1 Samuel 22 - Intas Etipup

Nuarin tas alupas 22.

1 Era ahtag pam ehele Tevit niji ira atimi Atullam. 3 Et apan Mispi aien, um ugyi natimarid u nup u Moab mika yi aminjinaig ohwat atmil o un aien. 5 Et yetpan Herad aien vai intas o Cat. 6 Et wat ika a Saal yi apitac yin, et asan tas ehti aien va nedo efaifa u ilpu aheca o un. 9 Et atijai itai ira Abimelek a Toec. 11 Et tas alep a Saal mika eri atgei ilpu atimi ahlap. 17 Era imipalea a ilpu eucsupo, ja et atahaijeg intas o un a Toec. 20 Et aha a Abaiadar um asuptecnaig ehele Tevit.

¹ VA nitai inig is udei inuarin iyehki a Tevit, um aha, um yetpan an mun nij Atullam: eris wat atahaijeg a ilpu etwan im ilpu atimi ehpan iran asega, eris um asuol sepan eahki ehelen ara.

² Eris lep asjapicnaig ehelen ara sji igki asega, eris ehcerucai ra, im lep ra sji igki asega is ehka vai ra neruvaig niji itai iji ig eris lucsei, im lep ra sji igki asega is eti eropse inliinmopora; is atimi alupas ura aien: eris amen ehelen natimi is idivaig for huntret (400).

³ Is ahes eahki a Tevit um yetpan Mispi an pece Moab: is ika aien ehele natimarid u nup u Moab, Ek ugyi euc ainyak, mika an ika aiek etmu apam a etmak im risik, um amen ehelum, um yetpan an nopan iyehki, ekpu ato ainyak mika inyi uauo nyak a Atua.

⁴ Is imiapan rau an nuhup u natimarid u nup u Moab aien: erus amen ehelen arau an nopan iyehki asega is amen an mun nij a Tevit.

⁵ Is ika ehele Tevit a Cat naprofeta, Namu jim amen an mun nij aiek; atga unyum aiek, um apan an pece Juta. Is atga o un a Tevit, um yetpan an nesei u Herad.

⁶ Is wat ato a Saal mika eris ecet Tevit im ilpu atimi iji ig eris amen ehelen; (is amen a Saal an nuarin ijinies is ethi itlian cai alupas Cibea; is amen inmopul an nikman; eris aiji arehed iran a ilpu aheca o un asega;)

⁷ is ika a Saal ehele ilpu aheca o un, eris aiji arehed iran ara, Atahaijeg aijaua, ak nup u Benjamin; etpu idim eti alupai caua asega inuari obohtan im nokoro vaine a inhal u Jese, um eti ikni caua asega mika aki ilpu atimi alupas irai iji dausant (1,000) atimi, im ilpu atimi alupas irai iji huntret (100) atimi;

⁸ eka a uri aijaua par ehritas vai nyak, jam eti asuptecnaig ehelek, mika is tas etipup ehele inhal u Jese a inhalav atamaig unyak? et eti aiheuc vai nyak tah caua, ka asuptecnaig ehelek, mika is abrai naheca unyak a inhal unyak, mika yi imiiris nyak, et idivaig an nadiat inig.

⁹ Is par tas a Toec, nup Itom iyehki, is aiji aien ehele ilpu aheca u Saal, um ika, Kis ecet inhal u Jese ainyak napan vaig Nob, ehele Ahimelek inhal u Ahaitub.

¹⁰ Is ahodaig Ihova vai yin aien, um alacan nitai caig, um alupai yin nauitoga u Colaiad nup u Filistia.

¹¹ Is abra atimi a natimarid mika eri imiapan Ahimelek natimi ahlap, inhal u Ahaitub, im ilpu etwan asega, ilpu atimi ahlap eris amen Nob ara: eris apan ehele natimarid ara asega.

¹² Is ika a Saal, Namu atahaijeg aiek, ak inhal u Ahaitub. Is ika aien, Ainyak ap aigki, ak natimarid unyak.

¹³ Is ika ehelen a Saal, Erau a uri aijaurau, aiek im inhal u Jese, par ehritas vai nyak, nikavaig, as alacan nitai caig aiek, um alupai yin nauitoga, um ahodaig Atua vai yin, mika yi atidai par auahas nyak, um imiiris nyak, et idivaig an nadiat inig?

¹⁴ Is tas a Ahimelek ehele natimarid, um ika, Et inveijec, um idivaig Tevit a di irai ilpu aheca asega unyum? et ohwanig u natimarid aien; et imiaiji intas unyum aien; era lep ecen vai yin ara an nimnim unyum.

¹⁵ Kis idim eti atupun ainyak, um ahodaig Atua vai yin; et ehka vai nyak nedo inigki: namu jim atijai tah nitai irak, ak natimarid, ka iran tah ilpu etwak asega: is idim eti ato tah nitai va nauritai inigki a naheca unyum inigki.

¹⁶ Is ika a natimarid, Napu idim mas aiek, ak Ahimelek, aiek im ilpu atimi ehpan iram asega.

¹⁷ Is ika a natimarid ehele ilpu eucsupo o un eris aiji ubutpotet ehelen ara, Ahidai caua aijaua, um atgei ilpu atimi ahlap u Ihova; va nedo ura, nikavaig, eris atah imi Tevit ara; im lep inig, eris idim ato naha o un ara, jam eti asuptecnaig ehelek. Ja eris esjum a ilpu eucsupo o natimarid par ada nikmara, um atgei ilpu atimi ahlap u Ihova.

¹⁸ Is ika a natimarid ehele Toec, Ahidai euc aiek, um atgei ilpu atimi ahlap. Is ahidai yin a Toec nup Itom, um aat irai ilpu atimi ahlap, um atgei an nadiat iyehki natimi is eete faiv, eris aso ra irai efot yilyil ara.

¹⁹ Is lep auud nup u Nob irai auitoga aien: inmaliyum u ilpu atimi ahlap iyehki; eris auud an nedoa ilpu atamaig, im ilpu takata, im ilpu halav, im ilpu hadi; im niji kurimatau, im niji togke, im niji siip.

²⁰ Is aha a inhalav atamaig is ethi u Ahimelek, inhal u Ahaitub, nidan Abaiadar, um apitac Tevit.

²¹ Is asuptecnaig a Abaiadar ehele Tevit, mika is atgei ilpu atimi ahlap u Ihova a Saal.

²² Is ika a Tevit ehele Abaiadar, Kis ato ainyak an nadiat iyehki, is wat amen eahki a Toec, mika yi idim asuptecnaig ehele Saal aien: ek mun ati nohuun mas u ilpu atimi ehpan iram asega ainyak.

²³ Amen ehelek aiek, jim imtitaig: nikavaig, aien aigki et ahilek inmas unyak aien et ahilek inmas unyum aien: ja uhpu imiatamaig euc ehelek.