2 Pitrus 2 - Intas Etipup

Nuarin-tas alupas 2.

¹ JA eris lep amen hal ilpu profeta efaifa ehele atimi, etpu idim ucco, erupu amen hal ilpu atimi esege efaifa ehelemia, erupu tup eklim atupun nesege ineig ara et auahas atimi, um lep ateri Natimarid ineig is auarimtara, era imyiapam nitai ineig ira ra ara etpu auroauro um auahas ra.

² Erupu apol an nedo has ura natimi inyi ahinag; uhpu lep asan tas has va nefalaig inivaijec va nedo ura.

³ Erupu lep leucse nimtan vai caua ara an tas efaifa vai inhas ira ra itai: inyi ti atumop um itu neruvaig ira ra, inyi ti imtatte nauahas ra vaig.

⁴ El is eti aiheuc vai ilpu agelo a Atua eris ago nedo has ara, jam ethaigse ra an nuarin aupat, um arore ra an wau an naupat, par aitgaig nadiat asuptecnaig nimtan iran;

⁵ um eti aiheuc va atimi an nobohtan itu acen, jam imyiatamaig Noa natimi asuptecnaig nedo atoh, im lep atimi is seven, um ika yi ahgarero nobohtan va atimi eti eccen vai Atua;

⁶ is lep atnamud inuarin-pece eraigki aien, Sotom im Comora, um auahas atimi an neruvaig esjilid, um ikni ra, mika eri atimi asjaaicnaig ara imi ra sji eigki, erupu lep eti eccen vai Atua ara;

⁷ jam imyiatamaig Lot, natimi atoh nedo o un, is ohocred aien va nedo has esjilid u ilpu atimi auatatimi:

⁸ (is amen ehele ra natimi iyehki is atoh nedo o un, ja is ohocred inliinmopon atoh irai iji adiat va nedo imyipalea ineig ura, is almoi aien um atahaijeg:)

⁹ et ato a Natimarid par imyiatamaig ilpu atimi era eccen vai yin ara va nedo oop ra, um lep aminjinai ilpu atimi auatatimi um imyihum pan nadiat iyehki, uhpu asuptecnaig nimtan imi ra par aru nedo ura:

¹⁰ jam esjilid irai ra sji eigki, era ago nedo o nohura ara an merit acitak ura, um imyipalea ilpu atimi alupas ura; era ago nedo ijinies ara, um imyiisjis itai; era eti imtitaig ara par asan tas has vai ilpu atimarid.

¹¹ Et esjilid nemda im natimi alupas u ilpu agelo, ja era eti asan tas has ara vai ra an nuhup u Natimarid.

¹² Ja era idivai itai umoh et ti lelra ara sji eigki, era tup ohun ache ara, eris ikni ra mika eri arop ira ra um auahas ra, era tas has ara va nitai iji eigki era eti ato ara; uhpu idim auahas ra an nedo has ura;

¹³ erupu leh nimtan nedo has ura ara, et idivai ra era aktaktai ara, um ika, et upene nimyiacitakvaig an nadiat et ethi. Era itai emeig ara, um itai has, um imyiacitak va nedo efaifa ura, an hag ura ehelemia;

¹⁴ et ohua nesganimtara an gaijid, um eti atumop par almoi nedo has; era anai ilpu atimi auatialidi ara: et lep imjijeuc inliinmopura u inhas ira ra itai; uhpu idim auahas ra;

¹⁵ eris ude nefalaig atoh ara, um ahnag, um ahced nefalaig u Belam inhal o Bosor, aien aigki is merit nimtan nedo has aien;

¹⁶ ja eris ated yin va nedo has o un; is tas ehelen nifo pop o un an nohra atimi, um acaiji nedo ahnag u naprofeta iyehki.

¹⁷ Era ehpai wai ara sji eigki, jam ame, im naupat et ahre neihio; eris ago vai ra inmehcim esjilid inyi ti lep ti:

¹⁸ era asan tas ijinies acen ara vai intakitai, um anai ra sji eigki eris upyi aha ara vai ilpu atimi ahnag, an merit has u nohura, im nedo acitak:

¹⁹ era upyi asaig ara sji eigki ehele ra mika eri eti aheca ara, ja era idim ilpu aheca u nedo has ara: et wat esjilid tah natimi iran tah, et aheca o un aien.

²⁰ El era aha va niji itai has an nobohtan ara va nato Iesu Kristo ura, Natimarid im Natimi imyiatamaig caija, ja par lep eccen um auatialidi iran, et has namen apitac ura iran yehki uhup.

²¹ El eris eti ato nefalaig an nedo atoh ara, el is upene vai ra; jam has natovaig, ja par lep atidjira an tas alep upene eris alupai ra.

²² Ja et ucce nedo ura et idivaig nasai itai inivaijec ineig, nikavaig, “Et lep adumoij kuri u nitai ineig et mun alo iran aien;” im lep “picad eris yiri yin u nereucvaig an nosal.”