1 Samuel 27 - Intas Etipup

Nuarin tas alupas 27.

1 Et wat ato a Saal mika et amen Cad a Tevit et eti lep apitac yin aien. 5 Et ugyi Ekis a Tevit vai Siklac. 8 Et wat aat aien irai up urai taka uarin, et ika aien ehele Ekis et mun aat irai up u Juta aien.

¹ IS aktaktai an liinmopon a Tevit, um ika, Ekpu mas ainyak an nikmai Saal an tah nadiat: et upene vai nyak mika ki auroauro um aha, um yetpan an pece u nup u Filistia; etpu auatialidi a Saal par aketo, um ahilek nyak an tah anuarin pece Isreel: va nitai inigki inki ahapan ainyak va nikman.

² Is um atidai a Tevit, um ahced inpece, aien im natimi is siks huntret (600) eris amen ehelen ara, um yetpan ehele Ekis inhal u Meok, natimarid u nup u Cad.

³ Is amen Cad a Tevit ehele Ekis, aien im ilpu eucsupo o un, ilpu atemetan asega marom, athi um athi ehni, nikavaig. Tevit im ohwat ehnaa o un, Abinoam nup u Jesriil, im Abical nup u Karmel is uhup aien um ehgai Nebal.

⁴ Eris asuptecnaig ehele Saal mika is ahapan Cad a Tevit: is eti aketo aien um ahilek yin.

⁵ Is ika a Tevit ehele Ekis, El et upene inliinmopom aiek vai nyak, eri alupai nyak tah inuarin an tah inmaliyum anliin pece, mika ki amen iran ainyak: et a uri a naheca unyum inigki par amen ehelum an maliyum u natimarid?

⁶ Is um alupai yin Siklac a Ekis an nadiat iyehki: va nitai inigki era ohuun Siklac a ilpu atimarid u nup u Juta, um imihum pam an nopan inig.

⁷ Is amen a Tevit an pece u nup u Filistia irai yier is ethi, im inmohoc is for.

⁸ Eris aridjai a Tevit im ilpu eucsupo o un, um ati nedoa vai nup u Cisur, im nup u Ciser, im nup Amalek: eris upyi amen an pece iyehki itu acen ara sji ehki, an nefalaig et yetpan pan Sur, im lep an pece Ijipt.

⁹ Is auud nup uran pece iyehki a Tevit, um eti imialep tah natamaig, ka tah intakata, mika yi umoh; jam atoraliak siip, im kurimatau, im togke, im kamela, im napelumai, um adumoij, um apan ehele Ekis.

¹⁰ Is ika a Ekis, Na mun ati nedoa eda aiek inpig? Is ika a Tevit, An nahaijin nup u Juta inig et ahes nuritoga iran, im nahaijin nup u Jeramiel inig et ahes nuritoga iran, im nahaijin u nup u Kinai.

¹¹ Is eti imialep tah natamaig ka tah intakata a Tevit mika yi umoh, um asuptecnaig tah intas Cad; is ika aien, Kit eri asuptecnaig nedo uja ara, um ika, Is ago nitai inig a Tevit. Is lep idim uco nedo o un an nopan iyehki asega, is amen aien an pece u nup u Filistia.

¹² Is ateuc irai tas o Tevit a Ekis, um ika, Etpu esjilid namcel vai yin u nup Isreel ilpu atimi ehpan iran va nedo o un; va nitai inig etpu aheca unyak aien irai iji mesese.