1 Samuel 8 - Intas Etipup

Nuarin tas alupas 8.

1 Erau tas alep ehele nup Isreel ahwat hal u Samuel, jam acalacal nedo urau, va nitai inigki era ugyi Samuel natimi vai natimarid. 6 Et wat alaigaheni a Samuel va nohocred o un, et ago eropse yin a Atua. 10 Et asuptecnaig nedo o natimarid a Samuel. 19 Et ika a Atua ehele Samuel yi atahaijeg intas imiisjisitai ura aien.

¹ IS wat efatimi a Samuel, is ati ohwat halav atamaig o un is ero mika eru atimi tas alep ehele nup Isreel arau.

² Nidai inmeto Joel, im nidai inharei Abaia: erus atimi tas alep arau Bier-siba.

³ Erus eti ago nedo o un ahwat hal o un; ja erus adumoij pan arau vai inpadiaig has, um lucsei naiheuc mika eru efaifa arau, um tas alep jam acalacal.

⁴ Va nitai inigki eris ehrasjapicnaig a ilpu atimi alupas asega u nup Isreel, um apan ehele Samuel an maliyum Rema,

⁵ um ika ehelen, Na idim efatimi aiek, ja erau eti ago nedo unyum ahwat hal unyum: va nitai inigki namu ati natimarid imi cama aiek, mika yi tas alep ehelema et idivaig nup urai iji pece.

⁶ Ja is ohocred a Samuel vai intas ura, nikavaig, Alupai cama natimarid mika yi tas alep ehelema. Is alaigaheni vai Ihova a Samuel.

⁷ Is ika a Ihova ehele Samuel, Namu atahaijeg intas o atimi iji igki aiek an tas asega ura eri asaig ehelum ara: era idim eti adwo euc ara, ja era idim adwo nyak ara, vai ki jim atimarid ura ainyak.

⁸ Era ago nedo vai euc ara, et idivaig nedo asega ura, eris ago ara an nopan iyehki, kis wat iknipagki ra ainyak an pece Ijipt um imihum pam an nopan inig, eris idim udei nyak ara um aheca u ilpu atmas.

⁹ Va nitai inigki namu atahaijeg intas ura aiek: jam tas emda ehele ra, um asuptecnaig ehele ra nedo o natimarid inig etpu esjilid ira ra aien.

¹⁰ Is asuptecnaig intas asega u Ihova a Samuel ehele atimi iji ig, eris ugyi yin vai natimarid ara.

¹¹ Is ika aien, Inyi uce nedo o natimarid inig etpu esjilid iramia aien, nikavaig: Etpu atoraliak ilpu halav atamaig unyimia aien, um ikni ra imi yin, par aminjinaig niji jariot o un, um ateuc irai hors o un; erupu lep athut nahaiji ra an nuhup u niji jariot o un.

¹² Etpu ikni ilpu atimi alupas irai iji dausant atimi o un aien, im ilpu atimi alupas irai iji fifte atimi o un; um lep ikni ra mika eri acujitai ara um ahapol iran, um asjapicnaig nohwai itai o un, um ago ij va atimi, im lep itai va niji jariot o un.

¹³ Etpu atoraliak ilpu halav atahig unyimia aien, mika eri auaretha vai yin, um ago alauwo, um ago areto o un.

¹⁴ Etpu atoraliak umamia aien, im nokoro vaine unyimia, im nokoro oliv unyimia; nitai iji ig marom et esjilid, um ahtai imi ilpu aheca o un.

¹⁵ Etpu atoraliak nuarin tend aien o ohwai itai unyimia, im lep u nokoro vaine unyimia, um ahtai imi ilpu atimi alupas o un, im ilpu aheca o un.

¹⁶ Etpu atoraliak ilpu aheca atamaig unyimia aien, im ilpu aheca atahig unyimia, im ilpu takuras esjilid unyimia, im niji togke unyimia, um ikni ra mika eri ago nauritai o un.

¹⁷ Etpu atoraliak nahaijin tend irai siip unyimia aien: akupu aheca o un aijaua.

¹⁸ Akupu aunyauwaig aijaua an nopan iyehki vai natimarid unyimia inig aki ati yin aijaua; ja inyi eti atahaijeg caua a Ihova an nopan iyehki.

¹⁹ Ja eris esjum natimi iji ehki natahaijeg vaig intas o Samuel; eris ika ara, Oʼo; ecra idim merit vai natimarid aijama mika yi esjilid irama;

²⁰ mika ecri idivaig nup urai taka pece asega aijama; mika yi tas alep ehelema a natimarid unyima, um atga an nuhup unyima, um atau imi cama an nedoa.

²¹ Is atahaijeg intas asega u atimi iji ehki a Samuel, is asuptecnaig ehni aien an tikgai Ihova.

²² Is ika a Ihova ehele Samuel, Namu atahaijeg intas ura aiek, um ati natimarid imi ra. Is ika a Samuel ehele nup Isreel, apan unyimia aijaua asega, um atga irai iji maliyum unyimia.