1 Samuel 6 - Intas Etipup

Nuarin tas alupas 6.

1 Et wat ti pan itac inmohoc et seven, era tas jipe a nup u Filistia, um ika eri evago ara par imiadumoij pan nelcau itap. 10 Era imiapam ara irai kart mat, im lep nitai ahlap an nuarin pece Bed-simes. 19 Era easpan anliin nelcau itap natimi, va nedo inigki et auud ra a Atua. 21 Era abra atimi ara mika eri apan um ugyi nup u Kirjad-jiarim par apam um leh nelcau itap.

¹ Is amen nelcau u Atua an pece Filistia irai mohoc is seven.

² Eris ahlaig a nup u Filistia vai ilpu atimi ahlap ura im ilpu atimi araces ura, um ika, Ecrumu ago inhe aijama va nelcau u Ihova? Asuptecnaig ehelema aijaua nedo inig ecri ago aijama an nimiadumoij pan vaig o un an nuarin o un.

³ Eris ika ara, El eka imiadumoij pan nelcau u Atua u nup Isreel aijaua, akumu jim tup imiadumoij pan aijaua; ja akumu taam imiadumoij pan ehelen nitai ahlap va nedo has unyimia aijaua: uhpu ago cehcehe caua, akupu ato aijaua nitai inig et eti atipagki nikman ehelemia aien vaig.

⁴ Eris ika ara, Inhe nitai ahlap va nedo has inig ecrupu imiadumoij pan ehelen aijama? Eris ika ara, Niji itai auahas caua inyi faiv irai colt, im niji cedo haklin inyi faiv irai colt, et idivaig ilpu atimarid irai up u Filistia et faiv: is tup ethi ache nohocred inig is eteuc iramia asega im lep irai ilpu atimarid unyimia.

⁵ Va nitai inigki akumu ago almui itai auahas caua aijaua, im nalmui hakli cedo era auahas nobohtan ara; akumu imiahpas Atua u nup Isreel aijaua: kit etpu atipagki nikman ehelemia aien, im lep ehele ilpu atmas unyimia, im lep an pece unyimia.

⁶ Eka a uri aijaua par ago ipjin inliimopomia, is idivaig eris ago ipjin inliinmopora a Fero im nup Ijipt? Is wat esjilid ira ra aien, eris idim atcijai atimi o un ara, eris lep atga ura ara.

⁷ Va nitai inigki ago kart mat aijaua, um leh kurimatau inyi ero et eteuc nidenided urau, is um eti atcei rau nitai ahelwei; uhmu athai kurimatau eraigko irai kart, um atipagki ohwat hal urau ehele rau um ati rau anliin neom:

⁸ um leh nelcau u Ihova, um atijai irai kart iyehki; um ikni niji almui itai iji ehki irai colt eka alupai yin aijaua, nitai ahlap va nedo has an nelcau et eche an nahaijin; ja par atcijaig mika yi atga o un.

⁹ Akumu almoi aijaua, el et aridjai an nefalaig inig et yetpan an nuarin pece o un Bed-simes, el et ago nitai has esjilid inig vai caija aien: ja el et eti uce, intupu ato akaija is eti auud caija nikman; is uhumato nitai inig eheleija.

¹⁰ Eris ago nitai inig natimi iji ehki; eris leh kurimatau is ero ara is eteuc nidenided urau, um athai rau irai kart, um ati ohwat hal urau anliin neom:

¹¹ eris atijai nelcau u Ihova irai kart iyehki ara, im nelcau haklin iyehki is amen iran niji hakli cedo irai colt im niji almui itai auahas ra.

¹² Erus atga atoh an nefalaig ahwat kurimatau, an nefalaig inig is yetpan Bed-simes, erus atga pan arau an nefalaig lah, um ilmu an natga urau, erus eti apan an nahaijin ka an nahaijin arau; eris apitac ira rau a ilpu atimarid u nup u Filistia um yetpan an nahaijin pece Bed-simes.

¹³ Eris eldei hwiit ura a nup u Bed-simes an niskanse: eris anani nesganimtara ara, um almoi nelcau iyehki, um imiacitak an nalmoi vaig ura.

¹⁴ Is apan kart iyehki umai Josua nup u Bed-simes, um aiji eahki, an nuarin inig is amen inhat alupas iran: eris atakwai incai irai kart, um ahlap irai ohwat kurimatau eraigko nitai ahlap vai Ihova.

¹⁵ Eris atise nelcau u Ihova a ilpu mapoi Livai, im nelcau haklin iyehki o un, is amen niji almui itai irai colt iran, um atijai an hat alupas iyehki: eris atnamud niji itai ahlap atnamud a nup u Bed-simes, um ahlap irai iji itai ahlap vai Ihova, an nadiat iyehki.

¹⁶ Eris wat almoi nitai inig a ilpu atimarid is faiv u nup u Filistia, eris adumoij pan Ekron ara an nadiat iyehki.

¹⁷ Niji almui itai auahas atimi irai colt ji igki eris ahtai a nup u Filistia vai Ihova, nitai ahlap va nedo has ura; vai nup Astot is ethi, vai nup u Cesa is ethi, vai nup Askelon is ethi, vai nup u Cad is ethi, im lep vai nup Ekron is ethi;

¹⁸ im lep hakli cedo irai colt, et idivaig niji maliyum asega u nup u Filistia eris ohuun a ilpu atimarid is faiv, niji maliyum iji ig marom is arehed nathatahau iran, im lep niji maliyum haklin, um yetpan an hat alupas iyehki eris atijai nelcau u Ihova iran, irai umai Josua nup u Bed-simes; et lep amen inhat iyehki, um imihum pani an nopan inig.

¹⁹ Is auud nup u Bed-simes a Ihova, eris idim adpau anliin nelcau u Ihova ara; maiya, is auud atimi is sevente ira ra aien, eris atimi alupas is fifte: eris taig natimi, vai nitai inig, nikavaig, is auud atimi a Ihova, is esjilid inmas ura.

²⁰ Eris ika a nup u Bed-simes, Et emda a di naiji vaig an nuhup u Ihova Atua itap inig? etpu han eda aien an nahes eheleija o un?

²¹ Eris abra atimi ara mika eri apan ehele nup u Kirjad-jiarim, um ika, Era mun imiadumoij pam nelcau u Ihova a nup u Filistia; akumu asuol sepam aijaua, um imiaridjipam ehelemia.