2 Samuel 11 - Intas Etipup

Nuarin tas alupas 11.

1 Et wat imiarehed inmaliyum Raba a Joab um ati nedoa iran, et ago ingeijid ehele Bad-siba a Tevit. 6 Et imiapam Uraia a Tevit mika yi adahpoi ingeijid o un, ja et esjum a Uraia par apan an neom o un wat ahnag vai kava im lep wat eti ahnag. 14 Et imiapan imi Joab aien nitaasviitai vai inmas o un. 18 Et abraig pan atimi a Joab mika eri apan ara um asuptecnaig ehele Tevit vaig. 26 Et leh Bad-siba a Tevit ehgan.

¹ IS wat mesese,-nopan marom vai ilpu atimarid par ago nedoa, is abrai Joab a Tevit, im ilpu aheca a un eris amen ehelen, im nup Isreel asega; eris auahas nup Amon ara, um arehed irai Raba. Ja is amen Jerusalem a Tevit.

² Ja an jupki is ethi, is atidai a Tevit an tinan, um eklim edo an lolan neom u natimarid: is easpan an lolan neom aien, um almoi intakata is ethi, is ereuc aien; is idim eklim upene nesganimtai intakata iyehki.

³ Is abraig tah a Tevit, mika yi ahodaig intakata iyehki. Is um ika tah is ethi, Idim Bad-siba nigki, inhal u Elaiam, im ehgai Uraia nup u Hed.

⁴ Is abra atimi a Tevit, mika eri imiapam yin ehelen; is wat apam ehelen a intakata iyehki, is amen ehelen a Tevit; is wat yiri yin va nitap o un, is adumoij pan an nimnim o un aien.

⁵ Is um opoc a intakata iyehki, um abraig tah mika yi asuptecnaig ehele Tevit, um ika, Ek idim opoc ainyak.

⁶ Is imiabrai Joab a Tevit, um ika, Abrai Uraia nup u Hed aiek, mika yi apam ehelek aien. Is um abrai Uraia a Joab mika yi apan ehele Tevit aien.

⁷ Is wat apan ehelen a Uraia, is ahodai yin a Tevit va namen u Joab, im namen u ilpu eucsupo, im namen u nedoa.

⁸ Is ika a Tevit ehele Uraia, Asuol aiek an nimnim unyum um yiri neduom. Is ahes an neom u natimarid a Uraia um alau ijo, eris imiapitac yin incet itai hegaig u natimarid incan.

⁹ Ja is asjeuc a Uraia an neucse neom u natimarid ehele ilpu aheca asega u natimi alupas o un, jam eti asuol an nimnim o un.

¹⁰ Eris wat asaig ehele Tevit ara, um ika, Is eti asuol an nimnim o un a Uraia, is ika a Tevit ehele Uraia, Is opra nefalaig unyum, na a uri aiek par eti asuol an nimnim unyum aiek?

¹¹ Is ika a Uraia ehele Tevit, Et amen irai iyum uriicai nelcau itap, im nup Isreel, im nup u Juta; et amen an lelitai a Joab natimi alupas unyak, im ilpu aheca u natimi alupas unyak; et idim ehka vai nyak napanvaig an nimnim unyak, um hag, um umwig, um amen ehele ehgak; ek asig yi aktit intas unyak ainyak an nuhup unyum, inki eti ago nitai inigki ainyak.

¹² Is ika a Tevit ehele Uraia, Namu lep amen igcaki aiek inpig, ekpu adcijai euc imraig ainyak. Is idim amen Jerusalem a Uraia an nadiat iyehki, im lep an nadiat is ethi.

¹³ Is wat imiacaij yin a Tevit, is hag aien um umwig an nuhup o un; is luman waina a Tevit, ja is par ahnag a Uraia vaig: is wat epig, is apan aien um asjeuc an tinan ehele ilpu aheca u natimi alupas o un, ja is eti asuol aien an nimnim o un.

¹⁴ Is wat lahlah an tak apnyin, is aged nitaasviitai a Tevit imi Joab, um alupai Uraia, mika yi apos aien.

¹⁵ Is aged aien an nitaasviitai iyehki, um ika, Ati Uraia aiek an nuarin inig et alupas acen nedoa iran, um udei yin, mika eri atgei yin.

¹⁶ Is wat easpan inmaliyum iyehki a Joab, is asaig ehele Uraia aien nuarin iyehki, is ato aien mika eris amen iran a ilpu atimi emda.

¹⁷ Eris apan itac a nup an maliyum, um ati nedoa vai Joab: eris atgei hal nai ilpu aheca u Tevit; islep mas a Uraia nup u Hed.

¹⁸ Is abraig tah a Joab, mika yi asuptecnaig ehele Tevit niji itai asega an nedoa;

¹⁹ u in asaig ehele natimi eris abrai yin, um ika, Nau wit asuptecnaig ehni aiek ehele natimarid niji itai an nedoa,

²⁰ el et edemda alupas a natimarid, um ika ehelum, Akis a uri aijaua par apan ubutpotet acen u inmaliyum, akis wat ati nedoa aijaua? akis idim ato aijaua mika eri aiji natimi an nathatahau, um asji caua?

²¹ is atgei Abimelek inhal u Jerub-beal a di? is idim asji yin an nuarin hat irara flaur a intakata amen an nathatahau: is mas Dibes aien: akis a uri aijaua par apan ubutpotet u nathatahau? namu ika aiek, Et mun mas a Uraia nup u Hed naheca unyum.

²² Is atga o un a natimi eris abrai yin, um yetpan ehele Tevit, um asuptecnaig nitai asega iji ig is abraig yin vaig a Joab.

²³ Is ika ehele Tevit a natimi iyehki, Et idim inveijec, eris emda natimi iji ehki, um apan itac ehelema an lelitai, um esjilid irama: ja ecris ahau ra aijama, um yetpan au neucse nathatahau.

²⁴ Ja eris asji ilpu aheca unyum a ilpu atimi amen an nathatahau; eris emesmas hal irai ilpu aheca u natimarid, et um mas a Uraia nup u Hed naheca unyum.

²⁵ Is ika a Tevit ehele natimi iyehki, Etmu idim uco intas unyum ehele Joab, Namu jim ohocred aiek va nitai inigki, er auahas tup atimi an nedoa, im lep ilpu atimi alupas: ago emda nedoa unyum aiek vai inmaliyum, um alcapdicraig: im lep inig, ago emda inliinmopoi Joab aiek.

²⁶ Is wat atahaijeg a ehgai Uraia, mika is mas a Uraia natamnyu un, is imitaig natamnyu un aien.

²⁷ Is wat ti pan itac intaig o un, is abra atimi a Tevit mika eri imiapan yin an nimnim o un: is ehgan aien, um apos inhalav atamaig imi yin. Ja is has an nuhup u Ihova nitai inig is mun ago a Tevit.