1 Samuel 7 - Intas Etipup

Nuarin tas alupas 7.

1 Era imiapam, nelcau itap a nup u Kirjad-jiarim, um ati an neom u Abinatab, um imiitap Eliesar inhal o un mika yi aminjinaig. 2 Et wat ti pan itac inmesese et twente, 3 et wat lep ated ra a Samuel, era adumoij an liinmopora a nup Isreel, um ecen vai Atua an maliyum Mispi. 7 Et wat alaigaheni a Samuel um ahlap irai iji itai ahlap, et auahas nup u Filistia a Ihova Iben-iser an munuka. 13 Eh mun imiasuol nup u Filistia. 15 Et tas alep ehele nup Isreel a Samuel, ja et igpa nedo o un, et lep ecen vai Atua aien.

¹ ERIS apan a nup u Kirjad-jiarim, um imiaridjipan nelcau u Ihova, um imiapan an nimnim u Abinatab an lolan nedoon, um imiitap Eliesar inhal o un mika yi aminjinaig nelcau u Ihova aien.

² Is amen Kirjad-jiarim nelcau u Ihova is itu iran, an mesese is twente: eris imitaig a nup Isreel asega vai Ihova.

³ Is tas a Samuel ehele nup Isreel asega, um ika, El eka adumoij pan ehele Ihova aijaua an liinmopomia asega, akumu iknipagki ilpu atmas irai taka pece ehelemia aijaua, im lep niji atmasimai, um ago upene inliinmopomia vai Ihova, um aheca o un ache: etpu imiatamaig caua aien vai nikmai nup u Filistia.

⁴ Eris idim iknipagki ilpu atmas im niji atmasimai a nup Isreel, um aheca u Ihova ache.

⁵ Is ika a Samuel, Akumu asjapicnaig nup Isreel asega aijaua an maliyum Mispi, ekpu ugyi Ihova vai caua ainyak.

⁶ Eris ehrasjapicnaig ara an maliyum Mispi um etoh wai, um atladwi an nuhup u Ihova, um atwakam an nadiat iyehki, um ika eahki, Inta mun ago nedo has vai Ihova akaija. Is tas alep ehele nup Isreel a Samuel an maliyum Mispi.

⁷ Eris wat atahaijeg a nup u Filistia mika eris ehrasjapicnaig a nup Isreel Mispi, eris aridjipan a ilpu atimarid u nup u Filistia, mika eri ati nedoa vai nup Isreel. Eris wat atahaijeg a nup Isreel, eris imtitaig nup u Filistia ara.

⁸ Eris ika a nup Isreel ehele Samuel, Namu jim atumop aiek, jam arohwai Ihova Atua uja vai caija, mika yi imiatamaig caija vai nikmai nup u Filistia.

⁹ Is leh inhakli siip is upene a Samuel, um ahlap asega iran, nitai ahlap atnamud vai Ihova: is arohwai Ihova a Samuel vai nup Isreel; is atahaijeg yin a Ihova.

¹⁰ Is wat ahlap an nitai ahlap iyehki a Samuel, eris apam ubutpotet a nup u Filistia par ati nedoa vai nup Isreel: ja is ati inmunuka alupas irai up u Filistia a Ihova an nadiat iyehki, um imiterimterim ra; eris idim auud ra an nuhup u nup Isreel.

¹¹ Eris ahes Mispi a nup Isreel, um apan, um ahau nup u Filistia, um auud ra, um yetpan ubutpotet Bedkar.

¹² Is leh inhat a Samuel an nopan iyehki, um aduwi juju an niblan Mispi in Sen, um anvi nidan par ika Iben-iser (Inhat an natau vaig), um ika, Et mun atau iraija a Ihova um imihum pam an nopan inig.

¹³ Is um uco, eris auatialidi a nup u Filistia, um eti lep apam an pece Isreel: is atapnes nup u Filistia nikmai Ihova ira adiat asega u Samuel.

¹⁴ Eris lep ohuun niji maliyum iji ehki a nup Isreel eris atoraliak a nup u Filistia ehele nup Isreel, ahes Ekron um yetpan Cad; eris lep iknipagki niji pece iran a nup Isreel vai nikmai nup u Filistia, Eris asa nigpa a nup Isreel im nup Emor.

¹⁵ Is tas alep ehele nup Isreel a Samuel ira adiat asega o un.

¹⁶ Is arehed mihtag aien irai iji mesese, um apan Bedel, im Cilcal, im Mispi, um tas alep ehele nup Isreel irai uarin iji igki asega.

¹⁷ Is lep adumoij pan Rema aien; is eteuc nimnim o un eahki; is tas alep ehele nup Isreel aien eahki; is actaig nefata eahki aien vai Ihova.