1 Samuel 26 - Intas Etipup

Nuarin tas alupas 26.

1 Era asuptecnaig namen u Tevit ehele Saal a nup u Sif, et yetpan Hakila aien um aat irai Tevit. 5 Et yetpan nuarin amen iran u Saal a Tevit, et atapnes Abiseai aien va yi jim atgei Saal, ja et lehpan inmopul im inhubej u Saal aien. 13 Et acaiji Abner a Tevit, 18 um ated Saal. 21 Et ika a Saal et mun ago nedo has aien.

¹ ERIS aketo a nup u Sif, um ham Cibea ehele Saal, um ika, Et idim atpuh a Tevit an nedoon Hakila, an nahaijin Jesimon.

² Is um atidai a Saal um asuol an namasacen Sif; eris ahced yin natimi is dri dausant (3,000), eris esjilid ara irai up Isreel, mika yi ahilek Tevit an namasacen Sif.

³ Is amen a Saal an nedoon Hakila an nahaijin Jesimon an nefalaig iyehki. Ja is amen a Tevit an namasacen; is ato aien mika is apitac yin a Saal an namasacen.

⁴ Va nitai inigki is abra atimi ahilek namen u Saal a Tevit, is um ato aien mika is idim ham a Saal.

⁵ Is atidai a Tevit um yetpan an nuarin inig is amen iran a Saal: is almoi nuarin inig a Tevit is asjeuc iran a Saal, im lep Abner inhal u Ner, natimi alupas u ilpu eucsupo o un: is asjeuc juju an niblan naga a Saal; eris asjeuc natimi um arehed iran.

⁶ Is um tas ehele Ahimelek nup u Hed, im Abiseai inhal u Seruaia, etwai Joab a Tevit, um ika, Etpu ahced nyak a di um asuol sepan an nuarin amen iran o un? Is ika a Abiseai, Inki ahced euc ainyak, um asuol sepan.

⁷ Erus um yetpan ehele atimi a Tevit im Abiseai an nepig: is idim asjeuc a Saal um umjeg juju an niblan naga, eris aduwi se inmopul o un an nobohtan u nilaig o un: eris asjeuc a Abner im natimi um arehed iran.

⁸ Is ika a Abiseai ehele Tevit, Et mun atcijaig natimi tak atimi iram a Atua pan iram an nadiat inig: va nitai inig ek ugyi euc ainyak, mika an abrai nyak aiek, mika ki ucjapidaig se yin ainyak an nobohtan an mopul inigki, um ecethi iran, inki eti ecero ahcai yin ainyak.

⁹ Is ika a Tevit ehele Abiseai, Jim atgei yin aiek: etpu ada nikman a di va natimi inig is ati yin a Ihova, jam eti ago nedo has?

¹⁰ Is aketo a Tevit, um ika, Ek tas inveijec ainyak au nuhup u Ihova, um ika, Etpu auud yin a Ihova; ka etpu yetpam nadiat u inmas o un; ka uhpu atgei yin, etu wit ago nedoa aien.

¹¹ Etmu atapnes nyak a Ihova, vai ki jim ada nikmak ainyak vai natimi inig is ati yin a Ihova: ja, ek ugyi euc ainyak, mika an leh inmopul o un aiek, et eteuc u nilaig o un, im inhubej an wai, tu lep atga ujau akaijau.

¹² Is idim leh inmopul a Tevit im inhubej an wai iyehki u nilaig u Saal; erus atga urau arau, ja is eti ecet rau tah, um eti ato tah, um eti aiji lahlah tah: eris umjeg ara asega; is ika a Ihova eri umjeg upene ara.

¹³ Ja is apan an nahaijin eahki a Tevit, um aiji itac acen, ijinies an lolan nedoon is ethi; eris apohod jipe alupas vai ra ara:

¹⁴ is ahlaig ijinies a Tevit ehele atimi, im lep ehele Abner inhal u Ner, um ika, Ak Abner, na a uri aiek par eti asaig tah intas? Is asan tas a Abner, um ika, Aiek di aigki, na ahlaig aiek vai natimarid?

¹⁵ Is ika a Tevit ehele Abner, Na idim atimi emda aiek, et eti idivaig euc tah irai up Isreel: na a uri aiek par eti aminjinaig natimi alupas unyum natimarid? is apam tah ira atimi anliin nokoro ehelemia, mika yi atgei natimi alupas unyum, natimarid marom.

¹⁶ Et eti upene nedo inig na mun ago aiek, Ek tas inveijec ainyak an nuhup u Ihova, um ika, Et idim upene nitai inig, mika an mas aiek, va nedo unyum, nikavaig, na mun eti aminjinaig natimi alupas unyum aiek, aien aigki is ati yin a Ihova. Im lep inig, almoi aiek, inmopul u natimarid ap igki, im inhubej an wai, et mun amen u nilaig o un.

¹⁷ Is ato nohrai Tevit a Saal, um ika, Nohram nigki, ka oʼo, ak inhal unyak Tevit? Is ika a Tevit, Et idim nohrak, ak natimi alupas unyak, natimarid.

¹⁸ Is um ika aien, Na a uri aiek, ak natimi alupas unyak, par apitac um ahau naheca unyum inigki? ek mun ago inhe ainyak 1 ka nedo has unyak kis ago ainyak nevitai?

¹⁹ Va nitai inigki ek ugyi euc ainyak, ak natimi alupas unyak, natimarid, mika an atahaijeg intas o naheca unyum inigki aiek. El et auahas inliinmopom a Ihova vai nyak, etmu eropse inliinmopon aien vai nitai ahlap: ja el era ago nedo inigki a ilpu hal u atimi, etmu erekinman ira ra an nuhup u Ihova; era mun ahlo nyak ara an nadiat inig, an namen unyak an pece u Ihova, um ika, Apan aiek, um aheca u tak atua.

²⁰ Va nitai inigki uhmu jim atgei nyak an nuhup u Ihova: et mun idim apam igcaki a natimarid u nup Isreel, mika yi ahilek inhumiaig aien; et idivaig et wat ahilek inman tah irai edoon.

²¹ Is par ika a Saal, Ek mun ago nedo has ainyak: adumoij pani aiek, ak inhal unyak Tevit: inki idim eti lep auahas euc ainyak, va nedo unyum, nikavaig, na mun aiheuc vai nyak aiek an nadiat inig, um eti atgei nyak: ek mun ago nedo ahnag ainyak; et mun esjilid nedo has unyak.

²² Is lep tas a Tevit, um ika, Almoi, inmopul u natimarid mun igki! etmu apam igcaki tah intakuras, um leh.

²³ Etmu aru ira atimi asega nedo atoh im nedo inveijec ura a Ihova: is idim atcijai euc pam irak a Ihova an nadiat inig, ia ek mun ika ainyak, Inki idim eti ada nikmak ainyak vai natimi inig is ati yin a Ihova.

²⁴ Im lep inig, ek idim aiheuc vai euc ainyak an nadiat inig, um eti atgei euc; etmu idim uco, etmu aiheuc vai nyak a Ihova, um eti atgei nyak, jam imiatamaig nyak vai niji itai has asega.

²⁵ Is lep aketo a Saal, um ika ehele Tevit, Namu ahesmoij aiek, ak inhal unyak Tevit: napu emda aiek, um ago nauritai alupas; napu emda aiek um esjilid ira atimi. Is um uce, is atga o un a Tevit; is adumoij an nuarin o un a Saal.