1 Samuel 3 - Intas Etipup

Nuarin tas alupas 3.

1 Et yetpam, ehele Samuel intas o Ihova. 11 Et asuptecnaig ehele Samuel a Atua nauahas vaig u ohwat hal u Ilai im ilpu mapon. 15 Et asuptecnaig intas iyehki ehele Ilai a Samuel, ja et eti merit vaig aien. 19 Era ateuc an tas o Samuel natimi.

¹ IS aheca u Ihova a Samuel an nadualep o un an nuhup u Ilai. Is eti elpat intas o Ihova an nopan iyehki; is eti ahuumtidec tah.

² Is wat asjeuc a Ilai an nuarin o un an nopan iyehki, is lep aplan nesganimtan aien, is ehka vai yin nalum itai vaig;

³ is lep asjeuc a Samuel; eris eti fi alopsei lamp u Atua an neom itap u Ihova is amen nelcau u Atua iran;

⁴ is ahlaig vai Samuel a Ihova: is ika aien, Ainyak ap aigki.

⁵ Is athut ehele Ilai aien, um ika, Ainyak ap aigki; na mun ahlaig vai nyak aiek. Is um ika aien, Ek mun eti ahlaig vai euc ainyak; apan aiek, um lep asjeuc. Is apan aien um lep asjeuc.

⁶ Is aketo a Ihova um ahlaig vai Samuel. Is um atidai a Samuel, um apan ehele Ilai, um ika, Ainyak ap aigki; na mun ahlaig vai nyak aiek. Is ika aien, Ak inhal unyak, ek mun eti ahlaig vai euc ainyak; apan aiek um lep asjeuc.

⁷ Is eti fi ato a Samuel mika Ihova iyehki; eris eti ehvaig intas o Ihova ehelen um uhum pan an nopan iyehki.

⁸ Is eceseij ahlaig a Ihova vai Samuel. Is atidai aien, um apan ehele Ilai, um ika, Ainyak ap aigki; na mun idim ahlaig vai nyak aiek, Is ato a Ilai mika is ahlaig vai nadualep iyehki a Ihova.

⁹ Va nitai inigki is ika a Ilai ehele Samuel, Adumoij pan aiek, um asjeuc: ja el et ahlaig vai euc tah, namu ika aiek, Tas aiek, ak Ihova; et ahgei a naheca unyum inigki. Is apan a Samuel um asjeuc an nuarin o un.

¹⁰ Is apam a Ihova, um aiji, is idivaig irai opan iji ehki, um ahlaig, Ak Samuel, ak Samuel. Is ika a Samuel, Tas aiek; et ahgei a naheca unyum inigki.

¹¹ Is ika a Ihova ehele Samuel, Atahaijeg aiek, ekpu ago tah nitai inig ainyak an pece Isreel, etpu ahelu vaig intikga atimi asega ero eri atahaijeg vaig ara.

¹² An nopan iyehki inki ehneijid vai Ilai ainyak intas asega, kis asaig ainyak vai ilpu hal o un im ilpu mapon: inki atupun ainyak um ago ehni.

¹³ Kis idim asaig ehelen ainyak mika ki aru nedo o ilpu hal o un im ilpu mapon ainyak irai iji mesese; is idim ato nedo has o ohwat halav atamaig o un aien; erus idim ago nedo has esjilid arau, ja is eti acaiji emda rau aien.

¹⁴ Va nitai inigki ek mun asig yi aktit intas inig ainyak ehele atimi an nimnim u Ilai, mika uhpu eti atipagki nedo has u ilpu hal u Ilai im ilpu mapon, irai iji itai ahlap im niji itai tup ahtai, irai iji mesese.

¹⁵ Is asjeuc a Samuel um yetpan an nuhialeg, um asalgei niji tapnes an neom u Ihova: ja is imtitaig a Samuel par asuptecnaig ehele Ilai intas ehvaig iyehki.

¹⁶ Is ahlaig vai Samuel a Ilai, um ika, Ak Samuel inhal unyak. Is ika aien, Ainyak ap aigki.

¹⁷ Is ika aien, Inhe nitai inig et mun asaig ehelum a Ihova? ek ugyi euc ainyak mika an jim ateri vai nyak aiek: etmu aru nedo unyum a Atua, um aru alupas, el et ateri vai nyak tah nitai aiek irai iji itai asega iji ig et mun asuptecnaig ehelum aien.

¹⁸ Is asuptecnaig ehelen niji itai asega a Samuel, is eti ateri tah nitai ehelen aien, Is ika aien, Nauritai u Ihova nigki: etmu ago aien nitai inig et upene iran.

¹⁹ Is auata alupas a Samuel; is atau imi yin a Ihova, um ehneijid intas o un asega.

²⁰ Eris ato a nup Isreel asega, ahes Tan um yetpan Bier-siba, mika eris ati Samuel naprofeta u Ihova.

²¹ Is lep ehcohos pan an maliyum Sailo a Ihova: is ehvaig yin a Ihova ehele Samuel Sailo vai Intas o Ihova.