1 Samuel 21 - Intas Etipup

Nuarin tas alupas 21.

1 Et apan Nob a Tevit, um leh nareto itap ehele Abimelek. 7 Et ecet yin a Toec. 8 Et leh nauitoga u Colaiad a Tevit. 10 Et apan Cad a Tevit, um ago nedo o natimi ahnag.

¹ IS apan an maliyum Nob a Tevit ehele Ahimelek natimi ahlap: is imiali a Ahimelek an nehtet irai Tevit o un, um ika ehelen, Na a uri aiek par echim atga, um eti ahced euc tah?

² Is ika a Tevit ehele Ahimelek natimi ahlap, Et mun abrai nyak a natimarid mika ki ago tah nauritai, um ika ehelek, Jim asaig nauritai inig aiek ehelen tah natimi, ek abraig euc vaig ainyak mika an ago, im nitai inig ek tas alep vaig ehelum ainyak: ek mun abrai ilpu aheca unyak ainyak mika eri aitgaig nyak ara an tah anuarin.

³ Ja et amen ehelum inhe? alacak nareto inyi faiv aiek ki apos ainyak, ka nareto iji ig et eled.

⁴ Is tas a natimi ahlap ehele Tevit, um ika, Et eti amen ehelek tup nareto, ja et amen nareto itap inigki ache; el era eti amen ehele ilpu ehgara a ilpu takuras.

⁵ Is tas a Tevit ehele natimi ahlap, um ika ehelen, Et idim inveijec nitai inig, nikavaig, era eti amen ehelema a ilpu ehgama ira adiat is dri, ahes an natga unyak um imihum pam, et lep adicinadicin nohui ilpu takuras; et um idivaig tup nareto nareto inig: maiya, el er imiitap nareto an nipjinitai an nadiat inig.

⁶ Va nitai inig is alacan nareto itap a natimi ahlap: is idim eti amen tah nareto eahki, nareto itap ache, eris atipagki an nuhup u Ihova, mika eri ati nareto ere par isjapigmoig iran an nadiat inig eris atipagki.

⁷ (Ja is amen eahki an nadiat iyehki tah natimi irai ilpu aheca u Saal, is ecen an tah nitai aien vai Ihova; nidan Toec, nup Itom, is esjilid aien irai ilpu atimi aminjinaig kurimatau u Saal).

⁸ Is ika a Tevit ehele Ahimelek, Et amen ehelum, ka oʼo, tah inmopul, ka tah nauitoga? ek mun eti apos nauitoga unyak ainyak, ka nij va atimi unyak; eris idim ika, ki fi auroauro ainyak, um ago nauritai u natimarid.

⁹ Is ika a natimi ahlap, Nauitoga u Colaiad nup u Filistia iyehki, as atgei yin aiek an niskanse Ila; et idim amen igcaki, eris aso an napelumai u efot igcapan: el et leh inaico aiek, leh: et eti amen tah igcaki, inaico ache. Is ika a Tevit, Et esjilid inaico; alupai nyak.

¹⁰ Is atidai a Tevit, um aha an nadiat iyehki va nimtitaig Saal; is yetpan ehele Ekis aien natimarid u nup u Cad.

¹¹ Eris ika ehele Ekis a ilpu aheca o un, Idim Tevit nigki, natimarid an pece; eris idim acesaces nohranitai jipe vai yin ara an nadekdekjai ura, um ika, Et mun atgei niji dausant (1,000) atimi o un a Saal, im niji ten dausant (10,000) atimi o un a Tevit.

¹² Is aktaktai alupas intas iji igki an liinmopon a Tevit; is imtitaig alupas Ekis natimarid u nup u Cad aien.

¹³ Is ika aien yi eche nedo o un an nuhup ura; is ago nedo is idivaig nedo o natimi ahnag ehele ra aien, um acridacrid irai tapnes an neucse nirahed; is lep agdei umri ingeijin aien.

¹⁴ Is um ika a Ekis ehele ilpu aheca o un, Eka almoi aijaua mika et ahnag a nat igki: eka a uri aijaua par imiapam yin ehelek?

¹⁵ Ek merit vai ilpu atimi ahnag ainyak, ka oʼo? mika aki imiapam nat igki par ago nedo o natimi ahnag an nuhup unyak? inyi idim eti apam an nimnim unyak aien.