1 Samuel 28 - Intas Etipup

Nuarin tas alupas 28.

1 Et asgeig irai Tevit a Ekis. 3 Et auahas ilpu takata araces a Saal. 4 Et wat udei yin a Atua et imtitaig a Saal, 7 um ahilek intakata araces. 9 Et wat tas upene ehele intakata araces a Saal, et imiatidai Samuel aien. 15 Et wat atahaijeg intas o un a Saal, et jase aien. 21 Et ahugni Saal a intakata iyehki im ilpu aheca o un, um alaan nitai caig.

¹ ERIS wat asjapicnaig niji pak an nedoa ura a nup u Filistia an nopan iyehki, mika eri ati nedoa vai nup Isreel, is um ika a Ekis ehele Tevit, Na idim ato aiek mika an ahced nyak aiek u nedoa, im lep ilpu eucsupo unyum.

² Is ika a Tevit ehele Ekis, Napu idim ato aiek nitai inig et emda a naheca unyum inigki nago vaig. Is lep ika a Ekis ehele Tevit, Va nitai inig ekpu ati euc ainyak mika an aminjinaig nyak aiek irai iji mesese.

³ Is mun mas a Samuel; eris imitaig yin a nup Isreel asega, um atelmoi yin Rema, inmaliyum o un marom. Is iknipagki ilpu atimi araces, im ilpu atimi iji ig eris tas jipe ara im ilpu agelo has an pece a Saal.

⁴ Eris asjapicnaig a nup u Filistia, um apan, um amen Sunem: is asjapicnaig nup Isreel asega a Saal, eris amen Cilboa ara.

⁵ Is wat ecetai inpak an nedoa u nup u Filistia a Saal, is imtitaig aien; is ehioehio alupas inliinmopon.

⁶ Is wat ahilek ehele Ihova a Saal, is eti tas ehelen a Ihova, is eti tas aien irai umjeg ahnag, ka Urim, ka ilpu profeta.

⁷ Va nitai inigki is um ika a Saal ehele ilpu aheca o un, Ahilek tah intakata inig vai nyak aijaua, et tas jipe aien im nagelo has, mika ki apan ehelen ainyak, um ahilek ehelen. Eris ika ehelen a ilpu aheca o un, Et idim amen En-tor a intakata et ethi et tas jipe aien im nagelo has.

⁸ Is ago nedo efaifa a Saal, um aso yin ira apelumai is eche; is apan aien, erus ahced yin natimi is ero; taijis apan ahtaij ehele intakata iyehki an nepig: is ika aien, Ek ugyi euc ainyak mika an ago nedo apat unyum aiek irai nagelo has, um iminusjai ehelek natimi inig ekpu aniv yin ehelum ainyak.

⁹ Is ika ehelen a intakata iyehki, Na idim ato aiek nedo inig is mun ago a Saal, nikavaig, is atgei ra sji igki aien era tas jipe ara im ilpu agelo has, im lep ilpu atimi araces, um iknipagki ra an pece: na a uri aiek par ati nitai apro itai vai nyak, mika eri atgei nyak?

¹⁰ Is asig yi aktit intas vai Ihova a Saal ehelen, um ika, Ek idim tas inveijec an nuhup u Ihova ainyak, um ika, Napu eti leh neruvaig has aiek va nitai inigki.

¹¹ Is um ika a intakata, Ekpu iminusjai di ehelum ainyak? Is ika aien, Iminusjai Samuel ehelek aiek.

¹² Is wat ecet Samuel a intakata, is aunyauwaig ijinies aien: is um tas a intakata ehele Saal, um ika, Na a uri aiek par ahiyek nyak? nai idim Saal aiek.

¹³ Is ika a natimarid ehelen, Namu jim imtitaig aiek: na ecetai inhe aiek? Is ika a intakata ehele Saal, Ek mun ecet natimi alupas et ethi ainyak nahesvaig an nobohtan um aridjipam.

¹⁴ Is ika ehelen a Saal, Et idivanhe aien? Is ika a intakata, Et aridjipam tah nefatimi; et mun adahpoi yin aien an napelumai itac. Is ato a Saal, mika Samuel iyehki; is atpuse aien um eas se nesganimtan an nobohtan, um ecen vai yin.

¹⁵ Is ika a Samuel ehele Saal, Na a uri aiek par imiedohalav nyak, um iminusjai nyak? Is ika a Saal, Et alupas nohocred unyak; era mun ati nedoa vai nyak a nup u Filistia; et mun udei nyak a Atua, um eti lep tas ehelek, et eti tas aien irai ilpu profeta, ka irai umjeg ahnag: va nitai inigki ek mun ahlaig vai euc ainyak, mika an asuptecnaig nedo inig inki ago ainyak.

¹⁶ Is um ika a Samuel, Na mun ahilek ehelek aiek vanhe, et wat udei euc a Ihova, um atimi tak atimi iram?

¹⁷ Et mun ago nedo inig vai yin a Ihova, et idivaig is tas vai nyak aien: et mun atipagki nelcau an nikmam a Ihova, um alupai natimi eblaamnem unyum, Tevit marom:

¹⁸ va nedo unyum, nikavaig, as eti atahaijeg intas o Ihova aiek, um eti imiaiji intas edemda o un vai nup Amalek, va nedo inig et mun ago nitai inig vai euc a Ihova an nadiat inig.

¹⁹ Im lep inig, etpu atcijaig nup Isreel im lep euc a Ihova pan irai up u Filistia: napu amen aiek im ehtaij halav atamaig unyum erahki ehelek umaatmas imraig: etpu lep atcijaig inpak an nedoa u nup Isreel a Ihova pan irai up u Filistia.

²⁰ Is um auroauro a Saal, um eropse an nobohtan, um jase an nohun asega; is imtitaig alupas aien vai intas iji ehki u Samuel: is tup tiih nemda iran; is eti caig tah nitai caig aien an nadiat asega im lep an nepig asega.

²¹ Is apan ehele Saal a intakata, um ecet yin, mika is alupas nohocred o un, um ika ehelen, Et mun imiaiji intas unyum a naheca atahig unyum inigki, um eti aktaktai alupas numoh unyak, um atahaijeg intas unyum inig as asaigki ehelek aiek.

²² Va nitai inigki ek ugyi euc ainyak, mika an atahaijeg intas o naheca atahig unyum inigki aiek, um ika ki ati tah nuarin nitai caig an nuhup unyum ainyak; namu lep hag aiek, mika an emda aiek an natga unyum an nefalaig.

²³ Ja is esjum aien, um ika, Inki eti caig tah nitai caig ainyak. Ja erus imiisjisitai ehelen ahwat aheca o un, im lep intakata; is atahaijeg intas o ehtaij aien. Is um uce, is ahes an nobohtan aien, um atidai, um ateuc an tinan.

²⁴ Is eteuc inhakli kurimatau upene ehele intakata an nimnim; is auroauro aien um atgei, um leh flaur, um aplamod, um ahen nareto is ti leven iran:

²⁵ is leh aien um ati an nuhup u Saal, im lep an nuhup u ohwat aheca o un; taijis hegaig ahtaij: ja par apitac um atidai ahtaij um atga u ehtaij an nepig iyehki.