1 Timodeus 6 - Intas Etipup

Nuarin-tas alupas 6.

¹ ERUMU ago nedo eccen esjilid vai ilpu atimi alupas ura a ilpu aheca asega era aheca ura ara, va uhpu eti asan tas has va nidai Atua, im nesege o un.

² Eru wit imyiisjis ninivaijec a ilpu atimi alupas ura, erumu jim imyipalea ra ara, vai inraimu ura; jam esjilid um aheca ura, va nitai ineigki, nikavaig, era imyiisjis ninivaijec ara sji eigki, um raimu upene, er auaraheca upene ura. Namu esege nitai iji eigki aiek, um ated atimi vaig.

³ El et esege nedo et eche tah natimi, um eti adai intas inivaijec, nikavaig, intas o Iesu Kristo Natimarid uja, im nesege ineig et idiva nedo eccen vai Atua;

⁴ et ijinies inliinmopon aien, um eti ato itai, jam merit alupas par ahodai itai um imyiisjis itai vai intas, nedo atupun nauatitai neigki, im nehtauo, im intas edemda, im naktaktai has,

⁵ im nimyiisjis itai jipe u ilpu atimi et has inliinmopura, et eti amen ehele ra intas inivaijec, era lep aktaktai ara mika eri leh inpadiaig va nedo eccen ura vai Atua: ude ra sji eigki aiek et ucce nedo ura ara.

⁶ Jai inpadiaig esjilid neigki, nedo eccen vai Atua im inliinmopja eropse.

⁷ Intis eti apos pam tah nitai an nobohtan ineigki akaija, er idim ato, nikavaig, et ehka vai caija inlep apos pan vaig tah nitai iran.

⁸ Ja el et eteuc nitai caig uja im nitai aso caija, etpu eropse inliinmopja vaig akaija.

⁹ Jai ara era merit ara nikni itai vaig, era epihtau ara an nedo oop ra, im nitai apro ra, im lep inmerit ahnag et ahinag um has, era ete vaig natimi an nohocred im inmas.

¹⁰ Et idim atupun nitai has iji eigki asega inmerit vai inpadiaig: eris wat anahna o un nahaiji ra, eris ude nimyiisjis ninivaijec ara, um acjaktit ra an nohocred et ahinag.

¹¹ Jai namu aha aiek va nitai iji eigki, ak natimi u Atua; um apol an nedo atoh, im nedo eccen vai Atua, im nimyiisjis ninivaijec, im naiheuc va atimi, im nedo eti auatiemda, im nedo erop.

¹² Ago nedoa upene an nimyiisjis ninivaijec aiek, um asjiraig nitai umoh iran ineig inyi ti lep ti, eris imyiacaij euc vaig, as lep asuptecnaig upene aiek an nuhup u atimi is ahinag.

¹³ Ek efasaig ehelum ainyak an nuhup u Atua ineig et imyiatamumoh niji itai asega aien, im lep Iesu Kristo, aien aigki is asuptecnaig upene aien an nuhup u Ponjus Pailet;

¹⁴ mika an apos intas alep ineigki aiek, inyi ti nitai has iran, um ti nedo ineig er acaiji vaig, um imyihum pan an naopan iyehki etpu ehcohos a Iesu Kristo Natimarid uja:

¹⁵ etpu ehvai yin aien an naopan o un, aien et amen upene aien, um emda ache, um Atimarid irai ilpu atimarid, um Atimi alupas irai ilpu atimi alupas;

¹⁶ et tup ispun umoh aien ache, um amen an lah ineig et ehka vaig tah natimi napanvaig iran; is eti ecet yin tah natimi, et lep ehka necet yin vaig: etmu eteuc nimyiahpas yin, im nemda, irai iji mesese. Emen.

¹⁷ Efasaig ehele ra sji eig aiek, era ikni itai an nobohtan ineigki ara, mika yi jim ijinies inliinmopura ara, um jim asgeig an padiaig ineig et eti amen, jam asgeig irai Atua umoh ineig et efalupai caija niji itai asega aien mika ti imyiacitak vaig akaija;

¹⁸ mika eri ago nedo upene ara; yi lep ahinag nauritai upene ura, um esjilid naiheuc ura va atimi; eri lep eti esjum nahtaivaig itai ura,

¹⁹ jam ikni nededuon upene imi ra vaig an tak aopan, va erupu asjiraig nitai umoh iran ineig ara inyi ti lep ti.

²⁰ Ak Timodeus, aminjinaig nitai ineig aiek eris ati ehelum, um esjum vai intas ahnag, intas vai intakitai, im nimyiisjis itai iji eig er anvi nidan mika narapakau jam ahcil:

²¹ eris apol an nitai ineigki nahaiji atimi, um adumoij an nimyiisjis ninivaijec ura. Uhmu aiheuc vai euc. Emen.