2 Pitrus 3 - Intas Etipup

Nuarin-tas alupas 3.

¹ AK ilpu etoak upene, ek ehcero aged nitasvitai ehelemia ainyak; ek ahugni inliinmopomia inivaijec ainyak iran raigki, mika aki aktaktai aijaua:

² um imyiehva intas eris upyi asaig a ilpu profeta upene, im lep nesege unyima ilpu apostolo o Natimarid im Natimi imyiatamaig caija:

³ akumu uhup aijaua um ato nitai ineigki, nikavaig, erupu ehcohos a ilpu atimi imyiafakahcil ira adiat apitac, um ago niji merit has ura,

⁴ um ika, Intas upyi asaig va napam o un eda? eris emesmas a ilpu retpoija itu acen, ja et amen niji itai asega um uhum pam naopan ineig et idivaig an naopan iyehki eris ago.

⁵ Ja era eti merit ara natovaig nitai ineigki, nikavaig, is eteuc nohatag itu acen, is lep ehlohos nobohtan an wai, um lep amen irai wai, vai intas o Atua,

⁶ eris auahas nobohtan iyehki iran, is ahgarero inwai iran:

⁷ jai nohatag im nobohtan an naopan ineig, et amen vai intas ineigki, er lep aminjinaig urin cop va nadiat iyehki, uhpu asuptecnaig nimtan imi atimi iran, um auahas ilpu atimi era eti eccen vai Atua ara.

⁸ Ja, ak ilpu etoak upene, akumu ato nitai ineigki aijaua, nikavaig, et idivai mesese wun dausant nadiat et ethi an nuhup u Natimarid, et lep idivaig nadiat et ethi mesese wun dausant.

⁹ Et eti esjaigse intas upyi asaig o un a Natimarid, et idivaig nika u nahaiji atimi et mun esjaigse aien; ja et eropse inliinmopon aien vai caija, et eti merit aien mika eri emesmas tah, ja et merit aien mika yi adumoij pam inliinmopoi atimi asega.

¹⁰ Ja etpu yetpam nadiat u Natimarid et idivaig natimi ehneg itai an nepeig; etpu yetpan an tid iran nohatag an nohran inyi alupas inmotjan, etpu ataigataig nohuu iji itai an cop alupas, uhpu lep atnamud nobohtan im niji auritai iran.

¹¹ Uhpu idim auahas nitai iji eigki asega, va nitai ineigki eris idim ika akupu esjilid aijaua an nedo upene asega im nedo eccen vai Atua,

¹² um aitgaig, um imyiehio napam u nadiat u Atua, uhpu ahli nohatag iran um auahas, etpu lep ataigataig nohuu iji itai an cop alupas.

¹³ Ja inta aitgaig nohatag mat akaija, im nobohtan mat, etpu amen iran nedo atoh, et idivaig intas upyi asaig o un.

¹⁴ Ak ilpu etoak upene, eka idim aitgaig nitai iji eigki aijaua; va nitai ineigki akumu auritai emda aijaua, mika yi ecet caua aien an neigpa, um ti nemeig im nitai has iramia;

¹⁵ um aktaktai mika, et itai imyiatamaig caua nedo eti auatiemda u Natimarid uja; et idivaig is lep aged imi caua a Paulo etoama upene, an narapakau ineig eris alupai yin;

¹⁶ et idivaig is lep tas aien va nitai iji eigki, an nitasvitai asega o un; ja et ehka natovaig nahaiji itai iran, era lep ago acai a ilpu atimi eti ato itai, im ilpu atimi eti amen aktit, et idivaig era lep ago ara irai tas et eche eris aged, va uhpu auahas ra.

¹⁷ Ak ilpu etoak upene, eka uhup aijaua um ato nitai iji eigki; va nitai ineigki akumu aminjinai caua aijaua, va aki jim ahnag aijaua va nefaifa u ilpu atimi auatatimi, um adumoij an nitai ineigki eka aiji aktit iran aijaua:

¹⁸ jam esjilid an naiheuc, im natovaig Iesu Kristo Natimarid uja im Natimi imyiatamaig caija. Uhmu imyiahpas yin an naopan ineig im lep irai iji mesese. Emen.