1 Samuel 20 - Intas Etipup

Nuarin tas alupas 20.

1 Et tas ehele Jonadan a Tevit va namen upene o un. 11 Erau aketo a Jonadan im Tevit um asaig yi aktit jipe intas etipup urau. 18 Nitai asjaaicnaig u Jonadan imi Tevit. 24 Et wat eti ecet Tevit a Saal et ika aien yi atgei Jonadan. 35 Et imitaig Tevit a Jonadan um adcijai yin.

¹ IS udei Neyod an pece Rema a Tevit, um aha, um apan ehele Jonadan, um ika ehelen, Ek mun ago inhe ainyak? nauatatimi unyak inhe? nedo has unyak an nuhup u etmam nevitai, mika yi ahilek nyak aien par atgei nyak?

² Is ika ehelen a Jonadan, Inyi idim eti uce; napu eti mas aiek: inyi idim eti ago tah nitai alupas ka haklin a etmak, ja etpu asuptecnaig ehelek aien: et a uri a etmak par ateri nitai inigki ehelek? et idim eti uce.

³ Is lep asan tas emda a Tevit, um ika, Et idim ato a etmam mika et alupas naiheuc unyum vai nyak; et um ika aien, Etmu jim ato nitai inig a Jonadan, va yi jim ehtigtaig aien: ja ek tas inveijec ainyak an nuhup u Ihova, im lep an nuhup unyum, mika ek ubutpotet acen u inmas unyak ainyak.

⁴ Is ika a Jonadan ehele Tevit, Ekpu ago vai euc ainyak niji itai asega et merit vaig inliinmopom aiek.

⁵ Is ika a Tevit ehele Jonadan, Etpu upyi het imraig, eris idim ika, inki ehrateuc ehele natimarid ainyak um hag: ja namu adcijaig nyak aiek mika ki atpuh ainyak an lelitai um yetpan vid an jupura.

⁶ El et ahodaig nyak a etmam, namu ika aiek, Is ugyi alupas nyak a Tevit, mika yi athut pan Bedlehem, inmaliyum o un: era asjapicnaig eahki a ilpu atemetan asega, um ahlap an nitai ahlap et ethi irai iji mesese.

⁷ El et uce intas o un, um ika, Et idim upene; etpu amen igpa a naheca unyum inigki: ja el et atavaitap alupas aien, napu ato aiek mika et aktaktai has vai nyak aien.

⁸ Namu aiheuc vai naheca unyum inigki aiek; as ika aiek, ki asan tas etipup u Ihova ainyak ehele naheca unyum inigki: ja el et eteuc tah nedo has ehelek, namu atgei nyak aiek ache; napu imiapam nyak ehele etmam aiek vanhe?

⁹ Is ika a Jonadan, Etmu itac acen vai euc nitai inigki: el ek idim ato ainyak mika et aktaktai a etmak par ago tah nitai has vai euc, el ek idim asuptecnaig ehelum ainyak.

¹⁰ Is ika a Tevit ehele Jonadan, El et tas edemda ehelum a etmam, inki ato ainyak vai di?

¹¹ Is ika a Jonadan ehele Tevit, Tu apan akaijau anliin pece. Erus apan itac arau anliin pece.

¹² Is ika a Jonadan ehele Tevit, Etmu alum nyak a Ihova Atua u nup Isreel, um aru alupas, el ek ago nedo efaifa vai euc ainyak Jonadan. Eku wit ahilek inliinmopoi etmak ainyak an tah anuarin nadiat imraig, ka vid, el et eteuc tah nitai upene vai euc, ak Tevit, ekpu abraig pan tah ehelum ainyak, mika yi asuptecnaig ehelum;

¹³ ja el et ika a etmak yi ago tah nitai has vai euc, ekpu asuptecnaig ehelum ainyak, um adcijaig euc mika an apan aiek an liinmopom eropse: etmu amen ehelum a Ihova, et idivaig is amen ehele etmak aien.

¹⁴ Namu ago nedo aiheuc u Ihova vai nyak aiek mika etpu eti mas ainyak; jam eti an numoh unyak ache:

¹⁵ ja etmu jim tiih naiheuc unyum vai ilpu; mapok irai iji mesese: maiya, an aiheuc vai ra aiek an nopan iyehki etpu auahas ehni a Ihova ilpu atimi tak atimi irai Tevit an narasin nobohtan.

¹⁶ Ja el et atgei tah irai ilpu mapoi Tevit a Jonadan, etmu ahilek neruvaig a Ihova ehele ilpu atimi tak atimi irai Tevit.

¹⁷ Is ika a Jonadan ehele Tevit, yi aketo um asig yi aktit, va naiyu u inliinmopon vai yin: is idim aiyu inliinmopon aien vai Tevit is idivaig naiyu u inliinmopon vai yin.

¹⁸ Is ika a Jonadan ehele Tevit, Etpu upyi het imraig: uhpu ahodaig euc, vaig inig nikavaig, etpu lah nitai ateuc unyum.

¹⁹ Nau wit amen eahki aiek ira adiat inyi eseij, namu auroauro aiek um asuol, um yetpan an nuarin iyehki as atpuh iran aiek an nopan u nauritai iyehki, um amen an hat Isel.

²⁰ Ekpu atcijaig nidjan nefana inyi eseij ainyak an nahaijin hat iyehki, et idivaig tah et ahcin naparata aien.

²¹ Ekpu idim abrai intakuras inyi ethi ainyak, um ika, Apan aiek, um ahilek nidjan nefana erahki. El ek asaig ehele intakuras iyehki ainyak, Almoi, et amen nidjan nefana an nahaijin igcaki, lucsei aiek; namu apam aiek: et eteuc nigpa vai euc, um eti eteuc nitai has; ek asan tas inveijec ainyak an nuhup u Ihova.

²² Ja el et uce intas unyak ehele intakuras iyehki, Almoi, et amen nidjan nefana an nahaijin eahki; atga unyum aiek: et mun abrai euc a Ihova mika an apan aiek.

²³ Im lep va nitai inig intau mun tas jipe vaig akaijau, etmu atimi alum itai iraijau a Ihova irai iji mesese.

²⁴ Is atpuh anliin pece a Tevit: is wat yetpam nupyi het, is ateuc a natimarid mika yi hag.

²⁵ Is ateuc an nitai ateuc o un a natimarid, is idivaig an nopan iji ehki, an nitai ateuc an yipin neom: is atidai a Jonadan, is ateuc a Abner an nahaijin Saal, ja is tup lah nitai ateuc u Tevit.

²⁶ Ja is eti asaig tah nitai a Saal an nadiat iyehki: is idim aktaktai aien, um ika, Et mun yetpam iran tah nitai, kit et eti adicinadicin aien; et idim eti adicinadicin aien.

²⁷ Is wat lahlah an tak apnyin, is adiat sekunt an mohoc nadiat iyehki, is tup lah nitai ateuc u Tevit: is ika a Saal ehele Jonadan inhal o un, Et a uri a inhal u Jese, et eti ham aien inhag vaig ianiv im lep inpig?

²⁸ Is ika a Jonadan ehele Saal, Is ugyi emda nyak a Tevit, mika yi apan Bedlehem aien:

²⁹ is ika aien, Adcijaig nyak aiek, ek ugyi euc ainyak; era ahlap an nitai ahlap a ilpu atemetin an maliyum unyima; et mun abrai nyak a etwak, mika ki apan eahki ainyak: el et idim upene inliinmopom aiek vai nyak, aiheuc vai nyak aiek um adcijai nyak, mika ki ateghe ilpu etwak ainyak. Va nitai inig et eti hame aien u inhag u natimarid.

³⁰ Is atavaitap vai Jonadan a Saal; is ika ehelen aien, Na atimi ipjin aiek um imipalea: ek idim ato ainyak mika na apitac inhal u Jese aiek, mika yi auahas euc, um ati nehcamai irai risum.

³¹ Etu wit umoh a inhal u Jese an nobohtan, uhpu eti aktit euc im nelcau unyum. Va nitai inig namu abraig tah ehelen aiek um imiapam yin ehelek; etpu idim mas aien.

³² Is tas a Jonadan ehele Saal etman, um ika ehelen, Uhmu atgei yin vanhe? et mun ago inhe aien?

³³ Is ahcai yin an mopul hat is ethi a Saal mika yi tau iran: va nitai inig is ato a Jonadan, mika is ika inliinmopoi etman yi atgei Tevit.

³⁴ Va nitai inig is esjilid nedemda u Jonadan, is um atidai aien u nitai hag, um eti caig tah nitai caig an nadiat sekunt an mohoc: is imitaig Tevit aien, va nedo inig, nikavaig, is auoh ehcamai yin a etman.

³⁵ Is wat lahlah an nuhialeg, is alau ijo a Jonadan, um apan anliin pece an nopan iyehki is asaig aien ehele Tevit; is ahced yin a intakuras haklin is ethi.

³⁶ Is ika aien ehele intakuras o un, Athut aiek, um ahilek niji idjan efana inki atcijaig ainyak. Is wat athut a intakuras iyehki, is ahtaregdei yin nidjan nefana is ethi an nahaijin eahki.

³⁷ Is wat yetpan a intakuras iyehki au nuarin is amen iran nidjan nefana iyehki is atcijaig a Jonadan, is ahlaig ijinies vai intakuras iyehki a Jonadan, um ika. Et idim amen nidjan nefana an nahaijum eahki.

³⁸ Is ahlaig ijinies vai intakuras iyehki a Jonadan, um ika, Fi auroauro aiek um ahiyio, um jim tup amen, Is asjapicnaig nidjan nefana is eseij a intakuras u Jonadan, um apan ehele natimi alupas o un.

³⁹ Ja is eti ato tah nitai a intakuras iyehki: erus ato nedo inig arau ache, nan, Jonadan im Tevit.

⁴⁰ Is alupai intakuras iyehki nij va atimi o un a Jonadan, um ika ehelen, Namu apan aiek um apos pan nitai iji igki an maliyum.

⁴¹ Is wat atga o un a intakuras, is par ahes an nuarin inig is ethi et ahes nuritoga iran a Tevit, um eropse an nesganimtan an nobohtan, is um eceseij atpuse aien: erus aijumnyi jipe rau arau, um taig jipe, ja is esjilid intaig u Tevit.

⁴² Is ika a Jonadan ehele Tevit, Apan aiek an liinmopom eropse, et idim inveijec, intau mun asig yi aktit jipe akaijau an nidai Ihova, um ika, Etmu atimi alum itai a Ihova an niblaijau im lep an niblai ilpu hal ujau im ilpu mapjau irai iji mesese. Is um atidai aien um atga o un: is lep apan an maliyum a Jonadan.