1 Samuel 25 - Intas Etipup

Nuarin tas alupas 25.

1 Et mas a Samuel. 2 Et amen Peran a Tevit um abra atimi mika eri apan ehele Nebai. 10 Et auahas inliinmopoi Tevit a Nebai vai intas ijinies o un, et ika a Tevit yi auahas yin. 14 Et wat ato a Abical, 18 et leh nitai tup ahtai aien, 23 um ago nedo arapakau, 32 um ago eropse inliinmopoi Tevit vaig. 36 Et wat atahaijeg vaig a Nebai et mas aien. 39 Et leh Abical im Abinoam a Tevit, erau ohwat ehnaa o un arau. 44 Eh alupai Maikal imi Faltai.

¹ IS mas a Samuel; eris asjapicnaig a nup Isreel asega, um imitaig yin, um atelmoi yin an nimnim o un Rema. Is atidai a Tevit um apan an namasacen Peran.

² Is eteuc a natimi is ethi Meon, is ohuun nuari obohtan aien Karmel; is atimi ikni itai is ahinag aien; is eteuc siip o un is dri dausant (3,000), im nanin is wun dausant (1,000): is ucsei nalau irai siip o un aien Karmel.

³ Nidai natimi iyehki Nebal; nidai ehgan Abical: is takata arapakau aien, um eklim upene nesganimtan: ja is atimi metug aien, is maumau nedo o un; is auroauro aien um edemda, um idivaig kuri.

⁴ Is atahaijeg a Tevit an namasacen, mika is ucsei nalau irai siip o un a Nebal.

⁵ Is abrai ilpu takuras o un is ten a Tevit; is ika a Tevit ehele ilpu takuras iji ehki, Aridjipan Karmel aijaua, um apan ehele Nebal, um ika, Ek aiheuc vai yin ainyak:

⁶ etmu idim uco intas unyimia ehelen et amen upene aien, Etmu eteuc nigpa ehelum, im nigpa ehele atimi an nimnim unyum, im nigpa ehele niji itai asega unyum.

⁷ Ek mun ahgei ainyak mika era ucsei nalau irai siip unyum natimi: eris wat amen ehelema a ilpu atimi aminjinaig siip unyum, ecris eti ago tah nedo has vai ra aijama, eris eti ahneg tah nitai ura an namen asega ura Karmel.

⁸ Ahodai ilpu takuras unyum aiek, erupu asuptecnaig ehelum ara. Va nitai inigki etmu upene inliinmopom aiek vai ilpu takuras unyak: ecra ham an nadiat upene aijama: ek ugyi euc ainyak, mika an alupai ilpu aheca unyum iji igki, im inhal unyum Tevit, tup hal itai ubutpotet ehelum.

⁹ Eris wat yetpan a ilpu takuras u Tevit, eris tas ehele Nebal ara, is idivaig intas iji igki asega an nidai Tevit.

¹⁰ Eris wat tas ehni ara, is um tas a Nebal ehele ilpu aheca u Tevit, um ika, Di Tevit? im di inhal u Jese? era ahinag a ilpu aheca an nopan inig era aha athi athi vai ilpu atimi alupas ura ara.

¹¹ Inki idim eti leh nareto unyak, im inwai unyak, im niji itai eklim edo irai pece iji ig, ek mun atgei ainyak, incai ilpu atimi ucsei nalau irai siip unyak, um alupai atimi iji ig, ek eti ato ainyak mika era ahes eda ara.

¹² Eris lep ahidai ra a ilpu takuras u Tevit, um adumoij, um apan, um asuptecnaig ehelen intas iji ehki asega.

¹³ Is ika a Tevit ehele ilpu eucsupo o un, Akumu aroraijiraig nauitoga unyimia iramia aijaua asega. Eris aroraijiraig nauitoga ura ira ra natimi asega; is um aroraijiraig nauitoga o un iran a Tevit: eris ahced Tevit natimi is idivaig for huntret (400); ja eris amen ehele aga ura natimi is idivaig tu huntret (200).

¹⁴ Ja is asuptecnaig ehele Abical ehgai Nebal tah intakuras is ethi u Nebal, um ika, Et mun idim abra atimi a Tevit, mika eri ahes an namasacen, um apam, um aiheuc vai natimi alupas uja; ja is atuh ra aien.

¹⁵ Ja eris ago nedo upene vai cama natimi iji ehki; eris eti auahas cama ara; eris eti ahneg tah nitai unyima, an nopan asega ecris uhum jipe aijama im lep ra an namen unyima anliin pece.

¹⁶ Eris idivaig nathatahau ara imi cama an nadiat im lep an nepig, an nopan asega ecris amen ehele ra aijama um asgi siip unyima.

¹⁷ Va nitai inigki namu ato aiek, um aktaktai nedo inig napu ago aiek; eris idim ika eri auahas natimi alupas uja im atimi asega an nimnim o un: et esjilid nedo maumau o un, et ehka vaig tah intas vaig ehelen.

¹⁸ Is auroauro a Abigal, um lucsei nareto is tu huntret, im nide vaine, is ohua inhubej arasin nanin is ero, im siip is faiv eris atoh, im pakinne eris ahen is ohua incat is faiv, im nigai vaine mese is wun huntret, im nohwai ateg avise is uarin is tu huntret, um atijai irai togke.

¹⁹ Is ika aien ehele ilpu aheca o un, Akumu uhup irak aijaua; ekpu idim apitac caua ainyak. Ja is eti asuptecnaig ehele Nebal natamnyu un aien.

²⁰ Is idim uco, is wat ateuc a togke aien, um asuol an nuarin isas an nedoon is ethi, eris asuol a Tevit im ilpu eucsupo o un an nuarin iyehki; is ehtet ira ra aien.

²¹ Is mun ika a Tevit, Ek idim auoh takitai ainyak, par aminjinaig niji itai asega u nat naico an na-masacen; eris idim eti ahneg tah nitai is ohuun aien: ja et mun aru nedo upene unyak aien an nedo has.

²² Ek idim tas inveijec ainyak an nuhup u Atua, um ika, Inki eti udei ainyak um yetpan an nuhialeg tah natamaig ira ra asega era amen ehelen ara.

²³ Is wat ecet Tevit, a Abical, is auroauro aien, um asuol a togke o un, um eropse an nuhup u Tevit an nesganimtan, um atpuse,

²⁴ um eropse u neduon, um ika, Uhmu atijai irak,—irak marom— nedo has inigki: ja ek ugyi euc ainyak, mika yi tas ehelum a naheca atahig unyum inigki: namu lep atahaijeg aiek intas o naheca atahig unyum inigki.

²⁵ Ak natimi alupas unyak, ek ugyi euc ainyak, mika an jim aktaktai natimi auatatimi inigki, Nebal marom: et tup apapa nidan pan an nedo o un; et idan Nebal (Nahnag), et eteuc nedo ahnag ehelen: jai ilpu takuras u natimi alupas unyak inigki, as abrai ra aiek, ek mun eti ecet ra a naheca atahig unyum inigki.

²⁶ Ak natimi alupas unyak, Ek idim tas inveijec ainyak an nuhup u Ihova, im lep an nuhup unyum, um ika, et mun idim atapnes euc a Ihova, va an jim apam aiek, um atgei atimi, um aru nedo iyehki an nikmam; va nitai inigki erumu idivaig Nebal a ilpu atimi tak atimi iram, im lep ra sji igki era ika ara eri auahas natimi alupas unyak inigki.

²⁷ Im lep inig, naiheuc inigki et mun leh pam a naheca atahig unyum inigki, imi natimi alupas unyak inigki, eri alupai ilpu takuras iji ig era ahced natimi alupas unyak inigki ara.

²⁸ Ek ugyi euc ainyak mika an jim aru nedo has u naheca atahig unyum inigki aiek: nikavaig, etpu idim ago aktit natimi alupas unyak inigki a Ihova, im lep ilpu hal o un im ilpu mapon; vaig inig nikavaig, et ago nedoa u Ihova a natimi alupas unyak inigki; eris eti lep ecetai tah nedo has iram irai iji adiat asega unyum.

²⁹ Ja et mun atidai a natimi et ethi par apitac euc, um ika yi atgei euc: ja uhpu aso nesga atimi alupas unyak inigki an nuhud itai umoh iran u Ihova Atua unyum; ja etpu atcijaig ilpu atimi tak atimi iram aien, et idivaig inhat an namaka.

³⁰ Im lep inig, etu wit ago vai natimi alupas unyak inigki a Ihova, et idivaig nedo upene asega et mun asaig vai euc aien, um ati euc natimarid u nup Isreel;

³¹ an eti ohocred aiek, um eti ruud inliinmopoi natimi alupas unyak inigki, nikavaig, an eti tup atgei atimi aiek, um eti aru nedo iyehki, ak natimi alupas unyak: ja etu wit ago nedo upene vai natimi alupas unyak inigki a Ihova, namu imiehva naheca atahig unyum inigki aiek.

³² Is ika a Tevit ehele Abical, Naaurinig vai Ihova Atua u nup Isreel inig et mun abrai euc aien an nadiat inig, mika an aubilid nyak aiek:

³³ im lep naaurinig vai intas unyum, namu ahesmoij aiek, na mun atapnes nyak aiek an nadiat inig, vai ki jim apam ainyak par atgei atimi, um aru nedo iyehki an nikmak.

³⁴ Ek idim tas inveijec ainyak an nuhup u Ihova Atua u nup Isreel, aien aigki et mun atapnes nyak aien, vai ki jim auahas euc ainyak, um ika, El et eti fi auroauro aiek um apam, um aubilid nyak, el et eti umoh um yetpan an nuhialeg tah natamaig ira ra asega, era amen ehele Nebal ara.

³⁵ Is um uco, is leh ehelen a Tevit niji itai tup ahtai iji ig is imiapan ehelen aien, um ika ehelen, Apan an nimnim unyum aiek an liinmopom eropse; ek mun atahaijeg intas unyum ainyak, et lep upene inliinmopok ainyak vai euc.

³⁶ Is apan ehele Nebal a Abical; is ago nitai caig alupas an nimnim o un aien, is idivaig nitai caig u tah natimarid; is imiacitak inliinmopoi Nebal, is ahnag alupas aien vai waina: va nitai inig is eti asuptecnaig tah nitai ehelen a ehgan, um yetpan an nuhialeg.

³⁷ Ja is wat lahlah an tak apnyin, is wat ti waina ehele Nebal, is eteuc lelen: is wat asuptecnaig ehelen nitai iji igki a ehgan, is mas inliinmopon, is um idivaig inhat aien.

³⁸ Is wat ti pan itac nadiat is idivaig ten, is auud Nebal a Ihova, ja is pah mas aien.

³⁹ Is wat atahaijeg a Tevit mika is mas a Nebal, is ika aien, Naaurinig vai Ihova inig et mun aru irai Nebal nitai ehcamai vaig unyak aien, um atapnes nedo has u naheca o un inigki: et mun aru nauatatimi u Nebal iran a Atua. Is abra atimi a Tevit, mika eri tas ehele Abical mika yi leh yin ehgan.

⁴⁰ Eris wat yetpan ehele Abical a ilpu aheca u Tevit Karmel, eris tas ehelen ara, um ika, Et mun abrai cama a Tevit, mika ecri apam ehelum aijama, um leh euc ehgan.

⁴¹ Is atidai aien, um atpuse an nesganimtan um yetpan an nobohtan, um ika, Etmu aheca a naheca atahig unyum inigki, par yiri neduei ilpu aheca u natimi alupas unyak.

⁴² Is auroauro a Abical, um atidai, um ateuc irai togke, eris lep apitac yin a ilpu atahig o un is faiv; is apitac ilpu atimi iji ehki aien is abrai ra a Tevit, is ehgan aien.

⁴³ Is lep leh Ahinoam nup u Jesriil a Tevit; erus ohwat ehnaa o un arau ero.

⁴⁴ Va nitai inig, nikavaig, is leh Maikal inhal o un, ehgai Tevit, a Saal, um alupai Faltai inhal u Lees, is up u Calim aien.