1 Samuel 19 - Intas Etipup

Nuarin tas alupas 19.

1 Et ehvaig a Jonadan intas o etman par atgei Tevit. 4 Et tas upene ehele etman aien, um ika yi asa nigpa. 8 Et esjilid a Tevit an nedoa mat, va nitai inigki et aketo a Saal um edemda alupas vai yin. 12 Et imiahnag etman a Maikal an nalmuitai an tinai Tevit. 18 Et yetpam an maliyum Neyod ehele Samuel a Tevit. 20 Et abraig pan atimi a Saal mika eri arop irai Tevit, era acesaces nohranitai ara. 22 Et apitac a Saal um lep acesaces nohranitai.

¹ IS asaig a Saal ehele Jonadan inhal o un im lep ilpu aheca o un asega, mika eri atgei Tevit.

² Ja is aiyu inliinmopoi Jonadan inhal u Saal vai Tevit: is tas a Jonadan ehele Tevit, um ika, Et merit a Saal etmak par atgei euc: va nitai inig ek ugyi euc ainyak, mika an aminjinaig euc um yetpan an nuhialeg, um amen an nuarin adenaig, um atpuh:

³ ekpu apan itac ainyak, um aiji ehele etmak an nijihgan pece iyehki na amen iran aiek; ekpu lep tas ehele etmak vai euc ainyak; eku wit ato tah nitai ainyak, ekpu asuptecnaig ehelum ainyak.

⁴ Is tas upene vai Tevit a Jonadan ehele Saal etman, um ika ehelen, Ak natimarid, namu jim ago nedo has aiek vai Tevit, naheca unyum; et mun eti ago nedo has aien vai euc; et lep upene nedo o un vai euc:

⁵ is eti aktaktai numoh o un aien, um atgei nup u Filistia iyehki; is imiatamaig alupas nup Isreel asega a Ihova iran: as almoi aiek, um imiacitak: na a uri aiek par ago nedo has vai yin et ti nedo has o un, um tup atgei Tevit?

⁶ Is atahaijeg intas o Jonadan a Saal: is asig yi aktit intas a Saal, um ika, Ek asan tas inveijec ainyak an nuhup u Ihova, mika inyi eti mas aien.

⁷ Is ahlaig vai Tevit a Jonadan, um asuptecnaig ehelen nitai iji igki asega. Is imiapan Tevit ehele Saal a Jonadan; is amen ehelen aien is idivaig itu.

⁸ Is lep eteuc nedoa: is lep apan a Tevit, um ati nedoa vai nup u Filistia, um atgei atimi is ahinag; eris aha ara au nuhup o un.

⁹ Is yetpan irai Saal a nesgai nitai has is ahes ehele Ihova, is ateuc anliin neom o un aien, is amen inmopul hat an nikman: is atcei harp o un an nikman a Tevit.

¹⁰ Is ika a Saal yi acjapidai pan Tevit an mopul hat iyehki an yipin neom; ja is tup tiih pan aien an nuhup u Saal, is um tau an yipin neom inmopul: is aha a Tevit an nepig iyehki, eris um eti ecet yin.

¹¹ Is abra atimi a Saal mika eri apan au neom u Tevit, um atpaijinaig yin, um atgei yin au nuhialeg: is asaig ehele Tevit a Maikal ehgan, um ika, El et eti imiatamaig euc aiek an nepig inigki, etu wit lahlah an nuhialeg uhpu atgei euc.

¹² Is um uco, is aiyihise Tevit a Maikal an mun neom: is atga o un aien, um aha; eris um eti ecet yin.

¹³ Is leh natmasimai a Maikal, um atijai an tinau, um ati incat is ethi is amen numri nanin iran an nilaig o un, um adahpoi an napelumai.

¹⁴ Is wat abra atimi a Saal mika eri arop irai Tevit, is ika a Maikal, Et emehe aien.

¹⁵ Is aketo a Saal, um abra atimi mika eri ecet Tevit ara, um ika, Imiapam yin ehelek aijaua an nitai ahled o un, mika ki atgei yin ainyak.

¹⁶ Eris wat apan anliin neom a ilpu atimi iji ehki eris abrai ra, is idim asjeuc natmasimai an tinan, im incat is ethi is eteuc numri nanin iran an nilaig o un.

¹⁷ Is ika a Saal ehele Maikal, Na a uri aiek par ahiyek nyak, um adcijaig natimi tak atimi irak, et mun ahapan aien? Is ika a Maikal ehele Saal, Is ika ehelek aien. Adcijaig nyak aiek; ek a uri ainyak par atgei euc?

¹⁸ Is ahapan a Tevit, eris um eti ecet yin; is yetpan ehele Samuel aien Rema, um asuptecnaig ehelen nitai iji igki asega is ago vai yin a Saal. Is apan aien im Samuel um amen Neyod.

¹⁹ Eris asuptecnaig ehele Saal, um ika, Et idim amen a Tevit Neyod an pece Rema.

²⁰ Is abra atimi a Saal mika eri arop irai Tevit: ja eris wat ecet inpak irai ilpu profeta ara eris acesaces nohranitai, im Samuel, is aiji aien, is idivaig eris ati yin mika yi esjilid ira ra, is yetpan irai ilpu atimi iji ehki is abrai ra a Saal a Nesgai Atua, eris lep acesaces nohranitai ara.

²¹ Eris wat asuptecnaig ehele Saal, is aketo aien, um abra atimi is eche, mika eri apan; eris lep acesaces nohranitai ara. Is lep aketo a Saal, um abra atimi is eche, mika eri apan; eris um lep acesaces nohranitai ara.

²² Ja is par apitac a Saal um apan Rema, um yetpan an nehpan wai alupas Siku: is ahodaig aien, um ika, Samuel im Tevit rak eda? Is ika tah, Erau idim amen arau Neyod an pece Rema.

²³ Is yetpan eahki aien Neyod an pece Rema: is um yetpan iran a Nesgai Atua, is atga pan aien, um acesaces nohranitai, um yetpan an napam o un Neyod an pece Rema.

²⁴ Is adi napelumai itac o un aien, um acesaces nohranitai an nuhup u Samuel an nedo inigki; um asjeuc an napelumai uhup o un ache an nadiat asega iyehki, im lep an nepig asega iyehki. Va nitai inigki er ika, Et ethi irai ilpu profeta a Saal, ka oʼo?