2 Samuel 10 - Intas Etipup

Nuarin tas alupas 10.

1 Et abraig pan ilpu aheca o un a Tevit mika eri apan ara um ago eropse Henun inhal u Nehas, ja era ago nedo maumau vai ra a nup Amon. 6 Era atau imi nup Amon a nup u Siria, ja erau esjilid ira ra asega an nedoa a Joab im Abiseai. 15 Et lep asjapicnaig nup u Siria Hilam a Sobak, et atgei yin a Tevit.

¹ IS wat ti pan itac nitai iji igki, is mas a natimarid u nup Amon: is um isjeupigmoig yin a Henun inhal o un, um atimarid.

² Is um ika a Tevit, Ekpu aiheuc vai Henun inhal u Nehas ainyak, et idivaig is aiheuc vai nyak a etman. Is abrai ilpu aheca o un a Tevit, mika eri aiheuc vai yin vai etman. Eris yetpan an pece u nup Amon a ilpu aheca u Tevit.

³ Eris um ika a ilpu atimi alupas u nup Amon ehele Henun natimarid ura, Jim aktaktai aiek mika, et abra atimi a Tevit mika yi ecen vai etmam aien, um aiheuc vai euc; ja et mun abrai ilpu aheca o un a Tevit ehelum, mika eri adpau an maliyum inig, um ato itai, ja par auahas.

⁴ Va nitai inigki is lucsei ilpu aheca u Tevit a Henun, um ucsei nahaiji numri ingeijira, um aldei apelumai opra ura juju, an wauahid ura, um adcijai ra.

⁵ Eris wat asuptecnaig ehele Tevit, is abra atimi aien mika eri aubilid ra; eris idim ehcamai alupas natimi iji ehki: is um ika ehele ra aien, Amen Jeriko aijaua an nopan inig, ja par apitac etu wit heto ingeijimia, akumu adumoij pam aijaua.

⁶ Eris wat almoi a nup Amon mika, eris idivaig nitai epiv ara an nuhup u Tevit, eris abra atimi a nup Amon, um auarimtai ilpu eucsupo u nup u Siria au pece Bed-rihob, im nup u Siria an pece Soba, is twente dausant (20,000), im ilpu eucsupo u Meaka natimarid is wun dausant (1,000), im ilpu eucsupo u nup u Tob is twelv dausant (12,000).

⁷ Is wat ato vaig a Tevit, is abrai Joab im ilpu eucsupo esjilid o un asega aien, mika eri apan ara.

⁸ Eris apan itac a nup Amon, um esyei ra va nedoa an neucse nathatahau: eris echim amen au nuarin is ethi a nup u Siria an pece Soba, im Rihob, im Tob, im lep u Meaka.

⁹ Is wat almoi a Joab mika is eteuc nemda u nedoa an nuhup o un, im lep an cehin, is ehtai atimi irai ilpu eucsupo esjilid asega irai up Isreel aien, um esyei ra an nuhup u nup u Siria:

¹⁰ ja is ikni ilpu eucsupo iji ig eris eled aien ehele Abiseai etwan, mika yi esyei ra aien an nuhup u nup Amon.

¹¹ Is um ika aien, El era esjilid irak a nup u Siria, namu atau imi nyak aiek: ja el era esjilid iram a nup Amon, inki apam ainyak, um atau imi euc.

¹² Etmu emda inliinmopom aiek; intumu ago nedo emda akaija va atimi uja, im lep vai iji maliyum u Atua uja: etmu ago nitai inig et upene iran a Ihova.

¹³ Is apan a Joab im natimi ehelen, par ago nedoa vai nup u Siria: eris aha ara an nuhup o un.

¹⁴ Eris wat almoi a nup Amon, mika eris aha a nup u Siria, eris lep aha ara an nuhup u Abiseai, am apan anliin maliyum ura. Is um ahes ehele nup u Siria a Joab, um apam Jerusalem.

¹⁵ Eris wat almoi a nupu Siria, mika eris auud ra an nuhup u nup Isreel, eris asjapicnaig ara.

¹⁶ Is um abra atimi a Hatatiser, mika eri lucsei nup u Siria iji ig eris amen ara an nahaijin nofowai Yufretes eahki: eris apan Hilam ara; is aminjinai ra a Sobak, natimi alupas u ilpu eucsupo u Hatatiser.

¹⁷ Eris wat asuptecnaig ehele Tevit, is asjapicnaig nup Isreel asega aien, um algauwaig an nofowai Jortan, um yetpan Hilam. Eris esyei ra an nuhup u Tevit a nup u Siria, um ati nedoa vai yin.

¹⁸ Eris aha a nup u Siria an nuhup u nup Isreel; is auahas niji jariot u nup u Siria is seven huntret (700) a Tevit, im lep ilpu eucsupo ateuc irai hors is seven dausant (7,000), im lep ilpu eucsupo tup atga is forte dausant (40,000): is um auud Sobak aien, natimi alupas u ilpu eucsupo ura, is mas aien eahki.

¹⁹ Eris wat almoi a ilpu atimarid iji ig eris aheca u Hatatiser ara, mika eris auud ra an nuhup u nup Isreel, eris asa nigpa ehele nup Isreel ara, um aheca ura. Va nitai inigki eris imtitaig a nup u Siria par lep atau imi nup Amon.