1 Samuel 18 - Intas Etipup

Nuarin tas alupas 18.

1 Et aiyu inliinmopoi Jonadan vai Tevit. 5 Et auatitai a Saal va nimiahpas yin, 10 um ika yi atgei yin an tavaitap o un, 12 et lep imtitaig yin aien va nedo arapakau o un, 17 um ika yi leh inhalav atahig o un ehgan, mika yi itai apro yin. 22 Et atahaijeg intas o Saal a Tevit mika yi leh inhalav atahig o un ehgan, um alupai yin narasin uhup u nup u Filistia et tu huntret nimtan vai Maika!. 28 Et auata alupas nedemda u Saal, im natimi alupas u Tevit.

¹ IS wat tas ehni ehele Saal aien, is apol aktit inliinmopoi Jonadan irai inliinmopoi Tevit; is aiyu inliinmopon vai Tevit aien, is idivaig is aiyu inliinmopon aien vai yin.

² Is leh yin a Saal an nadiat iyehki, um acaiji yin, um ika yi jim lep adumoij pan an nimnim u etman.

³ Erus tas etipup jipe arau, nan, Jonadan im Tevit, va naiyu u inliinmopon esjilid acen vai yin.

⁴ Is adi napelumai esjilid iran a Jonadan, um alupai Tevit, im tup napelumai asega o un, im lep nauitoga, im inceen nefana, im nitai ahid.

⁵ Is apan a Tevit irai iji uarin asega is abraig pan yin iran a Saal, is um arapakau nedo o un: is ati yin a Saal mika yi atimi alupas u ilpu eucsupo o un aien, is upene inliinmopoi atimi asega vai yin, im lep inliinmopoi ilpu aheca u Saal.

⁶ Eris wat ham ara, is wat ahes a Tevit an natgei nup u Filistia iyehki, eris ahes irai iji maliyum asega u nup Isreel a ilpu takata, um acesaces nohranitai, um adekdekjai, mika eri aubilid Saal natimarid ura, um apos niji elcau, im niji atarau, im niji itai is eteuc inya is eseij iran.

⁷ Eris wat atcei itai a ilpu takata, eris acesaces nohranitai jipe ara, um ika nahaiji ra, Et mun atgei niji dausant (1,000) atimi o un a Saal, ja par ika nahaiji ra, Et mun atgei niji ten dausant (10,000) atim o un a Tevit.

⁸ Is edemda alupas a Saal, is atavaitap, aien vai intas iji ig; is ika aien, Era mun asaig niji ten dausant (10,000) ara imi Tevit, ja era mun asaig niji dausant (1,000) ache ara imi nyak: uhpu alupai yin inhe et eche? nelcau marom.

⁹ Is auatitai a Saal vai Tevit au nadiat iyehki, um uhum pan irai iji adiat.

¹⁰ Is wat lahlah an tak apnyin, is yetpam irai Saal a nesgai nitai has iyehki is ahes ehele Atua, is acesaces nohranitai itap anliin neom o un aien: is atcei harp o un an nikman a Tevit, is idivaig an nopan iyehki: is amen inmopul hat an nikmai Saal.

¹¹ Is ahcai yin an mopul o un a Saal; is idim ika aien, Inki acjapidai pan Tevit ainyak an yipin neom; is ecero ethaig a Tevit vai yin.

¹² Is imtitaig Tevit a Saal, vaig inig nikavaig, is amen ehelen a Ihova, ja is udei Saal aien.

¹³ Va nitai inigki is atipagki yin ehelen a Saal, um ati yin mika yi atimi alupas irai ilpu eucsupo o un is wun dausant (1,000); is uhup ira ra aien an napan ura, im lep an napam ura.

¹⁴ Is ago nedo arapakau a Tevit an nedo asega o un; is amen ehelen a Ihova.

¹⁵ Is wat ecetai a Saal mika is arapakau alupas aien an nedo o un, is imtitaig alupas yin aien.

¹⁶ Ja is aiyu inliinmopoi nup Isreel im nup u Juta asega vai Tevit, va nitai inig, nikavaig, is uhup ira ra aien, an napan ura im lep an napam ura.

¹⁷ Is ika a Saal ehele Tevit, Almoi Miirab aiek inhalav atahig unyak inmeto, ekpu alupai euc yin ainyak ehgam: ago nitai inig ache, namu emda aiek vai nyak, um ago nedoa u Ihova. Is idim ika a Saal, Etmu jim yetpan iran nikmak, ja etmu yetpan iran nikmai nup u Filistia.

¹⁸ Is ika a Tevit ehele Saal, Ethi ainyak di aigki? et idivanhe inpak an nedoa unyak? et idivanhe neteuc u ilpu atimi ehpan irak an pece Isreel, mika ki ohwanig u natimarid ainyak?

¹⁹ Ja an nopan iyehki, eris wat ika eri alupai Tevit Miirab inhalav atahig u Saal, eris alupai Etriel nup u Miholad yin mika yi ehgan.

²⁰ Is aiyu inliinmopoi Maikal inhalav atahig u Saal vai Tevit: eris imiabrai Saal ara, is upene iran nitai inigki.

²¹ Is ika a Saal, Inki alupai Tevit yin, mika yi itai apro yin aien, um lep mika eri edemda vai yin a nup u Filistia. Va nitai inig is ika a Saal ehele Tevit, Napu ohwanig unyak aiek an nadiat inig vaig tah rau.

²² Is tas a Saal ehele ilpu aheca o un, um ika, Akumu echim tas ehele Tevit aijaua, um ika, Et imiacitak euc a natimarid, et aiyu inliinmopoi ilpu aheca o un asega vai euc: va nitai inig namu atidai aiek im inhalav atahig u natimarid.

²³ Eris asan tas iji ig an tikgai Tevit a ilpu aheca u Saal. Is ika a Tevit, Jim aktaktai aijaua mika et itai aiheucaiheuc mika ki ohwanig u natimarid ainyak: ek idim ihki natimi ainyak, er eti ecen vai nyak.

²⁴ Eris asuptecnaig ehele Saal a ilpu aheca o un, um ika, Et idim uco intas o Tevit.

²⁵ Is ika a Saal, Inyi uce intas unyimia ehele Tevit, Et eti merit vai tah nimtan a natimarid, narasin uhup u nup u Filistia inyi wun huntret ache, par aru irai ilpu atimi tak atimi u natimarid. Ja is aktaktai a Saal mika yi atgei Tevit aien an nikmai nup u Filistia.

²⁶ Jai eris wat asuptecnaig intas iji ig ehele Tevit a ilpu aheca u Saal, is idim upene irai Tevit mika yi ohwanig u natimarid.

²⁷ Is eti ti pan itac nadiat eris aniv, ja is atidai a Tevit im ilpu eucsupo o un, um apan, um atgei atimi is tu huntret irai up u Filistia; is lucsei niji arasin uhup ura a Tevit, um ikni ra asega an nuhup u natimarid, mika yi ohwanig u natimarid aien. Is alupai yin Maikal inhalav atahig o un a Saal mika yi ehgan.

²⁸ Is almoi a Saal, um ato, mika is amen ehele Tevit a Ihova, um lep mika is aiyu inliinmopoi Maikal inhalav atahig u Saal vai yin.

²⁹ Is lep imtitaig alupas Tevit a Saal; is atimi tak atimi irai Tevit a Saal irai iji adiat.

³⁰ Eris ehcohos pam a ilpu atimarid u nup u Filistia: eris wat ehcohos pam ara, is arapakau nedo o Tevit; is esjilid nedo o un irai nedo o ilpu aheca u Saal asega; va nitai inig eris imiahpas alupas yin ara.