1 Timodeus 2 - Intas Etipup

Nuarin-tas alupas 2.

¹ EK upyi hup ainyak um ated euc, mika uhpu ugni itai va atimi asega, um alaigaheni vai ra, um imyiahras ra, um naaurineig vai ra;

² vai ilpu atimarid, im lep ra asega era ilpu atimi alupas ara; mika ti amen upene akaija, um eigpa, um ago nedo eccen vai Atua im nedo upene va atimi.

³ Et esjilid um upene nedo ineigki an nuhup u Atua ineig et imyiatamaig caija aien;

⁴ et ika aien eri leh nitai imyiatamaig ra natimi asega, um ato intas inivaijec.

⁵ Et eteuc Atua et ethi ache, im natimi asan neigpa et ethi ache juju an niblaija atimi im Atua, natimi ineig Iesu Kristo;

⁶ is ahtai yin aien nimtan va atimi asega, ya uhpu ato an naopan o un;

⁷ eris ati nyak vaig, mika ki atimi asuptecnaig ainyak, um apostolo, (ek asan tas inivaijec irai Kristo ainyak, um eti ahcil,) um atimi esege imi nup urai iji pece an nimyiisjis ninivaijec im intas inivaijec.

⁸ Va nitai ineigki ek ika ainyak, eri ataigaheni a ilpu atamaig irai iji uarin asega, um adaigjai nikmara adicinadicin, um jim edemda, um jim imyiisjis itai.

⁹ Ek lep ika ainyak, eri aso ra a ilpu takata an napelumai ineig et upene vai ra, um aktaktai upene, um jim acitaacera, um jim atij numri nuljinira, um jim yecrei ra a colt, im perl, im napelumai er auanimtan alupas;

¹⁰ lam aso ra an nedo upene, et esjilid nedo ineigki vai ilpu takata era ika ara era alaigaheni vai Atua.

¹¹ Erumu atahaijeg intas a ilpu takata, um imyiaiji upene, jam jim tas.

¹² Ja ek acaiji ilpu takata ainyak va eri jim esege ara, um jim esjilid irai ilpu atamaig, jam atahaijeg ache.

¹³ Eris upyi hup um ago Atam, ja par apitac irai Iva.

¹⁴ Eris eti ago nefaifa vai Atam, ja eris ago nefaifa vai intakata, is um imyipalea aien.

¹⁵ Ja uhpu imyiatamaig ra an naposvaig ilpu hal ura, el era aktaktai upene ara, um apol an nimyiisjis ninivaijec, um ago nedo aiheuc va atimi im nedo upene.