1 Samuel 23 - Intas Etipup

Nuarin tas alupas 23.

1 Et wat ahodaig Ihova a Tevit ira Abaiadar, et imicoho nup u Kila aien. 7 Et wat asuptecnaig ehelen a Atua va napam u Saal im nedo efaifa u nup u Kila, et udei Kila aien um aha. 14 Et yetpam ehelen Sif a Jonadan um adi lelen. 19 Era ehvaig yin ehele Saal a nup u Sif. 25 Eh imiaras yin vai Saal Meon va napaahni an pece u nup u Filistia. 29 Et amen En-citai aien.

¹ ERIS asaig ehele Tevit, um ika, Era idim ago nedoa vai nup u Kila a nup u Filistia, um atoraliak korn irai uarin auud iran.

² Va nitai inigki is ahodaig Ihova a Tevit, um ika, Ekpu apan ainyak, um auud nup u Filistia, ka oʼo? Is ika a Ihova ehele Tevit, Apan aiek, um auud nup u Filistia, um imicoho nup u Kila.

³ Eris ika ehele Tevit a ilpu eucsupo o un. Inta idim imtitaig igcaki akaija an pece Juta: etpu echamecha, el eta apan Kila akaija, um ehtet irai pak an nedoa u nup u Filistia?

⁴ Va nitai inigki is aketo a Tevit, um ahodai Ihova. Is tas ehelen a Ihova, um ika, Atidai aiek, um asuol sepan Kila; ekpu idim atcijaig nup u Filistia pam irai nikmam ainyak.

⁵ Is apan Kila a Tevit im ilpu eucsupo o un, um ago nedoa vai nup u Filistia, um atoraliak niji kurimatau ura, um atgei atimi is ahinag ira ra. Is idim imicoho nup u Kila a Tevit.

⁶ Is wat aha a Abaiadar inhal u Ahimelek, um apan Kila ehele Tevit, is asuol sepan aien, um apos efot.

⁷ Eris asuptecnaig ehele Saal mika is apan Kila a Tevit. Is ika a Saal, Et mun ati yin an nikmak a Atua; eh mun idim atapnes yin, va napan o un an maliyum inig et eteuc niji tapnes irai eucse athatahau, im niji aui aiurn par ago ipjin niji tapnes.

⁸ Is asjapicnaig atimi asega a Saal va nedoa, mika eri asuol sepan Kila, par ati nedoa vai Tevit im ilpu eucsupo o un.

⁹ Is ato a Tevit mika is ago nedo acalacal vai yin a Saal, jam eti asaig; is um ika aien ehele Abaiadar natimi ahlap, Imiehio efot igcaki aiek.

¹⁰ Is um ika a Tevit, Ak Ihova Atua u nup Isreel, et mun idim atahaijeg a naheca unyum inigki, mika et ika a Saal, yi ham Kila, par auahas inmaliyum vaig tah nedo unyak.

¹¹ Erupu atcijaig nyak pan iran a nup u Kila, ka oʼo? Etpu asuol sepam a Saal et idivaig intas et mun atahaijeg a naheca unyum inigki, ka oʼo? Ak Ihova Atua u nup Isreel, ek ugyi euc ainyak mika an asuptecnaig ehele naheca unyum inigki. Is ika a Ihova, Etpu hame aien.

¹² Is lep ika a Tevit, Erupu atcijaig nyak im ilpu eucsupo unyak pan irai Saal a nup u Kila, ka oʼo? Is ika a Ihova, Erupu atcijaig euc ara.

¹³ Eris um atidai a Tevit im ilpu eucsupo o un, eris idivaig siks huntret (600) ara, um ahes Kila, um apan irai uarin iji ig, is tup upene vai ra napanvaig. Eris asuptecnaig ehele Saal, mika is udei Kila a Tevit, um aha; is um eti apitac yin eahki aien.

¹⁴ Is amen a Tevit an namasacen irai mai ij; is amen aien an lolan nedoon an namasacen Sif. Is ahilek yin a Saal irai iji adiat, ja is eti atcijaig yin pan iran a Atua.

¹⁵ Is almoi a Tevit mika is ham a Saal par atgei yin: is amen a Tevit an nuarin nesei an namasacen Sif.

¹⁶ Is atidai a Jonadan inhal u Saal, um apan ehele Tevit an nuarin nesei iyehki, um ahidaig emda inliinmopon vai Atua.

¹⁷ Is ika ehelen aien, Namu jim imtitaig: inyi idim eti alum euc a etmak Saal; napu atimarid u nup Isreel aiek, ekpu ijihgan atimi iram ainyak; et ato nitai inig a etmak Saal.

¹⁸ Erus asan tas etipup arau an nuhup u Ihova: is amen an nuarin nesei iyehki a Tevit, ja is apan an nimnim o un a Jonadan.

¹⁹ Eris aridjipan Cibea ehele Saal a nup u Sif, um ika, Et idim atpuh a Tevit ehelema irai mai ij an nesei an nedoon Hakila, an nahaijin Jesimon inig et ahes nuritoga iran.

²⁰ Va nitai inigki namu asuol aiek, ak natimarid, et idivaig inmerit u inliinmopom par asuol; etpu auritai unyima nigki par atcijai yin ehele natimarid.

²¹ Is ika a Saal, Etmu aiheuc vai caua a Ihova; eka mun aiheuc vai nyak aijaua.

²² Ek ugyi caua ainyak, mika aki apan aijaua, um ahilek upene, um ato nuarin amen iran o un, im atimi eris ecet yin ara: er asaig ehelek mika et ago itai arapakau aien.

²³ Va nitai inigki almoi aijaua, um ato upene niji uarin asega et atpuh iran aien, um lep adumoij pam ehelek, um asuptecnaig upene; ekpu lep ahced caua ainyak: im lep inig, el et amen an pece inigki aien, ekpu ahilek yin ainyak irai iji dausant u nup u Juta.

²⁴ Eris atidai ara, um uhup irai Saal, um apan Sif: ja eris amen a Tevit im ilpu eucsupo o un an namasacen Meon, an nuarin marara an nahaijin Jesimon inig et ahes nuritoga iran.

²⁵ Eris lep apan a Saal im ilpu eucsupo o un, mika eri ahilek yin. Eris lep asuptecnaig ehele Tevit: va nitai inigki is asuol sepan aien an nij, um amen an namasacen Meon. Is wat atahaijeg a Saal, is apitac Tevit aien an namasacen Meon.

²⁶ Is apan a Saal an nahaijin nedoon igcapam; eris apan a Tevit im ilpu eucsupo o un an nahaijin nedoon igcapan: eris auroauro a Tevit im ilpu eucsupo o un par ahapan va nimtitaig Saal ura; eris idim arehed irai Tevit im ilpu eucsupo o un a Saal im ilpu eucsupo o un, mika eri arop ira ra.

²⁷ Ja is apam ehele Saal a natimi is ethi eris abrai yin, um ika, Namu auroauro aiek um apam; era idim apaahni an pece a nup u Filistia.

²⁸ Va nitai inigki is adumoij pan a Saal, um eti lep apitac Tevit, um apan ehele nup u Filistia, um ati nedoa vai ra: va nitai inigki eris anvi nidan nuarin iyehki par ika Sila-hama-likod (Nij va natiakoai).

²⁹ Ja is ahes eahki a Tevit um amen irai mai ij En-citai.