1 Timodeus 5 - Intas Etipup

Nuarin-tas alupas 5.

¹ JIM tas emda aiek ehele natimi ineig et efatimi aien, jam eklim tup ated yin et idivai etmam; im ilpu takuras, et idivai ilpu etoam;

² im ilpu takata efatimi, et idivai ilpu risum; im ilpu atahaig, et idivai ilpu atahaig iram, an nedo adicinadicin asega.

³ ¶ Aiheuc vai ilpu takata iji eig aiek, eris emesmas a ilpu atamnyura, um atih ilpu atimi ehpan ira ra.

⁴ Ja el et eteuc ilpu hal o un tah intakata is mas natamnyu un, ka ilpu mapon, erumu ato ara par ago nedo aiheuc vai ilpu atimi ehpan ira ra, um lep ago neruvaig imi ilpu atmil ura: et esjilid um upene nedo ineigki an nuhup u Atua.

⁵ Aien is mas natamnyu un, et um echim amen aien, et asgeig irai Atua aien, um alaigaheni, um ugni Atua irai iji adiat im niji epeig.

⁶ Ja aien et acitak aien, et idivaig natimi mas aien an numoh o un.

⁷ Namu asuptecnaig nitai iji eigki aiek, mika eri eti lep acaiji ra vaig tah nitai.

⁸ El et eti aminjinai ilpu atimi ehpan iran tah natimi, im lep ra an nimnim o un, et atceijaig nimyiisjis ninivaijec o un aien, et lep esjilid nedo has o un irai edo has u ilpu atimi imyiisjis nahcil.

⁹ Aged ilpu takata iji eig ache aiek eris emesmas ilpu atamnyura, um sikste inmesese ira ra, im lep athi ache natamnyura;

¹⁰ eh lep tas upene va niji auritai upene ura; el eris aminjinai ilpu hal ura ara, um aiheuc vai nup urai tak uarin, um yiri eduei ilpu atimi upene, um ago nedo upene vai ilpu atimi ohocred, um apol aktit an niji auritai upene asega.

¹¹ Jam ude ilpu takata takuras iji eig eris emesmas a ilpu atamnyura: eru wit acitak ara um esjum vai Kristo, erupu ika ara eri lep atidai;

¹² uhpu asuptecnaig nimtan imi ra va nedo ura, nikavaig, era mun atceijaig nimyiisjis ninivaijec uhup ura ara.

¹³ Era lep esjum ara nagovaig itai, um amen ehcid; jam eti esjum ache nagovaig itai, era lep hos tas ara, um ecrisecris tas, um asan tas ineig et eti upene vai ra nasaigvaig.

¹⁴ Va nitai ineigki ek ika ainyak, eri lep atidai a ilpu takata takuras eris emesmas a ilpu atamnyura, um asvalav, um aminjina nimnim ura, um jim ago tah nedo ineig erupu tas has vaig a ilpu atimi tak atimi iraija.

¹⁵ Eris idim adumoij pan ehele Satana nahaiji ra.

¹⁶ El era amen a ilpu takata eris emesmas a ilpu atamnyura ehelen tah natimi imyiisjis ninivaijec, ka intakata imyiisjis ninivaijec, erumu aiheuc vai ra ara, um jim ude ra ehele nup an nakalasia; mika eri aiheuc vai ilpu takata iji eig ara eris idim emesmas a ilpu atamnyura, um atih ilpu atimi ehpan ira ra.

¹⁷ ¶ Uhmu ago nedo eccen upene vai ilpu atimi tas alep era aminjinaig upene atimi ara, jam esjilid vai ra era auritai ara an tas im nesege.

¹⁸ Eris aged, um ika, “Jim arore nipjineucse kurimatau aiek, et wat auhi hwiit aien.” Im lep ineig, “Er alupai natimi auritai nimtan.”

¹⁹ Namu jim atahaijeg intas er atijai irai natimi tas alep aiek, el et eti asuptecnaig intas iyehki a natimi inyi ero, ka inyi eseij.

²⁰ Namu ated ra sji eig aiek, era ago nedo has ara, an nuhup u atimi asega, va erupu lep imtitaig atimi asega.

²¹ Ek efasaig ehelum ainyak an nuhup u Atua, im Iesu Kristo Natimarid, im ilpu agelo eris ehtai ra, mika an imyiaiji nitai iji eigki aiek, um tup ethi ache inliinmopom va atimi asega, um jim ago tah nitai an tup inmerit unyum vaig tak.

²² Jim auroauro aiek um atijai nikmam ijinies iran tah natimi, um jim asipiaig nedo has oi tak atimi; namu aminjinai euc aiek va apu adicinadicin aiek.

²³ Jim lep umnyi inwai ache aiek, jam umnyi waina tintin va nipjinetgara, im lep va nehcahinag auatialidi unyum.

²⁴ Er uhup um ato nedo has u ahaiji atimi, ja par apitac neruvaig; er apitac um lep ato nedo has u ahaiji ra.

²⁵ Et idim ucco, er uhup um lep ato nedo upene u ahaiji atimi; et lep ehka nadenaigvaig nedo er eti ato o ahaiji ra.