1 Timodeus 1 - Intas Etipup

Nuarin-tas alupas 1.

¹ AK Timodeus, inhal unyak inivaijec an nimyiisjis ninivaijec, ek aiheuc vai euc ainyak Paulo, napostolo o Iesu Kristo vai intas alep o Atua ineig et imyiatamaig caija aien, im Iesu Kristo Natimarid, inta aitgai yin akaija:

² Etmu amen ehelum naiheuc, im neti aru, im neigpa, et ahes ehele Atua Etmaija, im Iesu Kristo Natimarid uja.

³ Kis idim ugni euc ainyak mika an amen Efesus aiek, an naopan iyehki an napan unyak Masetonea, um acaiji nahaiji ra va eri jim esege intas et eche ara,

⁴ um jim aktaktai intas ecsipece vai intakitai, im nidai ilpu retpora itu acen, et atupun nimyiisjis itai nitai iji eigki, jam eti ahidaig nemda ineig et ahes ehele Atua an nimyiisjis ninivaijec.

⁵ Jai nesgan tas alep neigki, naiheuc ineig va atimi et ahes anliinmopja upene, im naktaktai upene uja, m nimyiisjis ninivaijec et eti efaifa:

⁶ eris ude nitai iji eigki nahaiji ra, um ahidai ra pan u intas vai intakitai;

⁷ eris merit ara mika eri ilpu atimi esege intas alep; ja era eti ato ara nitai iji eigki era tas vaig ara, im nitai iji eigki era taam imyiisjis ara.

⁸ Ja inta ato akaija, nikavaig, et upene intas alep, el et apos tah natimi et idiva nedo an tas alep;

⁹ eh lep ato, nikavaig, eris eti ati intas alep va natimi atoh nedo o un, ja vai ilpu atimi esjum vai intas alep, im ilpu atimi imyipalea, im ilpu atimi auatatimi, im ilpu atimi ago nedo has, im ilpu atimi auatiimrigimrig, im ilpu atimi afakahcil has, im ilpu atimi atgei etmara, im ilpu atimi atgei risira, im ilpu atimi atgei atmas,

¹⁰ im ilpu atimi ago ingaijid, im ilpu atimi auarobotpotedo, im ilpu atimi ahneg atimi, im ilpu atimi asan tas ahcil, im ilpu atimi asan tas efaifa, im lep nedo asega et eche an nesege inivaijec;

¹¹ et idivaig intas-upene esjilid u Atua ineig er imyiahpas yin, eris ati ehelek.

¹² Ek lep naaurineig ainyak vai Iesu Kristo Natimarid uja, is alupai nyak nemda aien, um ika kis inivaijec ainyak, um ati nyak va nauritai ineigki o un;

¹³ kis atimi asan tas has ainyak itu acen, um abli atimi, um ahlo ra; ja eris aiheuc vai nyak, va nitai ineigki, nikavaig, kis ago nedo ineigki ainyak va neti ato itai unyak, im nimyiisjis nahcil unyak,

¹⁴ ja is esjilid acen naiheuc o Natimarid uja, is alupai nyak nimyiisjis ninivaijec aien, im inliinmopok aiyu vai yin irai Iesu Kristo.

¹⁵ Et inivaijec intas ineigki, um upene neteuc iran asega vaig, nikavaig, is asuol sepam a Iesu Kristo an nobohtan ineigki, mika yi imyiatamaig ilpu atimi auatatimi; ek esjilid ira ra ainyak.

¹⁶ Jai va nitai ineigki, eris aiheuc vai nyak, mika yi uhup a Iesu Kristo um ehva nedo eti auatiemda esjilid o un irak, va ekpu itai asjaaicnaig ainyak imi ra sji eigki, erupu asgeig iran ara va nitai umoh iran ineig inyi ti lep ti.

¹⁷ Im lep ineig, uhmu ago nedo eccen vai Natimarid ineig inyi amen aien irai iji mesese, um eti lep ti, er eti ecet yin, Atua ineig et arapakau ache aien, uhmu lep imyiahpas yin irai iji mesese. Emen.

¹⁸ Ak inhal unyak Timodeus, ek ati intas ineig ehelum ainyak, et idivaig intas iji eigki eris upyi asaig vai euc, mika an ago nedoa upene aiek irai itai iji eigki;

¹⁹ um apol aktit an nimyiisjis ninivaijec, im inliinmopom upene; eris atceijaig nitai ineigki hal, um etgeig yi egrei nimyiisjis ninivaijec ura:

²⁰ erau atimi ira ra a Haimenius im Aleksanter; kis atceijai rau imi Satana ainyak, va uhpu esege imi rau va eru jim asan tas has arau.