1 Samuel 24 - Intas Etipup

Nuarin tas alupas 24.

1 Et amen an mun nij En-citai a Tevit, et aldei nilpun napelumai u Saal aien jam eti atgei yin. 8 Et ehvaig aien va nedo inigki, et eti ago nedo has vai Saal aien. 16 Et ika a Saal et maumau nedo o un, et lep ugyi Tevit aien mika yi asig yi aktit intas ehelen aien ja et par atga o un aien.

¹ IS wat ahes u napitac irai up u Filistia a Saal, eris asuptecnaig ehelen, um ika, Et idim amen a Tevit an namasacen En-citai.

² Ja is lucsei atimi is dri dausant (3,000) a Saal, is ehtai ra aien irai up Isreel asega, um apan, mika eri ahilek Tevit im ilpu atimi o un irai hehteuc u anin aleg.

³ Is atga aien, um yetpan u nimai siip an nefalaig, is eteuc inmun nij eahki; is apan anliin mun nij a Saal mika yi atumop aien: eris amen a Tevit im ilpu eucsupo o un irai ahaijin mun nij iyehki.

⁴ Eris ika ehele Tevit a ilpu eucsupo o un, Et mun yetpam nadiat iyehki is asuptecnaig ehelum a Ihova, um ika, Ekpu atcijaig natimi tak atimi iram pam iram ainyak, mika an ago vai yin et idivaig inmerit unyum. Ja is par atidai a Tevit um eklim aldei nilpun napelumai esjilid u Saal.

⁵ Ja is par apitac um ated Tevit inliinmopon, nikavaig, is aldei nilpun napelumai u Saal.

⁶ Is ika aien ehele ilpu eucsupo o un, Et itap vai nyak par ago nitai inigki vai natimi alupas unyak, natimi inig is ati yin a Ihova, um adaigjai nikmak vai yin, nikavaig, eris ati yin vai Ihova,

⁷ Is uce, is atapnes ilpu aheca o un a Tevit vai niji tas iji igki, um acaiji ra, va eri jim aat irai Saal. Ja is atidai a Saal, um udei inmun nij, um atga o un.

⁸ Ja is par apitac a Tevit um atidai, um ahes an mun nij, um alau ijo, um ahlaig vai Saal, um ika, Ak natimarid natimi alupas unyak, Is wat ahidai yin a Saal, um almoi, is atpuse a Tevit an nesganimtan an nobohtan, um aiheuc vai yin.

⁹ Is ika a Tevit ehele Saal, Na a uri aiek par aktaktai intas o atimi, nikavaig, et merit a Tevit par auahas euc?

¹⁰ Na mun almoi aiek an nadiat inigki mika et mun atcijaig euc pam irak inpig an mun nij a Ihova: era mun abrai nyak hal atimi mika ki atgei euc: ja ek mun aiheuc vai euc ainyak; ek mun ika ainyak, Inki eti adaigjai nikmak ainyak vai natimi alupas unyak; is idim ati yin a Ihova.

¹¹ Im lep inig, ak etmak, almoi, maiya, almoi nilpun napelumai esjilid unyum an nikmak: kis wat aldei nilpun napelumai esjilid unyum ainyak, jam eti atgei euc, namu ato aiek va nedo unyak, um ahaijeg, mika et eti amen tah nedo has, ka tah nedo imipalea an nikmak; kis mun eti ago nedo acalacal vai euc ainyak; ja na ahau nyak aiek par atgei nyak.

¹² Etmu almaijidjid caijau a Ihova; etmu lep aru nedo unyum vai nyak a Ihova: ja inki eti ago tah nitai iram ainyak.

¹³ Et idivaig et asaig intas ecsipece u ilpu itu, um ika, Etmu ahes nedo has ehele ilpu atimi has: ja inki eti ago tah nitai iram ainyak.

¹⁴ Et mun apam igcaki a natimarid u nup Isreel vai di? na mun apitac di aiek? na apitac kuri mas aiek; na apitac inhumiaig aiek.

¹⁵ Va nitai inigki etmu atimi almaijidjid a Ihova, um almaijidjid caijau, um almoi, um asuptecnaig nedo unyak, um imialep nyak va nikmam.

¹⁶ Is wat tas ehni irai tas iji ehki ehele Saal a Tevit, is ika a Saal, Nohram nigki, ka oʼo, ak Tevit inhal unyak? Is lep taig alupas a Saal.

¹⁷ Is ika ehele Tevit aien, Et atoh nedo unyum, um esjilid irai nedo unyak: na mun ago nedo upene vai nyak aiek, kis wat ago nedo has vai euc ainyak.

¹⁸ Er idim ato an nadiat inigki, mika na mun ago nedo upene vai nyak aiek: va nedo unyum, nikavaig, et wat atcijaig nyak pan iram a Ihova, na mun eti atgei nyak aiek.

¹⁹ El et ecet natimi tak atimi iran tah, inyi idim eti atcijaig upene yin aien; va nitai inig etmu ago nedo upene vai euc a Ihova, va nedo upene inig na mun ago vai nyak aiek an nadiat inigki.

²⁰ Im lep inig, ek idim ato upene ainyak mika apu idim atimarid aiek, uhpu lep ati aktit ehelum nelcau u nup Isreel.

²¹ Va nitai inig namu asig yi aktit intas aiek vai Ihova ehelek, mika an eti atgei ilpu hal unyak aiek im ilpu mapok, erupu epitpitac irak ara, um eti ohpodohpod nidak ehele idai ilpu retpok.

²² Is asig yi aktit intas a Tevit ehele Saal. Is apan an nimnim o un a Saal; ja is aridjipan an mun nij a Tevit im ilpu eucsupo o un.