1 Samuel 30 - Intas Etipup

Nuarin tas alupas 30.

1 Era auahas inmaliyum Siklac a nup Amalek. 4 Et ahodaig Atua a Tevit, et ika a Atua ehelen yi apitac ra. 11 Et aiheuc vaig tah nup Ijipt a Tevit, et imiapan Tevit aien ehele ilpu atimi tak atimi iran, et lep lucsei pam aien niji itai asega eris atoraliak ara. 22 Intas alep u Tevit vai niji itai eh atoraliak, mika eri alupai nahaijin imi ilpu atimi ati nedoa, im nahaijin imi ilpu atimi aminjinaig naga. 26 Et imiapan niji itai tup ahtai aien imi ilpu atimi eris aiheuc vai yin ara.

¹ IS wat ti pan itac nadiat is dri, eris yetpan Siklac a Tevit im ilpu eucsupo o un; ja eris upyi hup a nup Amalek um ehcohos pam an nuarin nobohtan u Juta inig et ahes nuritoga iran, im Siklac, um auahas Siklac, um atnamud an cap;

² um arop irai ilpu takata eris amen iran ara: eris eti atgei tah ara is alupas ka haklin, jam lucsei ra, um atga ura.

³ Eris um yetpan an maliyum iyehki a Tevit im ilpu eucsupo o un, um ecetai, ja is atnamud an cap; eris lep arop irai ilpu ehnaa ura, im ilpu halav atamaig ura, im ilpu halav atahig ura, um imiapan ra.

⁴ Eris aunyauwaig a Tevit im ilpu atimi ahced yin, um ehtigtaig, um yetpan an tivaig nemda ura par ehtigtaig.

⁵ Eris arop irai ohwat ehnaa u Tevit, um imiapan rau, nan, Ahinoam nup u Jesriil, im Abical is upyi ehgai Nebal aien nup u Karmel.

⁶ Is ohocred alupas a Tevit; va nitai inig, nikavaig, eris ika natimi iji ehki eri asji yin irai hat: is idim acen inliinmopoi atimi asega; eris ohocred natimi, vai ilpu halav atamaig ura, im ilpu halav atahig ura, athi um athi ehni: ja is ago emda yin a Tevit irai Ihova Atua o un.

⁷ Is ika a Tevit ehele Abaiadar natimi ahlap inhal u Ahimelek, Ek ugyi euc ainyak, mika an imiehio efot ehelek igcaki. Is imiapan efot ehele Tevit eahki a Abaiadar.

⁸ Is ahilek ehele Ihova a Tevit, um ika, Ekpu apitac inpak an nedoa inigki ainyak, ka oʼo? ekpu uhum ra ainyak, ka oʼo? Is ika aien, Namu apitac ra aiek: napu uhum ra aiek, um idim imiaras ra asega, um lep lucsei pam.

⁹ Is idim uco, eris apan a Tevit im ilpu eucsupo o un is siks huntret (600) eris ahced yin ara; eris yetpan an wai yah Bisor ara; eris amen eahki natimi iji ig eris udei ra.

¹⁰ Ja eris apitac ra a Tevit im natimi is for huntret (400): eris amen eahki natimi is tu huntret (200), eris auatialidi ara, is ehka vai ra nalgauwaig vaig inwai yah Bisor.

¹¹ Eris ecet nup Ijipt is ethi ara anliin pece, um imiapan yin ehele Tevit, um alacan nitai caig, is caig aien; eris aluman inwai, is umnyi aien;

¹² eris lep alacan inuarin ohwai ateg avise, im nigai vaine mese is ero: is wat caig aien, is nusjai aien: is eti caig tah nitai caig aien, um eti umnyi tah inwai, ira adiat is dri im nepig is dri.

¹³ Is ika ehelen a Tevit, Naheca u di aiek? na ahes eda aiek? Is ika aien, Ek takuras an pece Ijipt ainyak, um aheca o un tah nup Amalek; kis leh nemehe ainyak vid, ja is par udei nyak a natimi alupas unyak.

¹⁴ Ecris ehcohos pan an nahaiji nup u Kired inig et ahes nuritoga iran aijama, im lep an nahaijin pece iyehki era ohuun a nup u Juta, im lep an nahaiji nup u Keleb inig et ahes nuritoga iran; ecris atnamud Siklac an cap aijama.

¹⁵ Is ika a Tevit, Et upene iram par imiasuol nyak ehele inpak an nedoa inigki, ka oʼo? Is ika aien, Namu asig yi aktit intas vai Atua aiek, mika an eti atgei nyak aiek, um eti atcijaig nyak pan irai natimi alupas unyak; ja ekpu imiasuol euc ainyak ehele inpak an nedoa inigki. Is asig yi aktit intas vai Atua ehelen a Tevit.

¹⁶ Is wat imiasuol yin eahki aien, eris idim terimterim irai pece asega ara; eris hag ara um umwig, um adekdekjai, va niji itai et ahinag iji ig eris atoraliak ara an pece Filistia, im lep an pece Juta.

¹⁷ Is atupun a Tevit um auud ra an jupura, um yetpan an jupura an tak apnyin: is eti umoh tah ira ra; ilpu takuras is for huntret (400) ache, eris ateuc irai kamela ara, um aha.

¹⁸ Is lep lucsei niji itai asega iji ig a Tevit eris atoraliak a nup Amalek: is imiatamaig ohwat ehnaa o un a Tevit.

¹⁹ Is eti ti tah nitai ura, nitai haklin ka nitai alupas, ilpu halav atamaig ka ilpu halav atahig, naga ura, ka tah nitai inig eris atoraliak ira ra ara: is lep lucsei asega a Tevit.

²⁰ Is lucsei siip asega im kurimatau asega u nup Amalek a Tevit; eris uhup um asgi iji igki ara an nuhup u siip im kurimatau is eche, um ika, Niji itai eris atoraliak an nedoa u Tevit mun igki.

²¹ Is yetpan ehele atimi is tu huntret (200) iji ehki a Tevit, eris auatialidi ara, is ehka vai ra nahced Tevit vaig: eris idim ika ehele ra eri amen ara an wai yah Bisor: eris apan ara par aubilid Tevit, um aubilid atimi eris atau imi yin ara: is wat apan ubutpotet ehele atimi iji ehki a Tevit, is aiheuc vai ra aien.

²² Ja eris tas a ilpu ihki atimi asega, im ilpu atimi auatatimi irai ra sji ehki eris ahced Tevit ara, um ika, Intupu eti alupai ra akaija tah inpadiaig inig akaija, inta imiadumoij pam akaija, ehgara ache im ilpu hal ura ehele atimi asega, athi um athi ehni, mika eri lucsei ra ara, um atga ura; va nedo ura, nikavaig, eris eti ahced caija ara.

²³ Ja is ika a Tevit, Ak ilpu etwak, akumu jim ago nedo inig aijaua irai itai iji igki et mun alupai caija a Ihova; et mun imicoho caija aien, um atcijaig pam irai ikmaija inpak an nedoa inig, is ehcohos pam eheleija.

²⁴ Etpu atahaijeg intas unyimia a di an nitai inig? ja etpu apapa pan inuarin o un et asuol an nedoa, im inuarin o un et amen ira aga aien: inyi apapa pan inuarin urau.

²⁵ Is ika aien inyi intas alep im intas ati vai nup Isreel nahaigvaig inigki, ahes an nopan iyehki um imihum pam an nopan inig.

²⁶ Is wat yetpan Siklac a Tevit, is abra atimi aien mika eri imiapan nahaiji itai iji ig is atoraliak an nedoa aien, imi ilpu atimi alupas u nup u Juta, imi ilpu atimi iji ig marom eris upyi aiheuc vai yin ara, um ika, Nitai tup ahtai imi caua nigki irai itai iji ig eris atoraliak an nedoa irai ilpu atimi tak atimi irai Ihova;

²⁷ imi ra eris amen Bedel ara, im lep imi ra eris amen ara Remod inig et ahes nuritoga iran, im lep imi ra eris amen Jatir ara,

²⁸ im lep imi ra eris amen Aroer ara, im lep imi ra eris amen Sifmod ara, im lep imi ra eris amen Estemoa ara,

²⁹ im lep imi ra eris amen Rekal ara, im lep imi ra eris amen ara irai iji maliyum u nup u Jeramiel, im lep imi ra eris amen ara irai iji maliyum u nup u Kinai,

³⁰ im lep imi ra eris amen Horma ara, im lep imi ra eris amen Kor-esan ara, im lep imi ra eris amen Edak ara,

³¹ im lep imi ra eris amen Hibron ara, im lep imi nup urai uari pece asega eris amen iran a Tevit im ilpu atimi o un.