1 Samuel 4 - Intas Etipup

Nuarin tas alupas 4.

1 Era ahau nup Isreel a nup u Filistia Iben-iser. 3 Era imiapan nelcau itap a nup Isreel, era imtitaig alupas vaig a nup u Filistia. 10 Era lep auahas nup Isreel ara, um atoraliak nelcau itap, um atgei Hofnai im Finehas. 12 Et wat atahaijeg intas vaig a Ilai, et ateuc pan itac aien, um esvi nauinwan. 19 Et ohocred vaig a ehgai Finehas, um apos Ikabot, um mas.

¹ IS apaahni intas o Samuel ehele nup Isreel asega. Eris apan a nup Isreel par ago nedoa vai nup u Filistia, um amen ubutpotet u Iben-iser: ja eris amen Efek a nup u Filistia.

² Eris esyei ra a nup u Filistia um aat irai up Isreel: eris wat ati jipe nedoa ara, eris ahau nup Isreel a nup u Filistia, um atgei ilpu eucsupo an lelitai is idivaig for dausant (4,000).

³ Eris wat asjapicnaig natimi an nuarin amen ura, eris ika a ilpu atimi alupas u nup Isreel, Et a uri a Ihova par auud caija inpig an nuhup u nup u Filistia? Intumu leh nelcau inig akaija Sailo et amen iran intas etipup u Ihova; intu wit leh akaija, kit etpu imiatamaig caija vai ilpu atimi tak atimi iraija.

⁴ Eris abra atimi ara mika eri apan Sailo, um leh pan nelcau is amen iran intas etipup u Ihova Atua emda acen, et ateuc juju an niblai ohwat jerub aien: erus amen eahki a Hofnai im Finehas, ohwat hal u Ilai, u nelcau is amen iran intas etipup u Ihova.

⁵ Eris wat imiapan nelcau et amen iran intas etipup u Ihova an nuarin amen u atimi, eris aunyauwaig ijinies acen a nup Isreel asega; is um ahelu nobohtan vaig.

⁶ Eris wat atahaijeg nohran naunyauwaig iyehki a nup u Filistia, eris ika ara, Et echamecha nohran naunyauwaig ijinies inigki an nuarin amen nan u ilpu Hibru? Eris par ato ara mika eris imiapan nelcau u Ihova an nuarin amen iran ura.

⁷ Eris imtitaig a nup u Filistia: eris um ika ara, Et mun yetpam a Atua an nuarin amen iran ura, Eris lep ika ara, Ah! kaiheuc vai caija! is idim eti eteuc nitai et idivaig inig itu acen um uhum pam.

⁸ Ah! kaiheuc vai caija! etpu imiatamaig caija a di irai ikmai ilpu Atua esjilid iji igki? eris auud nup Ijipt a ilpu Atua iji igki irai iji itai has asega an namasacen.

⁹ Akumu emda aijaua, ak nup u Filistia, um ago nedo o atimi, va aki jim aheca u ilpu Hibru aijaua, et idivaig era mun aheca unyimia ara: ago nedo o atimi aijaua, um ati nedoa.

¹⁰ Eris ati nedoa a nup u Filistia, um ahau nup Isreel; eris aha ara irai imnim ura, athi um athi ehni: eris atgei atimi is ahinag acen; eris emesmas natimi is dirte dausant (30,000) irai up Isreel.

¹¹ Eris atoraliak nelcau u Atua; eris lep atgei Hofnai im Finehas ohwat hal u Ilai.

¹² Is ahes u nedoa a mapoi Benjamin is ethi, um athut, um yetpan Sailo an nadiat iyehki; eris ahpati napelumai o un, is amen nobohtan an nidjinin.

¹³ Is wat yetpan aien, is idim ateuc a Ilai an nitai ateuc an na-haijin nefalaig, um aitgan tas: is ehioehio inliinmopon aien va nelcau u Atua. Is wat yetpam a natimi iyehki an maliyum, um asuptecnaig, eris taig alupas natimi asega.

¹⁴ Is wat atahaijeg nohran taig ura a Ilai, is ika aien, Et echamecha nohran taig inigki? Is auroauro a natimi iyehki, um asuptecnaig ehele Ilai.

¹⁵ Is nainte eet inmesese irai Ilai; is aplan nesganimtan aien, is ehka vai yin nalum itai vaig.

¹⁶ Is ika ehele Ilai a natimi iyehki, Ek mun ahes u nedoa ainyak, ek mun aha an pak au nedoa ainyak inpig, Is ika aien, et echamecha nedoa, ak inhal unyak?

¹⁷ Is tas a natimi iyehki is apos intas aien, um ika, Era mun aha a nup Isreel an nuhup u nup u Filistia, eris atgei natimi is ahinag acen, eris atgei Hofnai im Finehas ohwat hal unyum, eh mun atoraliak nelcau u Atua.

¹⁸ Is wat anvi nelcau u Atua aien, is ateuc pan itac a Ilai an nitai ateuc o un ubutpotet u neucse nathatahau, is esvi nauinwan, ja pah mas aien: is efatimi aien, um opoc nohun. Is tas alep ehele nup Isreel aien irai mesese is forte.

¹⁹ Is opoc a ehgai Finehas inhal u Ilai, um ubutpotet napos vaig u inhal o un: is wat atahaijeg intas aien mika eris atoraliak nelcau u Atua, um lep mika is mas a etmai natamnyu un, im lep natamnyu un, is yetpam nohocred o un iran; is lep apos inhal o un aien.

²⁰ Is wat ubutpotet u inmas o un aien, eris ika a ilpu takata eris aiji ehelen ara, Namu jim imtitaig aiek; na mun apos inhalav atamaig aiek. Ja is eti tas aien, um eti aktaktai intas ura.

²¹ Ja is anvi nidai inhalav par ika Ikabot, (nesgan tas nigki, Neti atimi alupas,) um ika, Era eti lep atimi alupas a nup Isreel: va natoraliak nelcau u Atua, im lep vai inmas u etmai natamnyu un, im lep natamnyu un.

²² Is ika aien, Era eti lep atimi alupas a nup Isreel: va natoraliak nelcau u Atua.