1 Samuel 2 - Intas Etipup

Nuarin tas alupas 2.

1 Nohranitai u Hanna naaurinig Atua vaig. 12 Nedo has u ohwat halav atamaig u Ilai. 18 Nauritai u Samuel. 20 Et asan tas acis yi alwai Hanna a Ilai, ja et par lep apos ilpu hal o un aien. 22 Et acaiji ohwat hal o un a Ilai. 27 Intas upyi asaig vai ohwat hal u Ilai im ilpu mapon.

¹ IS alaigaheni a Hanna, um ika, Et mun imiacitak inliinmopok ainyak vai Ihova; ek mun imiaridjai nipat unyak ainyak vai Ihova: ek mun auud yi apidai ilpu atimi tak atimi irak an nipjineucsek ainyak; vaig inig nikavaig, ek imiacitak ainyak va nitai imiatamaig nyak unyum.

² Et eti upene tah, um idivaig Ihova: et idim eti eteuc tah atua, aiek ache: maiya, et eti eteuc inhehteuc, um idivaig Atua uja.

³ Namu jim lep asaig intas ijinies acen aiek; etmu jim ahes an nipjineucsem tah intas ipjin: et idim Atua ato itai a Ihova, et almaijidjid nedo o atimi aien.

⁴ Eh mun asvi niji ceen nefana u ilpu atimi emda; eh mun ahid nemda u ilpu atimi auatialidi.

⁵ Era ika a ilpu atimi geije, eri auaraheca vai nitai caig ara; era lep ti a ilpu atimi ehtele ra: et mun apos ilpu halav et seven a intakata is eti asvalav; ja et auatialidi aien et ahinag ilpu hal o un.

⁶ Et atgei atmas a Ihova, um imiatumumoh atimi: et imiasuol atimi uma atmasnien, um imiaridjipam ra.

⁷ Et ika a Ihova eri atimi ihki atimi nahaiji atimi, um lep eri atimi ikni itai nahaiji atimi: et ikni se nahaiji ra aien, um ikni jai nahaiji ra.

⁸ Et imiaridjai ilpu ihki atimi an mah aien, um alcacsei ilpu atimi era amen an niji ira ohok, mika yi ikni jai ra aien ehele ilpu atimi alupas, mika eri ateuc ara irai dorona esjilid: et idim u Ihova niji oboatau an nobohtan, is atijai nobohtan iran aien.

⁹ Etpu aminjinaig neduei ilpu atimi upene o un aien, erupu eucsup an nuarin apat a ilpu atimi auatatimi: inyi eti esjilid tah natimi va nemda o un.

¹⁰ Etpu ehtoplecoplec ilpu atimi tak atimi iran a Ihova; etpu ika aien yi atceteuc inmunuka an nohatag ehele ra: etpu almaijidjid atimi era amen irai iji pece an nobohtan a Ihova; ja etpu alupai natimarid o un nemda aien; etpu imiaridjai nipat u natimi o un aien eris aspi yin.

¹¹ Is apan Rema a Elkana an nimnim o un. Is aheca u Ihova a nadualep iyehki an nuhup u Ilai natimi ahlap.

¹² Erus atimi auatatimi ahwat halav atamaig u Ilai; erus eti ato Ihova arau.

¹³ Nedo o ohwat atimi ahlap eraigki va atimi nigki: is wat ahlap an nitai ahlap tah natimi, is apam a naheca u natimi ahlap an nahlamerai vaig u nohui itai, is apos inmopul an nikman aien is eteuc nitai alcausei itai is eseij iran;

¹⁴ is ahcai aien u nipjipan, ka ketel, ka nipjiuru, ka nipjinitai; is leh imi yin a natimi ahlap nuarin inig is au aien an mopul iyehki o un, erus ago nedo inigki arau Sailo ehele nup Isreel asega eris asjapicnaig eahki ara par ahlap vai Ihova.

¹⁵ Im lep inig, eris wat eti fi atnamud nagako, is ham a naheca u natimi ahlap, um ika ehele natimi inig et ahlap aien, Alupai nyak tah inuarin nohui itai par ahen va natimi ahlap; inyi idim eti leh nohui itai eris ahlamerai ehelum aien, jam mat ache.

¹⁶ El et ika ehelen tah, Uhmu idim uhup um atnamud nagako an nopan inig, ja par apitac um leh vai euc et idivaig inmerit u inliinmopom; is um ika aien, Oʼo; el et eti alupai nyak aiek an nopan inig, ekpu emda ainyak um ispuk leh.

¹⁷ Va nitai inigki is esjilid nedo has o ohwat takuras erahki an nuhup u Ihova: eris idim amcel vai niji itai ahlap u Ihova natimi.

¹⁸ Is aheca an nuhup u Ihova a Samuel, eris aso yin an napelumai yilyil u natimi ahlap; is adualep ache aien.

¹⁹ Im lep inig, is ijei kot haklin vai yin a risin irai iji mesese, um imiapan imi yin, is wat ahced natamnyu un aien par ahlap an nitai ahlap an nopan o un.

²⁰ Is acis yi alwai Elkana im ehgan a Ilai, um ika, Etmu alupai euc ilpu halav irai intakata inigki a Ihova, va nitai tup ahtai o un inig is ahtai imi Ihova aien. Erus adumoij pan an nimnim urau arau.

²¹ Is aiheuc vai Hanna a Ihova, is um opoc aien, um apos inhalav atamaig is eseij, im inhalav atahig is ero: is auata alupas a Samuel nadualep iyehki an nuhup u Ihova.

²² Is idim efatimi a Ilai; Is atahaijeg nedo asega o ohwat halav atamaig o un aien ehele nup Isreel; im nedo urau, nikavaig, erus ago ingeijid ehele ilpu takata iji ig eris asjapicnaig ara an neucse nirahed u neom itap er asjapicnaig o un.

²³ Is ika ehele rau aien, Erau a uri aijaurau par ago nedo inigki? ek idim atahaijeg niji edo has iji ig unyimirau ainyak ira atimi asega.

²⁴ Maiya, ak ohwat hal unyak; et idim inveijec, et eti upene intas inig ek atahaijeg ainyak vai caurau: era ago nedo has a ilpu atimi u Ihova vai caurau.

²⁵ El et ago nedo has tah natimi vaig tah natimi et eche, et eti ehka vai Atua natipagki vaig nedo has o un: ja el et ago nedo has tah natimi vai Ihova, etpu imiaras yin adi? Ja erus eti atahaijeg intas o etmarau arau, vaig inig nikavaig, is idim ika a Ihova yi atgei rau aien.

²⁶ Is auata alupas a Samuel nadualep iyehki: is upene inliin mopoi Ihova vai yin, im lep inliinmopoi atimi.

²⁷ Is apam ehele Ilai a natimi is ethi u Atua, um ika ehelen. Et idim uco intas o Ihova. Kis idim ehvaig nyak ainyak ehele etpom im ilpu hal o un an namen ura an pece Ijipt ehele atimi u Fero.

²⁸ Kis idim ehtai yin ainyak ehele nup Isreel asega, mika vi atimi ahlap aien vai nyak, um ahlap an nitai ahlap an natau unyak, um atnamud nitai auanipin upene, um aso yin irai efot an nuhup unyak; kis idim alupai etpom im ilpu hal o un im ilpu mapon niji itai ahlap atnamud asega u nup Isreel ainyak.

²⁹ Eka a uri aijaua par amcel vai nitai ahlap unyak im nitai tup ahtai unyak, kis ati ainyak an nimnim unyak? maiya, na eti ago nedo ecen vai nyak aiek, um idivaig nedo ecen vai ohwat halav atamaig unyum; eka wat alupas aijaua vai inhag unyimia irai iji itai ahlap asega et esjilid u nup Isreel ilpu atimi unyak.

³⁰ Va nitai inigki et ika a Ihova Atua u nup Isreel, Kis idim ika ainyak eri aheca a ilpu mapom im ilpu mapoi etpom an nuhup unyak irai iji mesese: ja et ika a Ihova, Inyi idim eti uce; ekpu ecen vai ra sji igki ainyak, era ecen vai nyak ara; ja eri amcel vai ra sji igki, era amcel vai nyak ara,

³¹ Aktaktai, etpu yetpam tah nopan inki atipagki nemda unyum ainyak im lep nemda u ilpu atimi ehpan iram; inyi eti eteuc nefatimi irai ilpu mapom.

³² Napu ecetai intaig va nimnim unyak aiek, va niji itai asega iji ig is ika a Atua yi alupai nup Isreel: inyi eti lep eteuc tah nefatimi irai ilpu mapom irai iji mesese.

³³ El et eteuc tah natimi irai ilpu mapom, inki eti atipagki yin ainyak irai natau unyak, etpu aplan nesganimtam aiek vai intaig unyum, etpu ohocred inliinmopom aiek vai yin: erupu emesmas a ilpu mapom asega an takuras ura.

³⁴ Etpu itai asjaaicnaig vai euc nitai inigki etpu yetpam irai Hofnai im Finehas, ohwat halav atamaig unyum; arupu idim emesmas arau an nadiat inyi ethi ache.

³⁵ Ekpu ati natimi ahlap inveijec vai nyak ainyak; etpu ago itai aien et idivaig inmerit u inliinmopok, im lep nesgak: ekpu asig yi aktit ainyak mika eri umumoh a ilpu mapon um amen upene; etpu aheca aien an nuhup u natimi inig inki ati yin ainyak irai iji mesese.

³⁶ Erupu apam a ilpu mapom asega iji ig eri eti emesmas ara, um atpuse an nuhup o un va nuari silver im nuari nitai caig, um ika athi athi, Ek ugyi euc ainyak mika an ati nyak aiek par ago tah nauritai u ilpu atimi ahlap, mika ki caig nuarin nitai caig ainyak.