1 Samuel 5 - Intas Etipup

Nuarin tas alupas 5.

1 Eris imiapan nelcau itap an maliyum Astot a nup u Filistia, um ati an neom o Tecon. 3 Eh auud Tecon, um aldamud, eh auud nup Astot irai emehe has, 8 Et uce neruvaig u Atua vai nup u Cad, eh wat imiapan eahki, 10 et lep uce vai nup Ekron, eh wat imiapan eahki.

¹ ERIS leh nelcau u Atua a nup u Filistia Iben-iser, um imiapan Astot.

² Eris wat leh nelcau u Atua a nup u Filistia, eris imiapan an neom u Tecon um acetaig ubutpotet pan Tecon.

³ Eris wat aiji a nup Astot an nuhihialeg, is idim eropse a Tecon an nesganimtan au nobohtan an nuhup u nelcau u Ihova. Eris leh Tecon ara, um lep atijai yin an nuarin o un.

⁴ Is wat lahlah an tak apnyir, eris wat aiji ara an nuhihialeg, is idim eropse a Tecon an nesganimtan an nobohtan an nuhup u nelcau u Ihova; eris aldamud nidjini Tecon im nikman ero an nuarin cai atgeig sepamki, an neucse neom; is eteuc ehelen nuarin inig ache is idivaig numu.

⁵ Va nitai inig era eti atga an nuarin cai atgeig sepamki au neucse neom u Tecon a ilpu atimi ahlap u Tecon, im natimi asega era apan anliin neom u Tecon ara Astot, um imihum pam an nadiat inigki.

⁶ Is ehtipidai nup Astot nikmai Ihova; is auahas ra aien um auud ra an nemehe has, nup Astot marom im lep nup urai iji uarin marehed mihtag.

⁷ Eris wat almoi a nup Astot mika is idim uco, eris ika ara, Inyi eti amen eheleija nelcau u Atua u nup Isreel: et idim ehtipidai caija nikman, im lep Tecon natmas uja.

⁸ Va nitai inigki eris abra atimi ara um asjapicnaig ilpu atimarid asega u nup u Filistia ehele ra, um ika, Ecrumu ago inhe aijama va nelcau u Atua u nup Isreel? Eris ika ara, Uhmu ahparehed um imiapan Cad nelcau u Atua u nup Isreel. Eris ahparehed ara, um imiapan Cad nelcau u Atua u nup Isreel.

⁹ Eris wat ahparehed ara um imiapan nelcau eahki, is ehtipidai nup an maliyum iyehki nikmai Ihova, um auahas alupas atimi: is auud atimi an maliyum aien, ilpu atimi alupas im lep tup atimi, is eteuc nemehe has irai auitira.

¹⁰ Va nitai inigki eris imiapan Ekron nelcau u Atua. Is wat yetpan Ekron nelcau u Atua, eris ahlaig ijinies a nup Ekron, um ika, Eris ahparehed ara um imiapam nelcau u Atua u nup Isreel eheleija, mika eri atgei caija im lep atimi uja.

¹¹ Eris abra atimi ara um asjapicnaig ilpu atimarid asega u nup u Filistia, um ika, Abra atimi aijaua mika eri imiapan nelcau u Atua u nup Isreel, mika yi adumoij pan an nuarin o un, va yi jim atgei cama im lep atimi unyima: is idim esjilid inmas an maliyum asega iyehki; is ehtipidai emda ra nikma Atua eahki.

¹² Eris leh nemehe has iyehki natimi iji ig eris eti emesmas: is aridjai nahlaig u atimi an maliyum iyehki um yetpan an nohatag.