1 Timodeus 3 - Intas Etipup

Nuarin-tas alupas 3.

¹ ET inivaijec intas ineigki, nikavaig, El et merit tah natimi naminjinaigvaig nakalasia, et merit vai nauritai upene aien.

² Eris idim ika va natimi aminjina nakalasia, er eti lep acaiji yin vaig tah nitai, inyi ethi ache ehgan, um aminjina nedo o un, um aktaktai upene, um ago nedo upene, um alaa atimi, um ato par esege;

³ um eti umnyi alupas waina, um eti abli atimi, um eti merit alupas vai inpadiaig has vaig; jam tup eklim amen, um eti ehtauo, um eti has iran itai;

⁴ um aminjinaig upene ra an nimnim o un, um ika eri imyiaiji intas o un a ilpu hal o un um ago nedo upene asega;

⁵ (el eti ato tah natimi par aminjinai ra an nimnim o un, et ehka vai yin naminjinaigvaig nakalasia u Atua;)

⁶ um eti atimi paam alaigaheni, vai yi jim ijinies inliinmopon aien, um lep leucse neruvaig idivai Tiapolo.

⁷ Im lep ineig, eris idim ika eri tas upene vai yin atimi eti alaigaheni; vai yi jim eropse aien vai intas has, um lep apro yin a Tiapolo.

⁸ ¶ Et idim lep ucco vai ilpu atimi ehcid, erumu upene ara, um jim ero intas ura, um jim umnyi alupas waina, um jim merit alupas vai inpadiaig has vaig;

⁹ jam apol an nitai adenaig an nimyiisjis ninivaijec anliinmopura inivaijec:

¹⁰ uhmu lep upyi hup um ato ra; ja erupu ehcid ara, el eh eti acaiji ra vaig tah nitai.

¹¹ Et idim lep ucco vai ilpu ehgara, erumu upene ara, um jim tas has va atimi, um aminjina nedo ura, um inivaijec an nedo asega.

¹² Etmu ethi ache ehgai ilpu atimi ehcid: erumu aminjinaig upene ilpu hal ura ara, im lep ra an nimnim ura.

¹³ Ara era ehcid upene ara, erupu aridjai ara, um lcp emda alupas nimyiisjis ninivaijec ura vai Iesu Krisio.

¹⁴ ¶ Ek aged nitai iji eigki imi euc ainyak, ja ek ika ainyak ki ham ehelum tupko:

¹⁵ ja el ek elvamen ainyak, mika an ato aiek nedo ineig eris idim ika an ago aiek anliin neom u Atua, nikavaig, nakalasia u Atua umoh, et oboutau um itai ahtadai an tas inivaijec.

¹⁶ ET idim inivaijec neigki, nikavaig, et esjilid nitai adenaig an nedo eccen vai Atua, nikavaig, Is ehcohos a Atua an nohun, is ika a Nesgan Upene et atoh nedo o un, eris ecet yin a ilpu agelo, eris asuptecnai yin ehele nup urai iji pece, eris asgeig iran an nobohtan, eris lep imyiapan yin an pece upene.