2 Samuel 1 - Intas Etipup

Nuarin tas alupas 1.

1 Et ika a Tevit eri atgei nup Amalek iyehki is imiabrai yin aien va nauahas atimi vaig, um ika is atgei Saal aien. 17 Et imitaig Saal im Jonadan aien an nohranitai.

¹ IS mas a Saal; is lep adumoij a Tevit, ahes u natgei nup Amalek o un; is um amen Siklac a Tevit an nadiat is ero;

² is wat nadiat dirt, is ahes ehele Saal an nuarin asjapicnaig u ilpu eucsupo a natimi is ethi, is ahpati napelumai o un, is amen nobohtan an nidjinin: is wat yetpan ehele Tevit aien, is eropse an nobohtan aien, um ecen vai yin.

³ Is ika ehelen a Tevit, Na mun ahes eda aiek? Is ika ehelen aien, Ek mun ahes an nuarin asjapicnaig u nup Isreel ainyak.

⁴ Is ika ehelen a Tevit, Et echamecha va nedoa? namu idim asuptecnaig ehelek aiek. Is ika aien, Era mun ahapan natimi va nedoa, um lep eropse natimi et ahinag, um emesmas; erau lep emesmas a Saal im Jonadan inhal o un.

⁵ Is ika a Tevit ehele intakuras iyehki is imiabrai yin aien, Na evato aiek mika erus emesmas a Saal im Jonadan inhal o un?

⁶ Is ika a intakuras iyehki is imiabrai yin aien, Kis wat tup eklim edo ainyak an nedoon Cilboa, is idim aijisji an mopul o un a Saal; eris auroauro niji jariot im ilpu atimi ateuc irai hors, um eriss iran.

⁷ Is wat atidjin aien, is ecet nyak aien, um ahlaig vai nyak. Kis ika ainyak, Ainyak ap aigki.

⁸ Is ika aien ehelek, Aiek di aigki? Kis ika ainyak ehelen, Ek up Amalek ainyak.

⁹ Is lep ika ehelek aien, Aiheuc vai nyak aiek, um aiji irak, um atgei nyak: et mun yetpam irak nohocred alupas unyak, ja ek umoh asega ainyak.

¹⁰ Kis um aiji iran ainyak, um atgei yin; kis idim ato ainyak mika inyi eti umoh aien, nikavaig, is mun eropse aien: kis leh korona an nidjinin ainyak, im nethado an nikman, um imiapam igcaki imi euc, ak natimi alupas unyak.

¹¹ Is um leh napelumai itac o un a Tevit, um ahpati; eris lep ago natimi asega eris amen ehelen:

¹² eris aunyauwaig ara, um ehtigtaig, um atwakam um yetpan an jupura, vai Saal, im Jonadan inhal o un, im lep vai ilpu atimi u Ihova, im lep vai nup Isreel; nikavaig, eris emesmas ara an nedoa.

¹³ Is ika a Tevit ehele intakuras iyehki is imiabrai yiu aien, Na ahes eda aiek? Is ika aien, Ek hal u natimi an taka pece ainyak, nup Amalek.

¹⁴ Is ika a Tevit ehelen, Na a uri aiek par eti imtitaig par ada nikmam, um atgei natimi inig is ati yin a Ihova?

¹⁵ Is ahlaig a Tevit vai tah intakuras o un, um ika, Apan aiek ubutpotet, um atgei yin. Is auud yin aien, ja is pah mas aien.

¹⁶ Is ika a Tevit ehelen, Et unyum ache nohuun mas unyum; et idim asuptecnaig vai euc nipjineucsem, um ika, Ek mun atgei natimi inig ainyak is ati yin a Ihova.

¹⁷ Is um imitaig Saal im Jonadan inhal o un a Tevit an nohranitai inigki:

¹⁸ is lep ika aien eri esege imi nup u Juta “Nefana:” (eris idim aged an nitaasviitai u Jesur.)

¹⁹ Ak nup Isreel, eris atgei natimi esjilid unyimia irai edoon unyimia: era evemesmas a ilpu atimi emda!

²⁰ Jim asuptecnaig nitai inigki Cad, jim efehtas vaig irai efalaig u Askelon; va yi jim upene alupas inliinmopoi ilpu atahig u nup u Filistia, va eri jim tas ijinies a ilpu atahig u atimi eti aperitome.

²¹ Ak niji edoon Cilboa, inyi eti asuol iramia nopoigmul, im incopda; inyi eti eteuc niji uari obohtan et eteuc inhupnan iran: is idim takitai eahki nitai ahtaipup u natimi emda;—nitai ahtaipup u Saal marom—nitai ahtaipup o un eris aspi yin an narakei.

²² Eris eti atapnes nefana u Jonadan va nagako u atimi emda; is eti auoh takitai nauitoga u Saal vai inja ira atimi eris atgei ra.

²³ Ak Saal im Jonadan, arus wat umumoh aijaurau, is aiyu jipe inliinmopomirau aijaurau vai caurau um tup ethi ache: arus wat emesmas aijaurau, eris eti atiakoai caurau: is esjilid nathut urau irai nae u meijcop; erus esjilid irai laion arau va nemda urau.

²⁴ Ak ilpu atahig u nup Isreel, imitaig Saal aijaua, is aso caua aien ira apelumai cap um esjilid; is yecrei apelumai unyimia aien irai uari colt.

²⁵ Erau evemesmas ahwat atimi emda an niblan nedoa! Ak Jonadan, eris atgei euc irai edoon unyum.

²⁶ Ak Jonadan etwak, ek ohocred ainyak vai euc: as idim upene irak aiek: is alupas naiyu u inliinmopom aiek vai nyak, jam tintin vai ilpu takata.

²⁷ Erau evemesmas ahwat atimi emda! er evauahas nij va atimi an nedoa!