2 Pitrus 1 - Intas Etipup

Nuarin-tas alupas 1.

¹ AK ilpu atimi leh nimyiisjis ninivaijec upene et idivai cama, an nedo atoh o Iesu Kristo Atua uja, im Natimi imyiatamaig caija, ek aiheuc vai caua ainyak Saimona Pitrus, naheca im napostolo o Iesu Kristo:

² Etmu amen alupas ehelemia naiheuc im neigpa an nato Atua unyimia, im lep Iesu Natimarid uja;

³ et idivaig eris alupai caija niji itai asega er umumoh vaig um eccen vai Atua, an nemda esjilid o un, va nato yin is ahlaig vai caija aien vai natimi alupas im nemda o un:

⁴ er lep alupai caija vaig niji tas upyi asaig esjilid acen um upene; va akupu asipiaig inliinmopoi Atua aijaua irai itai iji eigki; akis idim aha va nedo has ineig aijaua, et amen an nobohtan vai inmerit has u atimi.

⁵ Im lep ineig, akumu auritai alupas aijaua um asiaig pan nedo upene an nimyiisjis ninivaijec unyimia; im nato itai an nedo upene;

⁶ im nedo cesnitai an nato itai; im nedo eti auatiemda an nedo cesnitai; im nedo eccen vai Atua an nedo eti auatiemda;

⁷ im naiyu u inliinmopomia vai ilpu etoamia an nedo eccen vai Atua; im naiheuc va atimi an naiyu u inliinmopomia vai ilpu etoamia.

⁸ El et amen nitai iji eigki ehelemia um esjilid, akupu eti tup amen aijaua, jam ohoai itai an natovaig Iesu Kristo Natimarid uja.

⁹ Ja aien et eti o un nitai iji eigki, et aupat nesganimtan aien, um aropoig, et lep eti imyiehva aien mika, eris ago adicinadicin yin va nedo has o un itu acen.

¹⁰ Va nitai ineigki akumu auritai alupas aijaua, ak ilpu etoak, um ago yi ipjin nahlaig vai caua vaig, im nanacanac iramia: el eka ago nitai iji eigki aijaua, akupu eti lep adumoij aijaua:

¹¹ uhpu idim ago alupas vai caua nefalaig pan an nelcau ineig inyi ti lep ti o Iesu Kristo Natimarid uja, im Natimi imyiatamaig caija.

¹² Va nitai ineigki, eka idim ato nitai iji eigki aijaua, um aiji aktit an tas inivaijec ineig et ehcohos pam, ja inki ti auatialidi ainyak par ahugni lelmia irai iji adiat:

¹³ ek lep aktaktai ainyak mika, et upene vai nyak, an namen unyak an neom atga ineigki, par ahugni caua, mika aki imyiehva itai aijaua;

¹⁴ ek idim ato ainyak mika, ekpu ude neom atga ineigki ainyak tupko, et idivaig is ehvaig ehelek a Iesu Kristo Natimarid uja.

¹⁵ Ekpu auritai emda ainyak, mika, ek wit mas ainyak, yi amen ehelemia nimyiehvavaig nitai iji eigki irai iji adiat.

¹⁶ Ecris idim eti apol aijama an tas ecsipece arapakau jam ahcil, an nasuptecnaig ehelemia unyima nemda im napam u Iesu Kristo Natimarid uja; ecris idim almoi natimi alupas o un aijama.

¹⁷ Is leh nedo eccen ehele Atua Etman aien, im nimyiahpas yin, an naopan iyehki is wat ahes nohran tah an lah esjilid, um ika, “Inhalav cop unyak neigki, ek imyiacitak yin ainyak.”

¹⁸ Ecris atahaijeg nohran iyehki aijama is ahes an nohatag, an namen ehelen unyima an lolan nedoon itaup.

¹⁹ Et lep amen eheleija intas esjilid ineig um inivaijec, eris upyi asaig a ilpu profeta; et upene vai caua naktaktaivaig, et idivaig inlah er ecetai an nuarin aupat, um imyihum pan an naopan iyehki etpu athut nadiat anliinmopomia, um lep ehcohos inmoijeuv an nadiat iran:

²⁰ akumu uhup aijaua um ato mika, et eti tup ispun ehcohos tah intas eris aged a ilpu profeta.

²¹ Is eti tup ispun ahes ehele atimi itu acen intas ineig eris upyi asaig a ilpu profeta: ja eris tas a ilpu atimi upene u Atua, is idivaig is ahu intas ira ra a Nesgan Upene.