ra aien ithan itai ucsei cai, im niji hat atineijin, im niji pas, um ika eri atga an neom inig er ahen brik iran: is idim ago nedo inig aien ehele nup urai iji maliyum asega u nup Amon. Jais par apitac a Tevit um adumoij pan Jerusalem, aien im lep ilpu eucsupo o un asega.